1 Nao Hae God i gohed, i talem long mi se, "Taem yufala i seraot ol graon long ol twelef laen* blong yufala, yufala i mas mekem wan haf blong hem i kam tabu, i blong mi. Pis graon ya, longfala blong hem bambae i kasem twelef kilometa haf, mo bigfala blong hem bambae i kasem ten kilometa. 2 Mo long graon ya, bambae i gat wan pis we i skwea, i blong haos* blong mi, we olgeta saed blong hem wanwan i kasem tu handred fifti meta. Mo bambae i gat wan open ples we i goraon long hem, we bigfala blong hem i kasem twanti faef meta. 3 Bambae yufala i makem haf blong graon ya, we longfala blong hem i kasem twelef kilometa haf, mo bigfala blong hem i kasem faef kilometa, blong haos blong mi i save stanap long hem. Ples ya nao i tabu we i tabu. 4 Bambae i kam wan tabu graon we i blong ol pris,* from we oli stap wok blong mi long haos blong mi. Mo ol haos blong olgeta bambae i stap long hem, mo wan pis bambae i blong haos blong mi. 5 Mo narafala haf blong graon ya bambae i blong ol Livaet* we oli stap mekem wok long haos blong mi. Mo bambae oli gat ol taon blong olgeta long hem, blong oli save stap long hem.

6 "Nao klosap long tabu graon ya, bambae yufala i makem wan pis graon bakegen, we longfala blong hem i kasem twelef kilometa haf, mo bigfala blong hem i kasem tu kilometa haf. Pis graon ya i blong wokem wan taon long hem, we ol narafala laen* blong Isrel* oli save stap long hem.

7 "Mo bambae tu pis graon i blong king we bambae i rul. Tufala pis graon ya, wan pis i stat long mak blong tabu graon ya saed i go long wes, i go kasem Mediterenian Si long wes. Mo narawan i stat long mak blong tabu graon long saed i go long is, i go kasem mak blong graon blong kantri blong yumi saed i go long is. Nao bambae longfala blong tufala pis graon ya wetem tabu graon ya i sem mak nomo, olsem wan long ol pis graon ya we bambae yufala i givim long ol narafala laen* blong Isrel.* 8 Tufala pis graon ya nao, king ya bambae i tekem i blong hem, blong bambae ol king oli no moa save mekem i strong tumas long yufala, oli letem ol narafala haf blong kantri ya i go long ol narafala laen blong yufala."

9 Hae God i Masta blong yumi, mo hem i talem se, "Yufala we i stap rul long Isrel,* longtaem tumas yufala i stap mekem sin. Yufala i mas finis long fasin ya blong faet, mo fasin ya blong spolem ol narafala man. Yufala i mas mekem ol samting we i stret gud. Yufala i no mas ronemaot ol man blong mi bakegen, oli gowe long graon blong olgeta. Mi mi Hae God, mi Masta blong yufala, mo hemia tok blong mi.

10 ✝"Yufala evriwan i mas yusum ol mak mo skel* we i stret gud, i no blong giaman.

11 "Mak ya efa, we i blong makem ol samting we i drae, hem i mas sem mak long mak ya bat, we i blong makem wota mo ol narafala samting olsem. Mo mak ya homa*, hem i stret gud blong makem olgeta samting long hem. Ol mak ya, wan homa i olsem ten efa, we i sem mak long ten bat.

12 "Ol skel blong yufala, bambae twanti gera i olsem wan sekel*, mo sikisti sekel i olsem wan mina.

13-15 "Ol rul we yufala i mas folem taem yufala i givim ol presen blong yufala i kam long mi bambae i olsem.

"Taem wit* blong yufala i raep, nao yufala i tekemaot long garen, bambae yufala i seraot ol wit ya long sikisti hip, nao yufala i mas givim wan hip i blong mi. Mo taem bale* blong yufala i raep, nao yufala i tekemaot long garen, bambae yufala i seraot ol bale ya long sikisti hip, nao yufala i mas givim wan hip i blong mi.

