1 ✝Nao long vison ya, mi lukluk i go antap, mo mi luk wan samting olsem ruf we i raon, we i stap antap long hed blong ol jerubim* long 9.3. ya, mo antap long olgeta i gat wan samting we i olsem jea blong king we oli wokem long flas ston ya safaea.* 2 ✝Nao Hae God i talem long man ya blong raet we i werem klos ya we oli wokem long linen* se, "Yu go long medel blong ol wil ya we oli stap aninit long ol jerubim* ya, yu karem sam sakol faea we i laet, yu saksakem olgeta i go olbaot long taon ya."

Nao mi stap lukluk hem we i stap wokbaot i go. 3 Long taem ya, ol jerubim ya oli stap stanap long smol yad ya blong haos* blong Hae God, long saed i go long saot. Mo taem hem i stap go long medel blong ol wil blong olgeta, wan klaod i kam kavremapgud smol yad ya. 4 Mo bigfala laet ya we i saen we i saen we i soemaot we Hae God i stap, hem i aot long ol jerubim ya, nao i muv i go long doa blong haos blong Hae God. Nao klaod i kam kavremap haos ya, mo bigfala laet ya i saen i kam fulap long yad ya. 5 Nating we man i stap stanap long bigfala yad blong haos ya, we i longwe long Rum we i Tabu, be hem i save harem noes blong ol wing blong ol jerubim ya. Noes ya i olsem voes blong Hae God ya we i gat olgeta paoa. 6 Taem Hae God i talem long man ya blong raet, blong i go tekem faea we i stap long medel blong ol wil ya, man ya i go insaed long medel blong ol wil ya, i go stanap long saed blong wan long olgeta. 7 Nao wan long ol jerubim ya i pusum han blong hem i go long faea ya we i stap long medel blong olgeta, i karemaot sam sakol faea, i putum long han blong man ya. Mo man ya i tekem ol sakol ya, nao hem i aot i go.

8 Nao mi luk we ol jerubim ya oli gat han olsem han blong man i stap aninit long ol wing blong olgeta. 9,10 ✝Mo mi luk we i gat fo wil we oli sem mak nomo, mo olgeta wil ya wanwan oli stap long saed blong ol jerubim ya wanwan. Ol wil ya oli saen gud olsem flas ston ya krisolaet.* Mo olgeta wanwan i gat narafala wil i gotru long hem we i mekem fokona long medel blong hem, 11 blong bambae ol wil ya oli save muv i go long ol fo saed we oli no save tanem olgeta. Ol jerubim ya oli save muv wantaem i go long weples we oli wantem go long hem, we oli no save tanem bodi blong olgeta. 12 ✝Ol baksaed blong olgeta, mo ol han blong olgeta, mo ol wing blong olgeta, mo ol narafala haf blong ol bodi blong olgeta, mo ol wil blong olgeta tu, oli fulap long ae blong man. 13 Mo mi harem se nem blong ol wil ya, "Tantanem".

14 ✝Ol jerubim ya wanwan oli gat fo naranarafala fes. Olgeta fes ya, faswan, hem i fes blong bul, sekenwan, hem i fes blong man, mo namba tri, hem i fes blong laeon, mo namba fo, hem i fes blong bigfala pijin ya igel.** sekenwan, hem i fes blong man, mo namba tri, hem i fes blong laeon, mo namba fo, hem i fes blong bigfala pijin ya igel. 15 Ol jerubim ya, hemia sem samting ya nomo we mi bin luk long Kebara Reva. Taem ol jerubim ya oli girap i go antap, 16 oli go wetem ol wil ya. Mo taem oli stretem ol wing blong olgeta, oli flae i go, be oli stap flae wetem ol wil ya. 17 Ol wil ya oli haf blong ol jerubim ya mo taem olgeta oli no muv, no oli flae i go, be ol wil ya oli go wetem olgeta.

18 Nao bigfala laet ya we i saen we i saen, we i soemaot we Hae God i stap, i aot long doa blong haos ya, i muv i go long ples blong hem antap long ol jerubim ya. 19 Taem mi stap lukluk yet, mi luk we ol jerubim ya oli stretem ol wing blong olgeta, oli flae i go antap wetem ol wil ya. Nao oli go stap smol long doa blong yad ya, long saed i go long is, mo laet ya i stap saen antap long olgeta. 20 Nao mi luksave we ol jerubim ya oli sem samting ya nomo we mi bin luk olgeta long Kebara Reva we oli stap aninit long bigfala jea ya blong God blong yumi.

21 Olgeta wanwan oli gat fo fes, mo fo wing, mo fo han blong man aninit long ol wing ya. 22 Ol fes blong olgeta oli sem fes ya nomo we mi bin luk long Kebara Reva. Mo olgeta oli gohed oli stap muv stret i go we oli no go olbaot.