Irrepreensível

31 Ra Anumzamoka Kagri kavukava zamo’a fatgo higeno, mika kagrama huvempa hu’nana kemo’a tamage naneke me’ne. Hagi iza’zo kagripima efraki’za vahera hankozami nemanine.

30 Anumzamofo avu’avamo’a knare hu’ne. Ra Anumzamoka ke’mo’a tamage ke me’ne. Hagi Agra hankogna hu’nege’za vahe’mo’za agripinka ome franekize.

Aleph

1 Iza’zo nomani’za zamifima fatgo avu’ava zama nehu’za, Ra Anumzamofo kasegema amage’manentaza vahe’mo’za muse hugahaze.

2 Iza’o hazenkema nosuno fatgo avu’ava’ma nehuno, agu’aretima huno tamage kema nehuno, 3 vahe’mofo azeri haviza hu kea nosuno, vahe’mofo huhaviza hunenteno, tavaoma’are’ma nemanimofoma havigema hunonteno,

7 Fatgo vahe’mofona knare antahiza ante avitenenteno, makazampima mani fatgoma huno mania vahe’mofona, Agra hanko zamigna nehie.

2 Na’ankure rama’a zampi havizana nehune. Hagi iza’o agrama kema hanifima fatgo osu kegaga huzanku’ma kva’ma hanimo’a, agra soe ne’kino amne mika avufgamofona kvahu so’e nehie.

27 Agru huno fatgo monoku’ma Anumza Nafatimofona ave’nesiana, e’i megusa mofavre’zagane, kento a’ne zaga knazampima mani’nesazana kegava hunezmanteta, atrenkeno ama mopafi kefozamo’a tamazeri pehena osino.

17 Mika knare huno fatgo hu’nea, musezana anagamuti eneramie, monafinkati masazamofo Nefantegati ne-ea, avu’avazama’amo zahe osuno turunamo hiankna huno zaza huteno, atupa huteno osugahie.

9 E’i ana atazama eri’nea agofetu Anumzamo’a fatgo nere huntegeno, maka Agri’ma amage’ma antaza vahe’mokizmirera, manivava hanagu zmahokenea zamofo agafa’a mani’ne.

21 Higeno Jisasi’a agrikura anage hu’ne, Kagrama fatgo hugahuema hanunka, vunka zagore afufenonka’a ome atrenka, ana zagoa erinka zamunte omne vahe ome nezminka, hagi kagra monafinka feno eri santi haregahane. Hutenka Nagrira eme namage anto.

11 Ama zanku’ma Nagra nermasmuana, Nagri muse zamo tamagri tamagu’afi me’nigeno, musezantmimo’a avitegahie.

24 Korapara Nagri nagifina mago’zankura antahi onke’naze. Hianagi tamagra antahigetma erigahaze, e’ina hanageno muse zantmimo’a avitegahie.

2 Hagi ama mopafi avu’avazanena tagrora oteho. Hianagi tamagra atrenkeno antahintahitamia Anumzamo tamazeri kasefa nehanigeno, tamavutamava zamo’a ruzahe hino. Anama hanuta, tamage Anumzamofo avesizamo’a, knare huno haviza osuno, fatgo hu’ne huta eriama hugahaze.

Mono vahe’mokizmi amunompi knaza me’nea naneke

10 Hagi nenafugata hanaveti’na tamantahinegoe, Rantimofo Jisas Kraisi agifi miko’motma mago tamarimpa ohunte ahunte nehanageno amu’nontamifina atane’zana omneno. Ana hanutma fatgo hutma magoke antahi’zampine, tamagesa antahi’zampinena eri mago hugahaze.

14 Avesimantezamo ana miko avu’avara agaterenegu, rumokizmi zamavesizamanteho. Avesi’ante avu’vazamo ana miko knare avu’ava zana azeri manumanu hu’ne.

Mago tarimpa huta manineta rumokizmima zamaza hanuna naneke

1 Hagi e’ina higu tamarimpa tamazeri hanaveti kema Kraisinte me’nesiampi, asuragirmanteno avesi tmante’zampi, Avamupi atruma hu’zampi, avesima ante’zane, asunku’zane me’nesiana, 2 nagri muse zane, eri hagerafitma magoke antahintahire’ene, magoke avesizante’ene, magoke tmagu tamagesane, magoke avamupine, magoke antahintahire manigahaze. 3 Inankna zama hanaza zantera ra tamagesa ontahita, tamagragukera ontahiho. Hagi tamavufa anteramita, rumofona antahi nemita husga huzmanteho. 4 Tamagra zankera kegava osiho, hagi ru vahe zanena kegava hiho. 5 Tamagra magozahu tamavutma rumokizmia huzmanteho, Krais Jisasimpima me’nea avu’ava rumokizmia huzmanteho. 6 Ana hu’neanagi Anumzane mago kna huno mani’nea ne’mo, Kraisi’a Anumzankna hu’na manisnue huno agesa ontahi’ne. 7 Agra avufagura antahi amneza seno, agi omne kazokzo eri’za vahe kna huno, mopafi vahe avu’avate efore hu’ne. 8 Kraisi’a avufa antermino, ke erizafa huteno, fri kante ruhiza huno, keka zafare fri’ne. 9 Na’ankure ana agafare, Anumzamo azeri antesga nehuno, musezama (gift) Agri’ma ami’neana, maka’zamofo agi’a agtere’nea agi ami’ne. 10 Ana hu’negu Jisasi agirera monafine, mopafine, mopa agu’afine, maka’zamo agrite rena rentegahie. 11 Ana nehanigeno maka vahe’mo’za Jisas Kraisi’a Rane hu’za zamagiteti huama nehu’za, Anumza Nerfa’a hanave’afi mani’ne hugahaze.

