1 Asini sulat ini pigsulat ya manga pigbukasan na Tyumanem adti kan Jisu-Kristu kun unu ya un dumateng adti kamoliyan na allaw. Aw alag yeiy maksay mangka-imoꞌ. Migsuguꞌ si Jisu-Kristu sa anghil na pa-edeꞌ nan kanak na kanan sugu-anen, pada pa-edeꞌ ku uman adti kadég na manga mangintu-uway na sugu-anen uman na Tyumanem. 2 Pa-edeꞌ ku ya kadég na pigkitaꞌ ku. Pigmatinaw ku ya manga un ma-imoꞌ na pigpa-edeꞌ na Tyumanem na pigmatinaw uman ni Jisu-Kristu. 3 Madyaw ya kana utaw na magbasa sa manga pigpa-edeꞌ na Tyumanem asini sulat ini. Aw madyaw uman ya kana manga utaw na magpakanyeg aw magbetang adti anenganeng nilan sa pigpa-edeꞌ asini, kay agpet da saba mangka-imoꞌ.

4 Aku si Juan na migsulat seiy adti manga mangintu-uway na migkatipun nyanimba dun ni pitu ya syudad na probinsiya na Asia. Padatengen galu adti kamayu ya grasya aw ya kalinaw na lyumekat adti Tyumanem aw Ispiritu Santo na awun ni asdangan na trunu nan.* Ya Tyumanem, gayed awun sakanan pangkay adun, aw pangkay asini muna, aw pangkay sa dumadateng pa. 5 Ya grasya aw kalinaw lyumekat saba uman adti kan Jisu-Kristu, na yan ya gayed migmatinaw sa Tyumanem. Si Jisus ya tagnaꞌ na nyataw lekat adti pagkamatay aw diliꞌ da sakanan salut matay. Aw yan ya magdumala sa kadég na manga hariꞌ asini tas na lupaꞌ. Naten deyen si Jisus kay pigpakitaꞌ nan ya kanan pagginawa kanaten dun ni pagtumbay nan sa kanan pagka-utawun na patayen, aw magi sa duguꞌ nan pigpaluwaꞌ da kitadun lekat adti manga salaꞌ tadun. 6 Aw pig-imoꞌ kitadun nan kasakupan na kanan pighari-an aw manga magdadugsu-ay pada makapalapit da kitadun adti Tyumanem na kanan Ama. Yanagaw naten deyen si Jisus aw pa-edeꞌ ya dengeg nan aw ya kanan katulus magdumala na walaꞌ ya tyamanan! Amén.

7 Pakanyegi mayu! Madi si Jisus na ka-agadan na manga labun,* aw kita-en sakanan na kadég na manga utaw, pangkay ya manga migkalabu kanan adti krus alag silan kumitaꞌ. Aw asuntu kanan, to-o magkalat ya ginawa na kadég na walaꞌ pangintu-u, aw magpansisugaw silan. Tengteng saba na ma-imoꞌ yeiy. Amén.

8 Aw miglong ya Tyumanem na migdumala sa kadég, "Aku ya Alpa aw ya Oméga. Aku ya lyekatan aw aku uman ya katigkasan." Kay ya Tyumanem, gayed awun sakanan pangkay adun aw pangkay asini muna, aw pangkay sa dumadateng pa.

9 Aku si Juan na kamayu inulug dun ni pagpangintu-u kan Jisu-Kristu. Nyaka-eped aku kamayu dun ni pagti-is sa pagpamulayam talana tadun migtagad na matuman ya paghariꞌ ni Jisus. Pigdakep aku aw pig-ated asini puluꞌ na Patmos asuntu sa pagpalna-u ku sa tingeg na Tyumanem aw sa pagmatinaw ku kan Jisu-Kristu. 10 Na, sambuk na allaw na Linggo, awun pigpakitaꞌ kanak na Ispiritu Santo kasiling na tagaynep, aw tigkan awun dyengeg ku na dakulaꞌ na tingeg apit adti bagakwang ku kasiling na uni na trumpita. 11 Aw miglong ya tingeg, "Sulata adti libru ya kadég na kita-en mu aw padala͡an adti manga mangintu-uway na migkatipun nyanimba dun ni pitu ya syudad. Yeiy ya syudad na Épéso, aw Ismirna, aw Pérgamo, aw Tiyatira, aw Sardis, aw Piladélpiya, aw La͡odiciya."

12 Aw lyumingiꞌ aku pada ka-ede-an ku kun singalan ya miglong kanak. Aw sa paglingiꞌ ku, awun kyinitaꞌ ku na pitu ya saleng na nyaka-indeg na alag bulawan. 13 Aw dun ni tenga-tengaꞌ na manga saleng, awun kyinitaꞌ ku na kasiling na utaw. Syumut sakanan sa matas na kadégkadég taman adti panagingting nan. Aw awun nyakasalay kanan na alag bulawan. 14 To-o maputiꞌ ya lugay nan. Aw ya mata nan kasiling na atulun na lyumaga. 15 Aw ya manga siki nan magsalinang kasiling na bronsi na bagu pigtu-ang. Aw ya tingeg nan kasiling na sagana na tubig. 16 Aw pig-awidan na kalintu nan ya pitu ya bitun. Aw ya paglong nan kasiling na lipang na to-o matalem. Aw ya kalalamdag na gya nan kasiling na sega na to-o syumilat.

17 Sa pag-inunu ku kanan, dayaw aku nyatuwad dun ni asdangan nan kasiling na utaw na nyatay da. Manang pigbetang nan adi kanak ya kalintu na palad nan aw miglong sakanan, "Diliꞌ kaw magkallek! Aku saba ya nyaka-una aw aku ya kamoliyan. 18 Aku ya awun ginawa na walaꞌ ya katigkasan. Tanawa! Pangkay nyatay aku idtu muna manang nyataw uman, aw diliꞌ da aku salut matay. Aku ya awun katundanan sa kamatayen aw sa banwa na Kaludukan. 19 Yanagaw sulata adun ya manga kyinitaꞌ mu, dala ya nya-imoꞌ adun aw ya un ma-imoꞌ uman adti kamoliyan. 20 Aw pa-edeꞌ ku kanmu ya kakawasan na manga kyinitaꞌ mu: Ya pitu ya bitun na pig-awidan na kalintu ku, yan ya pitu ya manga anghil na migtungguꞌ sa manga mangintu-uway na migkatipun nyanimba adti pitu ya syudad. Aw ya pitu ya salengan na alag bulawan, yan ya pitu ya syudad na pigkatipunan na manga mangintu-uway nyanimba.Ya pitu ya saleng na alag bulawan