1 Aku si Judas na sugu-anen ni Jisu-Kristu, aw mangud uman ni Santiago.

Migsulat aku adti kadég mayu na pigtawag aw pigginawa͡an na Tyumanem na yan ya Ama, aw dayaw pigtamengan mendaꞌ sa paglikuꞌ ni Jisu-Kristu.

2 To-o pa galu kadugangan adti kamayu ya kanan kallat aw kalinaw aw ya pagginawa na Tyumanem.

3 Kay manga inulug na kanak pigginawa͡an, ya palpa ku asini sulat ku na pa-anenganeng kamayu ya pagpaluwaꞌ na Tyumanem sa kadég tadun na nyangintu-u la. Manang nya-uman ya anenganeng ku na ini baling ya ka-ilangan ku sulaten kamayu: Tibagsegi mayu na tamengan ya kamayu pagpangintu-u aw ya matinaw na palna-u na pigtaligu na Tyumanem adti kadég na mangintu-uway. 4 Kay dyengeg ku na awun manga utaw na mig-imoꞌ sa malatay na nyakaseled adti katipun mayu na walaꞌ kasalinapi. Pigbaluk nilan ya palna-u sa kallat na Tyumanem aw miglong baling silan na pigtumbay kunu adti utaw ya pag-imoꞌ sa to-o malatay. Manang ya manga utaw yeiy, pigsulat da dadan na manga propita na pa-emel-emelen silan na Tyumanem. Kay pigbalyaw nilan uman si Jisu-Kristu na kanaten Matas na Pangulu na migdumala sa kadég.

5 Na, pigpa-edeꞌ da kamayu alag na pigpaluwaꞌ na Tyumanem ya kadég na buwadbuwad ni Isra-él asini muna adti pagdumala na Ihiptu. Manang kaliman ku pa-anenganeng kamayu na madég kanilan ya nyatay magi sa pagamak na Tyumanem kanilan asuntu na walaꞌ silan pangintu-u.

6 Aw anenganenga mayu uman ya manga anghil asini muna. Ya eped kanilan walaꞌ tingen dun ni pigbetangan kanilan na Tyumanem aw nyatu silan baling kanan.* Yanagaw pig-eketan nan silan na sangkaliꞌ na diliꞌ magkabugtuꞌ aw pigkalabusu la silan dun ni banwa na to-o mangitngit mendaꞌ sa allaw na pag-ukum.

7 Aw diliꞌ mayu pagkalingawan ya kyagamakan na manga utaw dun ni Sodoma aw Gomora aw manga lunsud na nyakapalibed dun. Nyakasalaꞌ silan kay kaliman nilan magkasala-enen adti bekeꞌ na kanilan ka͡ubayan aw pangkay adti eped nilan na eseg. Ya atulun na pigpa-emel-emel na Tyumanem kanilan, yan ya pagpa-anenganeng sa utaw na mag-imoꞌ sa malatay, kay ya datengan nilan ya atulun na diliꞌ pagkapatayan.

8 Maynan uman ya manga utaw na mig-imoꞌ sa malatay na syumambuk dun ni manga katipun mayu. Awun kunu pigkitaꞌ nilan na kasiling na tagaynep, aw yan ya migdegdeg kanilan adti pagpakasalaꞌ dun ni kanilan pagka-utawun. Pigkele͡an nilan ya awun katundanan. Aw miglong silan sa malatay adti manga anghil.

9 Manang pangkay ya pangulu sa manga anghil na si Migél, walaꞌ sakanan pag-imoꞌ sa maynan. Asini muna sa pagkamatay ni Moysis, mig-ayil si Migél aw si Satanas kun singalan ya makatagtun sa lawas nan. Manang walaꞌ si Migél pag-ukum kanan aw piglongan nan oloꞌ, "Ya Tyumanem, yan ya magsagda kanmu!"

10 Manang ya manga utaw yeiy, pig-odoy-odoy nilan ya pangkay unu na walaꞌ nilan kalabeti. Kasiling silan na ayep na malyaw na diliꞌ mag-anenganeng sa un nilan imo-un, kay pigdalug nilan baling ya pagkaliman na kanilan lawas. Aw magi sa pigpan-imoꞌ nilan, dumateng adti kanilan ya pa-emel-emel na Tyumanem adti kamoliyan na allaw.

11 Malatay ya datengan na manga utaw yan! Kay pigdalug nilan ya malat na bet ni Cain.* Pigdalug nilan uman ya bet ni Bala-am* na to-o magkalim sa kuwalta. Aw kasiling silan uman ni Kora na miggagad sa manga eped nan na matu sa Tyumanem, aw nyapnas baling silan, aw maynan uman ya ma-imoꞌ sa manga utaw yeiy.*

12 Ya manga utaw yeiy na syumambuk adti kamayu katipun aw pangiyambung, kasiling silan na taping. Kay migpa-eyang silan baling kyuman aw nyinem. Aw walaꞌ ya kamulamula nilan! Kanilan pagka-utawun ya pag-olo-un nilan.