Vahe’mokizmi amu’no zamifi tvi kna hu’za mani’naza naneke

12 E’izanku navesi neramantoa nafuhetma, tamagranema mani’nogetma ke’ni’a erizafa nehazankna hutma, omanisua knafina ke’ni’a amage anteho, tamagra tamazama hu’nea zanku hutma tamano nevazino, tamahirahi nerena kazigazi hutma amage anteho. 13 Na’ankure Anumzamo tamagripi eri’za e’nerie, Agra tmagu’a tamazeri otigetma kezafa hutma eri’zama’a e’neriza zane, Agri avesi avariri hanave’a tami’ne.

14 Maka’zama hanafina, havi tamarimpa osutma hafra nosutma tamarimpa frune maninetma hugahaze. 15 Anama hanage’za, vahe’mo’za neramagesagetma fatgo hutma, ketmia omnesigetma nemanitma, Anumzamofo mofavre tro hutma nemanitma, havige huormantesagetma, kazaki’zampi kazigazi nehnaza vahe amu’no zamifina nemanitma, ofumo remsa hiaza hutma ama mopafina remsa huzmantegahaze. 16 Kasefa hu’za mani’zamofo naneke azeri hanavetiho, ana nehnage’na Kraisi ete esia knafi neramage’na hanave’afi muse nehu’na nagare’na nevu’na eri’zama eri’noazamo’a amane zankna osu’ne hu’na hugahie. 17 Hianagi ana zanke hu’zama waini ofagna hu’zama korani’a tagi netre’za, kresramana neviaza hanaza zamo’a tamentintia tamaza nehina, nagra nagu’areti musena neha’nena, tamagrane muse hugahaze. 18 Tamagriku’enena, nagra tutu huneramantoe, tamagra anazanke hutma musena nehutma, nagri’enena tragotetma musenkase hugahaze.

Timoti’ene Epafroditusike eri’za erisna’a naneke

19 Hianagi nagra nagesama nentahuana, Timotina osi’a knafi Ranti Jisasi avesizama me’nenkena huntanenkeno tamagrama mani’nazarega vugahie. Ana nehanigetma tamagra inankna hutma nemanizafi eme nasmisige’na antahi’na musena hugahue. 20 Na’ankure magora Timoti kna agu’ane vahera tamagri’ma tamema’nesia zama huga hu’nea nera omani’ne. 21 Na’ankure zamagra maka’mo’za zamagri’ma zamenesia zante kegava nehu’za, Krais Jisasi zana kegava nosaze. 22 Hianagi tamagra antahi’naze, Timotima tamage knare eri’za eri’neana, agra nagrane tragoteno Knare Musenke (gospol) hura nehuno, mofavremo nefa aza nehiankna huno, eri’zana naza huno eri’ne. 23 E’izanku nagrama nagesama nentahuana, ame' hu’na huntesugeno tamagritega vugahie. Inankna zano nagrite’ma fore’ma hanigu kete’na huntesugeno vugahie. 24 Nagra, Ramofonte nagu’a nentoe (trast), osi’a knafi tamagrira eme tamagenaku nagra nagesa nentahue.

25 Hianagi nagrama antahuana tamagritega Epafroditusi’a vugahie. Nagri nenfu magoke eri’za enerita, tragoteta ha' nehu’a ne' (sondia), agra tamagri naneke erino eme nasmisnia ne’kino, upama nehuazana naza nehia nere. 26 Na’ankure agra maka’motma tamagezanku hugeno antahintahi’amo kna higeno avufa ata eri’ne. Na’ankure tamagra krima eri’nea kema antahi’nagu ana hu’ne. 27 Na’ankure tamage krima eri’neana frikante ruhiza huteno kanamare’ne. Hianagi Anumzamo asuntagi ante’ne, agri’keku anara osu’ne, nagriku’ene huno ana hu’ne, ana hina nasuzamo agofetu agofetu hu’zanku, azeri oti’ne. 28 E’ina hu’negu huntanena vanigetma negetma muse nehnagena, nagra tamagrikura nagesa ontahina fru huna manigahue. 29 Uhanatisigetma Rantimofo agifi tmagu’a muse nehutma avreho, e’inahu vahera antahi nezamita muse huta zamavareho. 30 Na’ankure maka’motma afete mani’netma naza osazageno tamagri nona huno, Epafroditusi’a avufagura agesa ontahino eme naza nehuno, Kraisi eri’zanku huno fri' kante ruhiza hu’ne.

15 Mago’mo’e huno havizama huntesimofona, nona’a havizana huonteno. Hianagi maka kna knare avu’avaza ohunte ahunte nehutma, maka vahetera anahukna tamavutmava huzmanteho.

10 Hianagi nagrama kama vanoma huana, nageno antahino hu’ne. Ana hu’neankino renaheno’ma kesanige’na, tevefima golima krazageno avusesema hiaza hugahue. 11 Na’ankure maka zupa nagra Anumzamofo kante nagia rente’na vano nehu’na, Agri avu’ava’za amage nente’na, ru kantera vugantigma nosue.