Legalidades

Ya pagka͡agad sa manga migdumala

1 Ya kadég mayu na nyangintu-u kan Kristu, pagka͡agadan mayu ya manga utaw na migdumala kamayu. Kay ya katundanan sa pagdumala, lekat saba oloꞌ adti Tyumanem. Aw pigtaligu nan yeiy adti manga utaw na migdumala kamayu. 2 Yanagaw, pangkay singalan ya nyatu sa manga migdumala kanan, pig-atuwan nan uman ya Tyumanem. Aw ya manga utaw na nyatu, un saba dumawat sa pa-emel-emel. 3 Walaꞌ ya indeganan na utaw mallek sa manga migdumala kun madyaw ya kanan pig-imoꞌ. Ya utaw na mig-imoꞌ sa malatay, yan ya umbaꞌ mallek. Kun kaliman mu na diliꞌ kaw mallek kanilan, pag-imoꞌ kaw sa madyaw aw sayaꞌ kaw saba nilan. 4 Ya manga migdumala kamayu, pigtaliguwan silan na Tyumanem pada madyaw ya kamayu pag-eyaꞌ. Manang kun awun utaw adti kamayu na mig-imoꞌ sa malatay, awun indeganan nan mallek kanilan kay awun saba katundanan nilan magpa-emel-emel sa utaw yan. Kay pig-atagan silan na Tyumanem sa katundanan. 5 Yanagaw, ka-ilangan mayu ka͡agadan ya manga migdumala kamayu, bekeꞌ oloꞌ na asuntu na nyallek kamu sa pa-emel-emel na Tyumanem manang asuntu na kya-ede-an mayu ya madyaw na umbaꞌ imo-un. 6 Yeiy uman ya du-an na magbayad kamu sa manga buwis. Kay ya manga awun katundanan, silan ya pigtaliguwan na Tyumanem sa manga imo-unun yeiy. 7 Pangkay unu na buwis na umbaꞌ bayadan, bayadi mayu silan. Pagbasa͡an mayu ya umbaꞌ basa͡an.

Ya pagginawa tadun sa kanaten eped

8 Kun awun utang aw beles tadun, maksay naten bayadan. Manang ya sambuk na utang na diliꞌ kabayadan, yan ya paggaginawa͡ay tadun. Kay ya gyuminawa sa eped nan nyakatuman sa kadég na suguꞌ na awun ni Uldin.

12 Manang padelega mayu ya imo-unun na madyaw adti manga eped mayu na walaꞌ pa pangintu-u pada kita-en nilan ya bet mayu. Yanagaw, pangkay kun maglong silan sa malat adti kamayu, manang kita-en nilan ya kadyaw na imo-unun mayu, aw un nilan basa͡an ya Tyumanem dun ni allaw na paglikuꞌ ni Kristu.

Ya pagka͡agad sa utaw na awun katundanan

13 Asuntu na nyangintu-u la kamu sa kanaten Matas na Pangulu, pagka͡agadan mayu ya kadég na manga utaw na awun katundanan na migdumala sa pig-eya-an mayu. Aw basa͡an mayu silan dala ya impirador 14 aw ya manga gubirnador na pig-atagan na impirador sa katundanan magpa-emel-emel sa manga mig-imoꞌ sa malat aw sa pagsayaꞌ sa manga mig-imoꞌ sa madyaw.

17 Yanagaw, awun usip nami kanmu: Adti kanmu anenganeng, unu, umbaꞌ kanaten na manga Judiyu ya pagbayad sa buwis adti kan César aw diliꞌ?" 18 Manang kya-ede-an ni Jisus ya kapandayan nilan. Yanagaw piglongan nan silan, "Alag kamu saba migtallalingu! Anangaꞌ aku mayu tanda-en? 19 Pakita͡an kanak ya kuwalta na un mayu pagbayad sa buwis." Aw pigdimilan nilan sakanan na kuwalta, 20 aw nyusip si Jisus kanilan, "Kan yeiy gya ya ini? Aw kan yeiy uman ngalan ya nyakasulat asini?" 21 Aw tyumubag silan, "Kan César." Aw miglong si Jisus kanilan, "Na, atagan mayu adti kan César ya umbaꞌ kan César aw atagan adti Tyumanem ya umbaꞌ sa Tyumanem."

Ya pagbayad ni Jisus sa buwis na Témplo

24 Aw sa pagdateng nilan adti Kapirna-um, dyumulud adti kan Pédro ya manga mangungubla͡ay sa buwis na Témplo na awun ni Jérusalim. Aw nyusip silan kanan, "Unu, magbayad ya magpalna-uway mayu sa buwis na Témplo?" 25 Tyumubag si Pédro, "E-e."

