1 Pagkatigkas yan, kyumitaꞌ aku uman sa sambuk na anghil na nyanog lekat adti tas na langit. Dakulaꞌ ya katundanan na pig-atag kanan. Aw kya-ilawan ya kadakulaꞌ na banwa asuntu na nyinag sakanan. 2 Aw migtatawag sakanan sa dakulaꞌ na tingeg, law nan, "Walaꞌ da! Walaꞌ da ya Babiloniya na yan ya to-o dengganen na syudad asini tas na lupaꞌ. Nya-imoꞌ da eya-anan na manga busaw aw tagu-anan sa kadég na manga malatay na ispiritu, aw katipunanan na kadég na langgam na to-o malipaꞌ aw pagkele͡an na manga utaw. 3 Aw ya Babiloniya, nyabuyu nan ya kadég na nasud magi sa pagpa-inem nan sa kanan bino na yan ya paggagad nan kanilan adti imo-unun na to-o malatay. Aw migkasala-enen kanan ya madég na manga hariꞌ asini tas na lupaꞌ. Aw ya manga magbalikwatay nya-imoꞌ silan makabatug asuntu na to-o magkalim ya kanan manga utaw sa manga ka-unan na dakulaꞌ ya alagaꞌ."

4 Aw awun pa uman sambuk na dyengeg ku na tingeg na lyumekat adti tas na langit, law nan:

"Kamu na kanak manga utaw, luwaꞌ kamu dun ni syudad

pagaw makasambuk kamu adti manga salaꞌ na Babiloniya

aw pagaw maka-agad kamu uman sa un pagamak kanan.

5 Kay ya manga salaꞌ nan gayed da mig-ilantulantu mendaꞌ na syumangkuꞌ adti langit.

Aw diliꞌ ku kalingawan ya madég na pigpan-imoꞌ nan na malatay.

6 Imo-un adti kanan ya kasiling na pig-imoꞌ nan adti manga eped.

Kun unu ya pagpamulayam nan sa eped, dobliyen ya pamulayam kanan.

Aw to-o dakulaꞌ ya pagpa-emel-emel kanan.

7 Kun sangunu ya pagpatastas nan

aw ya kanan pagkamayaman aw ka-unan na dakulaꞌ ya alagaꞌ,

imo-un adti kanan ya umbaꞌ sa manga salaꞌ nan.

Yanagaw atagan sakanan na manga pagamak aw kakalatan na ginawa,

kay ya Babiloniya kasiling na ka͡ubayan na migpalibantug miglong adti anenganeng nan,

‘Aku ya rayna! Nyingkud aku adti kanak trunu na un magdumala.

Diliꞌ aku kasiling na balu na migkalat ya ginawa.’

8 Manang asuntu sa pagpalibantug nan, dumateng adti kanan ya madég na pagamak seled na sangallaw.

Lemenen nan ya kakalatan na ginawa aw kageteman aw ya pagkamatay nan.

Aw ya datengan nan ya masangab.

Kay to-o matulus ya Matas na Pangulu na yan ya Tyumanem na un mag-ukum kanan."

9 Aw ya manga hariꞌ asini tas na lupaꞌ, kita-en nilan adti mawat na mullut ya ebel na pagkasangab na Babiloniya. Aw magpansisugaw aw magpansi-ulangag silan asuntu sa kakalatan na ginawa nilan, kay nyakasambuk silan kanan adti pagkasala-enen aw pagkamayaman. 10 Magtandaw silan adti mawat kay mallek silan pagaw kasaban silan uman na pagpa-emel-emel. Aw maglong silan, "Syapadan! Syapadan ya syudad iyan na dengganen! Walaꞌ da ya katundanan mu kay Babiloniya! Seled na sangka-udas dyumateng da kanmu ya pag-ukum na Tyumanem."