"Mo taem ol olif blong yufala oli raep, mo yufala i mekem oel long hem, bambae yufala i makem oel ya long wan handred pankin, nao yufala i mas givim wan pankin long mi. Bambae yufala i makem oel ya long mak ya bat, we ten bat i sem mak long wan homa, we i sem mak long wan koro.

"Mo taem yufala i gat tu handred sipsip yufala i mas givim wan long mi.

"Yufala i mas karem ol presen blong kakae blong garen, mo ol anamol we i blong sakrefaes ya we i blong bonem i bon evriwan blong mekem wosip long mi, mo ol anamol we i blong mekem sakrefaes ya, we yufala i bonem haf yufala i kakae haf blong soemaot we yufala i stap fren gud wetem mi, nao yufala i mas givim olgeta long mi, blong bambae mi fogivim yufala, mi tekemaot ol sin blong yufala. Mi mi Hae God, mi Masta blong yufala, mo hemia tok blong mi.

16 "Yufala evriwan we i stap long kantri ya, bambae yufala i mas karem ol presen ya i kam long king ya we bambae i rul long yufala. 17 Bambae wok blong hem i blong givim ol anamol ya, mo ol presen ya blong ol kakae blong garen, mo ol presen ya blong waen, blong yufala evriwan i yusum blong mekem sakrefaes long ol Lafet blong Niumun,* mo long ol Sabat* dei, mo long ol narafala lafet ya we mi mi makemaot. Hem bambae i mas givim ol presen blong tekemaot sin blong yufala, mo ol presen blong kakae blong garen, mo ol presen blong sakrefaes ya we i blong bonem i bon evriwan, mo ol sakrefaes we yufala i bonem haf yufala i kakae haf blong soemaot we yufala i stap fren gud wetem mi, from we ol sakrefaes ya i blong tekemaot ol sin blong yufala."

18 Hae God i Masta blong yumi, mo hem i talem se, "Long fas manis,* long fas dei blong hem, bambae yufala i mas tekem wan bul we i no gat wan samting nating i rong long bodi blong hem, nao bambae yufala i mekem sakrefaes long hem i kam long mi, blong mekem haos* blong mi i klin. 19 Mo bambae pris* i tekem blad blong sakrefaes ya blong tekemaot sin, nao i putum long ol pos blong doa blong haos ya blong mi, mo long ol fo hon* blong olta, mo long ol pos blong ol doa ya blong kam insaed long yad blong haos blong mi. 20 Mo long namba seven dei blong manis ya, bambae yufala i mas mekem sem samting blong tekemaot sin blong man we i mekem sin we i no minim blong mekem, no we i no save se hem i mekem. Long fasin ya nao, bambae yufala save mekem haos blong mi i tabu oltaem.

21 ✝"Nao long namba fotin dei blong sem manis ya, bambae yufala i statem Lafet ya blong Pasova.* Bambae olgeta man oli mas kakae bred we i no gat is long hem, gogo kasem seven dei. 22 Long fas dei blong lafet ya, bambae king i mas tekem wan bul blong mekem sakrefaes, blong tekemaot sin blong hem, wetem sin blong olgeta man. 23 Mo long ol seven dei blong lafet ya, evri dei, hem bambae i mas givim seven bul mo seven man sipsip we oli no gat sam samting nating i rong long bodi blong olgeta, blong mekem sakrefaes ya we oli bonem i bon evriwan blong mekem wosip long mi. Mo evri dei, bambae hem i mas givim wan man nani, blong mekem sakrefaes blong tekemaot sin. 24 Long ol bul ya wanwan, mo long ol man sipsip ya wanwan, we bambae oli mekem sakrefaes long olgeta, bambae king ya i mas givim seventin kilo haf wit* no bale,* mo tri lita olifoel* we bambae oli yusum blong mekem sakrefaes wetem ol samting ya.

25 ✝"Mo long Lafet blong Ol Wansaed Haos, we bambae i stat long namba seven manis, long namba fiftin dei blong hem, evri dei, gogo kasem seven dei, king i mas givim ol samting ya blong mekem ol sakrefaes blong tekemaot sin, mo ol sakrefaes blong bonem i bon evriwan, mo hem i mas givim ol wit no bale, mo ol olifoel blong ol sakrefaes ya."