Kasiling silan uman na labun na pigtambel na mabandes na samet aw walaꞌ paka-ulan.

Aw kasiling silan uman na kawuy na walaꞌ pakabunga pangkay timpu na pagpamunga, nyalukat baling aw nyatay.

13 Kasiling silan uman na manga baled adti dagat na to-o masleg na dyumala sa madég na subuk, kay gayed pagkita-en ya imo-unun nilan na makamulamula͡ay.

Kasiling silan uman na manga bitun na awun ni langit na gayed magliku-likuꞌ na diliꞌ silan makagagad sa anenganeng na utaw.

Pigtagilanan silan na Tyumanem sa banwa na to-o mangitngit aw adtu nan silan betangan na walaꞌ ya tyamanan.

14 Aw si Inuk ya mig-ubat-ubat sa pigpa-edeꞌ dadan na Tyumanem sa ma-imoꞌ adti manga utaw yeiy. Na, si Inuk yan ya kapitu na alintuwad na buwadbuwad ni Adan. Aw miglong si Inuk, "Tanawa! Kyinitaꞌ ku ya pagdateng na kanaten Matas na Pangulu eped nan ya kanan manga anghil na matag pilammalalan 15 na un mag-ukum sa kadég na manga utaw. Aw pa-emel-emelen nan ya kadég na walaꞌ pangintu-u kanan, asuntu sa imo-unun nilan na malatay, aw asuntu uman sa tingeg nilan na malat adti kanan." 16 Aw ya manga utaw yeiy na syumambuk adti manga katipun mayu, ini ya bet nilan: Gayed silan magdiklamu aw magpaninaw sa ayil. Aw yan ya pagdalugun nilan ya pagkaliman na kanilan pagka-utawun. Magpatastas silan, aw matadeng silan magbulakbulak sa tingeg pada matuman ya kanilan pagkaliman.

17 Kay manga inulug na kanak pigginawa͡an, to-o mayu anenganenga ya piglong na manga apostolés ni Jisu-Kristu na kanaten Matas na Pangulu, 18 law nilan, "Sa kamoliyan na manga allaw, awun dumateng na manga utaw na mag-odoy-odoy kanaten asuntu sa pagpangintu-u tadun. Aw yan ya dalugun nilan ya malatay na pagkaliman na kanilan lawas."

19 Aw adun, awun da silan ni manga katipun mayu, aw asuntu kanilan matenga-tengaꞌ kamu. Yan oloꞌ ya kanilan pag-anenganengen ya asini tas na lupaꞌ, kay walaꞌ nilan tumbayan na meyaꞌ ya Ispiritu Santo dun ni seled nilan.

20 Manang kamu na pigginawa͡an ku, gayed mayu pakasaliga ya pagpangintu-u mayu dun ni kan Kristu. Aw adti pagpanawagtawag mayu adti Tyumanem, pagagadan mayu sa Ispiritu nan ya kamayu anenganeng. 21 Katingen kamu dun ni pagginawa na Tyumanem, talana mayu pigtagadan ya pigpakang nan na yan ya ginawa na walaꞌ ya katigkasan asuntu sa kallat na kanaten Matas na Pangulu na si Jisu-Kristu. 22 Tabangi mayu ya manga migduwaduwa kun unu ya umbaꞌ nilan pangintu-uwan. 23 Aw tabangi mayu uman ya manga eped pada makaluwaꞌ silan lekat adti pa-emel-emel na Tyumanem dun ni laga na atulun. Kallati mayu ya manga mig-imoꞌ sa malatay eped na pagkallek mayu sa Tyumanem. Pagkele͡an mayu ya malatay, aw magpakatanaw kamu pagaw katapunan kamu na manga salaꞌ nilan.

24 Aw adun, deyen tadun ya Tyumanem na mabatug kamu nan tamengan na diliꞌ kamu makasungkul adti pagpakasalaꞌ. Kay ya Tyumanem saba oloꞌ ya makapa-indeg kamayu dun ni asdangan nan na walaꞌ ya salaꞌ, aw apeten mayu ya kadyawan na Tyumanem. Aw dakulaꞌ to-o ya pagleya mayu dun ni allaw yan. 25 Naten deyen ya kanan ngalan, kay ya Tyumanem da oloꞌ ya kanaten Magpaluwa-ay magi sa Matas na Pangulu tadun na si Jisu-Kristu. Awun ni kanan ya matas na dengeg, aw ya kadyawan na pagka Tyumanem, aw ya kabagseg aw katulus na to-o matas. Aw alag yeiy walaꞌ ya maka-unawa pangkay lekat pa adti pagkalekat, aw adun, aw sa manga allaw na dumadateng pa na walaꞌ ya tyamanan! Amén.