Pag-uliꞌ da ni Pédro adti balay, nyuna si Jisus miglong kanan, "Kay Simon, adti kanmu anenganeng, singalan galu ya umbaꞌ pabayaden na manga hariꞌ sa manga buwis? Ya kanilan iseꞌ aw kun manga sakup nilan?" 26 Aw tyumubag si Pédro kanan, "Manga sakup nilan." Aw miglong pa si Jisus, "Yanagaw walaꞌ ya labet na tengteng na iseꞌ nilan magbayad. 27 Manang pada diliꞌ kitadun kadamanan na manga mangungubla͡ay sa buwis na Témplo, paminta kaw kanateꞌ adti dulug na danaw. Beklasa ya tagnaꞌ na isdaꞌ na tumubug sa binta mu. Beka-a ya baka nan, aw kita-en mu dun ya kuwalta na bulawan na maputiꞌ. Kamanga ya kuwalta aw bayadi ya buwis ku aw ya kanmu."

25 "Aw kun limanda kaw na sambuk na utaw aw dala͡en kaw nan adti usayanan, madyaw pa na maksay kamu magkakadyaway talana na walaꞌ pa kamu dateng adti usayanan. Pagaw kun dumateng kamu dun, padakep kaw baling na mag-usayay aw pakalabusu kaw nan. 26 Matinaw saba ya paglongun ku: Kun makalabusu la kaw, diliꞌ pa kaw paluwa-en kun diliꞌ mu kabayadan ya kadakulaꞌ na salaꞌ na nya-imoꞌ mu.

18 Aw asuntu sa pagpangintu-u mayu kanak, un kamu nilan pa-indegen adti asdangan na manga gubirnador aw manga hariꞌ. Aw dun da kamu pakaselat pagpa-edeꞌ kanilan sa Madyaw na Ubat-ubat kanak aw adtu uman ni manga utaw na Héntil. 19 Kun tumbay kamu nilan adti asdangan na mag-usayay aw pan-usipen kamu nilan, diliꞌ magkakamang ya ginawa mayu kun unu ya un mayu tubag kanilan. Kay dun ni udas yan, ya Ispiritu na Ama yan ya maggagad sa kamayu anenganeng sa un mayu tubag kanilan.

Ya pagka͡utaw ni Jisus

1 Na, idtu na manga allaw yan, si César Agusto ya impirador* na migdumala sa kadakulaꞌ na kasakupan na Roma. Mig-imoꞌ sakanan sa bala-ud na ka-ilangan magpalista ya kadég na utaw magi sa sinsus. Ya suguꞌ yeiy pigbekkal adti kadakulaꞌ na kasakupan nan. 2 Yeiy ya tagnaꞌ na pagpasinsus. Aw nya-imoꞌ yeiy dengan na si Kuréniyo ya migdumala sa banwa na Sirya. 3 Yanagaw ya kadég na manga utaw migpansi-uliꞌ silan adti kanilan manga lunsud pada magpalista sa ngalan nilan.

4 Aw si José nyindeg uman lekat dun ni lunsud na Nazarit na sakup na Galiliya aw nyadtu ni Bétléhém na sakup na Judiya. Na, ya lunsud na Bétléhém, yan ya pigka͡utawan ni Dabid na hariꞌ asini muna. Yanagaw nyadtu si José kay buwadbuwad sakanan ni Dabid, 5 eped nan si Maria na kanan tawas na ka͡utawanan da, pada magpalista uman silan.

9 kay pig-uwangan da na Tyumanem ya dakulaꞌ na selat na un aku magpa-edeꞌ sa Madyaw na Ubat-ubat asini pangkay madég ya manga utaw na mig-ampang kanak.

10 Yanagaw miglong pa si Pilato kanan, "Anangaꞌ diliꞌ aku mu pagtubagen? Unu, walaꞌ mu kaꞌ ka-ede-i na awun katundanan ku magpaluwaꞌ kanmu? Aw awun uman katundanan ku magpakalabu kanmu adti krus." 11 Tyumubag si Jisus kanan, "Walaꞌ ya katundanan mu kanak kun walaꞌ kanmu atagan ya katundanan lekat adti tas na langit. Yanagaw ya utaw na miglimanda kanak, dakulaꞌ pa ya kanan salaꞌ kay sa kanmu."*