1 Pagkatigkas yan, pigpakitaꞌ kanak na anghil ya tubig na to-o matinaw aw yan ya nyatag sa ginawa. Ya tubig yeiy, tyumugbul malapit adti trunu na Tyumanem aw Nati na Karniro, 2 aw nyilig dun ni tenga-tengaꞌ na dalan na syudad. Aw adti kada ligad na gangaꞌ na tubig yan, awun Kawuy na Maka-atag sa Ginawa. Kada bulan magpamunga sa sambuk na punganan na bunga, yanagaw sampuluꞌ tag duwa (12) ya punganan na bunga nan. Aw ya manga dawun, yan ya magpakaguliꞌ sa manga utaw adti manga nasud. 3 Aw dun ni syudad yan, walaꞌ da ya malatay na un pa-emel-emelen na Tyumanem. Awun saba ya trunu na pag-ingkudan na Tyumanem aw ya Nati na Karniro. Alag silan simba͡en na kadég na kanilan manga sugu-anen, 4 aw dun da nilan kita-a ya gya na Tyumanem, aw makasulat adti kanilan bayuꞌ ya ngalan nan. 5 Walaꞌ da ya gabi dun, aw diliꞌ da ka-ilangan ya saleng aw kalalamdag na sega kay ka-ilawan da silan na kalalamdag na Tyumanem. Aw magdumala silan kasiling na hariꞌ na walaꞌ ya tyamanan.

6 Aw miglong ya anghil kanak, "Ya kadég na dyengeg mu, alag kasaligan aw matinaw. Kay ya Tyumanem na mig-atag sa Ispiritu Santo adti manga propita nan, yan uman ya migsuguꞌ kanak pada pakitaꞌ adti manga sugu-anen nan kun unu ya un da dumateng."

7 Miglong si Jisus, "Pakanyegi aku! Agpet da aku lumikuꞌ. Yanagaw madyaw ya kana utaw na magbetang adti anenganeng nilan sa manga pigpa-edeꞌ na Tyumanem na nyakasulat asini libru ini."

8 Aku na si Juan ya kyumitaꞌ aw dyumengeg sa kadég yeiy. Aw pagkatigkas ku dengegen aw kita-en, lyumuhud aku dun ni asdangan na anghil pada magsimba galu kanan asuntu sa kadég na pigpakitaꞌ nan kanak. 9 Manang miglong ya anghil kanaken, "Diliꞌ kaw magsimba kanak! Oloꞌ aku sugu-anen kasiling mu aw kasiling na manga eped mu na propita, aw manga eped na mangintu-uway na dyumalug sa manga nyakasulat asini. Tyumanem saba oloꞌ ya umbaꞌ mu simba͡en!" 10 Aw miglong pa ya anghil kanak, "Diliꞌ mu pagtagu-un adti manga utaw ya manga ubat-ubat na pigpa-edeꞌ na Tyumanem asini libru ini kay agpet da mangka-imoꞌ ya kadég yeiy. 11 Ya manga utaw na mig-imoꞌ sa malatay, magpadeleg silan mag-imoꞌ sa malat. Aw ya manga mig-imoꞌ sa manga makamulamula͡ay, padelegen nilan uman ya kanilan pigpan-imoꞌ. Aw ya manga dyumalug sa pagkaliman na Tyumanem, aw ya manga utaw na malinis ya anenganeng, padelegen nilan ya pag-imoꞌ sa madyaw aw kenneꞌ na kalinis na anenganeng nilan."

12 Miglong si Jisus, "Pakanyegi mayu! Agpet da aku lumikuꞌ. Aw atagan ku ya tagsambuksambuk na utaw umbaꞌ sa pigpan-imoꞌ nan pangkay madyaw aw malat. 13 Aku ya Alpa aw ya Oméga, aku ya nyaka-una aw aku ya kamoliyan. Aku ya lyekatan aw aku uman ya katigkasan.""Pakanyegi mayu! Agpet da aku lumikuꞌ."

14 Madyaw ya kana manga utaw na migbugsak sa kanilan kadégkadég. Pigtumbay da kanilan ya kuman sa bunga na Kawuy na Maka-atag sa Ginawa. Aw pigtumbay uman kanilan na makaseled adti manga suwangan na syudad. 15 Manang adti luwaꞌ na syudad ya manga utaw na ya bet nilan kasiling na iduꞌ. Adti luwaꞌ uman ya manga talagamutan, aw ya manga magkasala-enen, aw ya manga magpatay sa eped, aw manga magsimba sa manga inutaw, aw ya kadég na magkalim maggaluꞌ.

16 Aw miglong uman si Jisus, "Aku ya migsuguꞌ sa kanak anghil na un magpa-edeꞌ sa kadég yeiy adti manga mangintu-uway na nyanimba dun ni kamayu manga banwa. Aku ya Buwadbuwad ni Dabid aw aku ya bitun na to-o magsiga na maselem."

17 Ya Ispiritu Santo aw ya manga mangintu-uway na pigpangugnan na Nati na Karniro, maglong silan, "Kadi kamu!" Aw ya manga utaw na dyumengeg sa pamilit nilan, ka-ilangan maglong uman adti manga eped, "Agad kamu!" Pangkay singalan ya pigtalaynem aw malim minem sa tubig na maka-atag sa ginawa, magpalapit sakanan aw maka-inem saba na walaꞌ ya bayad.

18 Na, paglongun ku ya kadég mayu na migpakanyeg sa manga pigpa-edeꞌ asini libru: Magpakatadeng kamu! Kun singalan ya magdugang adti pigpasulat asini, dugangan uman na Tyumanem ya pagamak kanan kasiling na pagamak na pigkasampetan asini libru ini. 19 Aw kun singalan ya mag-uwaꞌ sa pigpa-edeꞌ asini sulat ini, kamangen na Tyumanem ya kanan bagiꞌ adti bunga na Kawuy na Maka-atag sa Ginawa. Aw diliꞌ sakanan paseleden adti syudad na Tyumanem na pigkasampetan asini libru ini.

20 Si Jisus yan ya migmatinaw sa kadég na nyakasulat asini, aw miglong sakanan, "Matinaw saba na agpet da aku lumikuꞌ!" Amén.

Kay Jisus na kanami Matas na Pangulu, likuꞌ da kaw!

21 Ayin pa aku galu na awun gayed ni kadég na mangintu-uway ya grasya na lekat adti kan Jisus na kanaten Matas na Pangulu. Amén.