21 Kǝɗ ǝnɗi thlǝ thlaˈandǝ Chinda mǝmatecha kǝ fǝrandech shishingnda, kǝɗu paɗ Wanan thlǝ fǝranchan shishingndǝ thla yahandǝn. 22 Kǝthlǝm Chinda chaka wa mee chikawun wa. Kǝɗu fǝrangkan Wanan nat alkǝt chak mee, 23 kǝthlǝm chǝka wun nefa kǝ manan tǝ Wanan, kǝɗ thla thlǝ manaandǝ fee Chinda. Nat thla thlǝ mana wakchǝ Wanan, fǝrawa maandǝ Chinan thla thlǝnchi anchi wa.

24 "Kittaˈan, nati mbuˈowunda, nat thla thlǝ sǝkchǝ ndiktinchi, paɗ mǝthlan fǝr kit, kǝ thla thlǝnchi nenchi, shishingndiyansi kǝ kwekǝɗan. Nggǝ fee chakan mee wa, tapi hǝreˈi ǝ mǝrta, kǝ shishingnda. 25 Kittaˈan nati mbuˈowunda, fartaˈan ɓata, tapi ǝ sheˈi, thla naa mǝmatecha sǝk ɓǝrati Waˈi Farta, fee sǝkcha kǝ nan ndǝ ha. 26 Kǝɗ ǝnɗi naa Farta tǝ indiyan kǝ shishingnda, kǝɗu fǝrandǝn Wanan alkǝta kǝ chok tǝ shishingndǝ fa. 27 Fǝrangkan alkǝta kǝ thlen tǝ chak mee ha, kǝthlǝm Waˈi Nef nakan.

28 "Kǝ tǝrwun kafǝrta kǝ thleya wa, kǝthlǝm fartaˈan ɓata fee nech hur kwi mǝrcha nandǝ sǝk ɓǝratiyan, 29 paɗ kǝ chendǝ kesh. Fee thlǝ thlǝnchǝ ǝnɗi nech ke kaɗan naa fee thlaˈa ndata, thlaˈta kǝ fǝran fee shishingndǝ tanda. Fee chich kumi kit paɗ naa fee thlaˈa ndata, kǝ chak mee. 30 Ni mbahǝn chǝt ǝn yi indinchi wa. Kǝɗ ǝnɗi thlǝ sǝkti, kǝɗu thlǝ chak ti mee. Chak mee inchi paɗ yi kaakǝta, kǝthlǝm ngga tǝni chǝt ǝnɗi yahti wa, ǝnɗi yahtǝ thla thlǝnchi nenchi ndak.

31 "Ma ǝ fǝrinchi chek tǝ ndikta kǝ indinchi, nafcha nggandǝ nggǝmantǝ ǝnɗi mbuˈti wa nechan kǝ kit wa.

7 Nat kǝɗu, tǝ mbuˈowunchi kittaˈan. Nan kwechowun ndǝ fa kǝ pǝɗi, kǝthlǝm manga tǝ pǝɗi wa Nefa thla nech Ndǝksowunda nech ɓǝ kǝmɗiyowun wa. Kǝɗu ma ǝ pǝɗinchi, ni thlǝnowun ndi. 8 Paɗ fartǝɗi ɓatǝn, nan pǝnandǝ nafchi heshi, ǝ kitˈyandǝs wa kǝɗar ɓǝɓifata, tǝ nat ha kǝɗ ǝnɗi yahtǝ Farta tǝ, paɗ kǝɗar chak mee. 9 Kǝɗar ɓǝɓifata, kǝthlǝm fǝr wandǝ kit kǝ nenchi wa,

30 Ndankǝ Yesu tanda wa, "Ɓǝratǝɗiya ɓechan kǝthlǝm nggǝwun, ngga kǝthlǝm nggǝta wa. 31 Nakanya nafee chakan mee heshiɗiya, paɗ nafee kǝtandǝ thla ha nech chit kutǝrakti heshiɗiya. 32 Kǝrsǝ thlaˈtǝɗi naa fee thlaˈita hur haha, ni kah nafchi nat kǝmɗinchi."

38 Nda kan wa, "Chinda, fǝrinchi kit." Paɗ manankan Yesu.

39 Ndak Yesu wa, "Ɓechi kǝ hur heshi kǝthlǝm chak mee. Kǝthlǝm fee thlǝ nawakchǝ mǝta kǝ nandǝ mǝta, fee thlǝ nech mǝt paɗ kǝ chok ndǝ kǝ komincha."

1 Thlam nafɗi nawaktǝ fǝr kit yan kwaˈkwa. Kǝ wumowunchi asˈinda ha tǝ yowuna wa kǝ ɗar ǝnɗi naa kaɗatˈyo tǝ yaˈan sam samǝn wa. 2 Fǝr kit i yowuna, nan ngǝmandǝs kǝ sǝmtǝ chik yen ɗǝsǝmnda, yowun paɗ thla nawakchǝ kwaˈkwa hur fǝr kit ˈyan, wan ɗǝftǝ ndak thlǝ sǝmndǝn. 3 Nafɗi thlǝ sǝmchǝ chik yen ɗǝsǝmnda kǝ njǝr tǝ thla thlǝ sǝmwakchǝ koha ɗǝsǝmnda wa. Thla thlǝ sǝmchǝ wan ɗǝftǝ ndak kǝ chakan tǝ mee thla thlǝ sǝmchǝ koha ɗǝsǝmnda, kǝthlǝm tapi thlǝ Farta ndi. 4 Wun nako hacha natu chakan mee mafati yowuna? Ndu mafaɗan kǝ thlarha ndu kǝ hǝmha nat nechan ɓǝrati thlǝ wǝrˈyan, nan mbahǝn thlartǝ ha, kǝthlǝm chinda nan mbahǝn ɗǝf ndi kǝ thlar ha.

12 Kǝthlǝm ndaˈan, chikwun nefa nan mbuˈ ǝnɗi chitǝn tǝ indiyan pangngǝn Farta.

13 Kǝthlǝm ndaˈan, malaman naa ɓǝɓifati raˈan ha. Chik wun kǝ tǝrtǝ sheɗan hur wanɗǝkaɗat ˈyan, ndat wa, ngen chok kǝ ɗakwan che wansartiyanwa, thla thlǝ ɗǝf chǝ sheɗan kǝ ɓǝɓifata wa. 14 Sǝninchi, paɗ nii mbahǝn mbuˈta hur thlǝm chinda Yesu, ndat wa, ngǝ ǝnsi tǝ indiyan nawakchǝ chǝɗchǝɗ wa. Paɗ ma tǝr yowun wa ǝnsi nawakchǝ chǝɗchǝɗ, chǝɗchǝɗ mǝɗˈyan wa.

5 Kǝthlǝm ndaˈan, kǝ chakawun mee yowuna wa, ǝ saˈwu fartaˈan kwaɗǝn wa. Na fartǝ chak mee ini ɓata fartǝɗi ɓa Chindǝ Yesu kaɗi. Nan pǝn ɗaˈkǝta kǝ ɓǝra ichiɗi wuɓandǝ wuthlǝ tanda, paɗ kǝ kohtantǝ ichiɗi kesh nech hur wanɗǝkaɗati nafcha. Ə fartǝ ini nan chim chikawuni keˈke tǝ tarɗi thlǝnandǝn.

2 Kǝthlǝm tǝ weˈtǝ chakmiɗi chakandǝwun raˈan, tǝ weˈtǝ ndaˈan na Farta chakowun ndǝ paɗ. Tǝɓ tartǝɗi kaɗat wunsi, tǝ ndaˈan na Farta kaɗowundǝsi.

3 "Kǝthlǝm mǝ thlǝ ɗǝpandu wan usunɗi nech ǝ weniti shetwa, paɗ kaɗewen har tǝ kunggul ɗǝftǝɗi nech ǝ wenito wa? 4 Necho ndandǝ wanmu wa kǝni, ‘Suku kǝ kǝtani wan usunɗi nech ǝ hur wenitiyo,’ kǝrsaɗan kunggul ɗǝftǝs ǝ hur wenitiyo?