11 Ya manga magbalikwatay magsasugaway aw mag-ulangag silan asuntu sa kakalatan na ginawa nilan. Kay walaꞌ da ya manga utaw na un mandata aw mambayad sa kanilan manga paninda. 12 Walaꞌ da ya un mayad sa manga bulawan, aw bulawan na maputiꞌ, aw manga batu na dakulaꞌ ya alagaꞌ, aw manga pérlas, aw téla na dakulaꞌ ya alagaꞌ, aw kadégkadég na tapel ya batek aw mapula, aw téla na pig-imoꞌ na sinulib na sida. Aw walaꞌ ya un mayad sa manga kawuy na to-o manimboꞌ, aw manga pametang na pig-imoꞌ lekat adti tangu na élipanti. Aw walaꞌ uman ya un mayad sa manga pametang na pig-imoꞌ lekat adti kawuy na dakulaꞌ ya alagaꞌ, aw bronsi, aw putaw, aw batu na to-o magsalinang. 13 Aw walaꞌ uman ya mayad sa sinamon, manga anagay, insénso, mira, uliban,* bino, mantikaꞌ aw lana na olibo, harina, aw trigu. Aw walaꞌ da uman ya un mayad sa manga baka, manga karniro, manga kudaꞌ, manga kalisa, aw pangkay manga utaw na un allangen. 14 Maglong ya manga magbalikwatay, "Ya kadég na pametang na kaliman galu na manga utaw tagtunun, nyalanas da baling. Aw ya kadég uman na manga mangkadyaw na nyatagtun na utaw, alag da nyalagak. Ya kadég yeiy, diliꞌ da kita-en salut!"

15 Aw ya manga magbalikwatay na migkayaman asuntu sa balikwat dun ni syudad yan, magsasugaway aw mag-ulangag silan adti mawat. Kay mallek silan pagaw maka-eped silan pa-emel-emelen na Tyumanem. Aw to-o magkalat ya ginawa nilan aw maglong silan, 16 "Syapadan! Syapadan ya syudad iyan na dengganen aw manga sakup nan. Pangkay ya syumut sa kadégkadég na to-o dakulaꞌ ya alagaꞌ, aw kadégkadég na tapel ya batek aw mapula, aw pangkay ya syumut sa manga pagkanaꞌ na bulawan, aw manga batu na dakulaꞌ ya alagaꞌ aw manga pérlas, 17 manang seled na sangka-udas, walaꞌ da ya kadég yan."

Aw ya manga kapitan na manga barko aw ya kanilan manga magtalabahuway aw ya kadég na syumakay, magtandaw uman adti mawat dala ya kadég na migtalabahu adti dagat sa pagkakamangan nilan. 18 Aw talana nilan magtandaw sa ebel na mullut lekat adti syudad, magsi-ulangag silan na maglong, "Walaꞌ ya maka-unawa sa syudad yan na matas ya dengeg!" 19 Aw sabugan nilan na kutu na lupaꞌ ya kanilan ulu asuntu sa kakalatan na ginawa nilan. Aw magpansisugaw silan aw maglong sa dakulaꞌ na tingeg, "Syapadan! Syapadan ya syudad iyan na dengganen! Migkamayaman ya kadég na manga tagtun sa barko, manang seled na sangka-udas migkalat ya kadég!"

20 Manang ya kadég mayu na awun ni tas na langit, pagleya kamu asuntu sa nya-imoꞌ sa syudad. Pagleya kamu uman na manga apostolés aw propita aw manga mangintu-uway kan Jisus. Kay pig-ukuman da na Tyumanem ya syudad aw ya manga sakup nan asuntu sa pig-imoꞌ nilan kamayu.

21 Pagkatigkas yan, awun anghil na to-o kesegan na nyulut sa dakulaꞌ na batu na kasiling na kabegat na gilingan sa harina. Aw buntugan nan adti dagat ya batu, aw law nan, "Kasiling na maynini ya ma-imoꞌ sa syudad na Babiloniya na to-o madengeg. Aw diliꞌ da kita-en ya syudad yan salut. 22 Aw diliꞌ da dengegen lekat adti syudad ya uni na manga arpa aw ya dalangan na manga utaw, aw maynan uman, diliꞌ da dengegen ya uni na manga plawta aw trumpita. Aw ya manga mag-imo-ay sa madég na punganan na manga pametang, diliꞌ da uman silan kita-en, aw diliꞌ da dengegen ya uyaget na manga gilingan dun ni seled na syudad. 23 Aw diliꞌ da uman kita-en ya siga na manga saleng. Aw diliꞌ da uman dengegen ya pagleya na bagu mangugnanay. Alag yeiy un ma-imoꞌ sa syudad asuntu na to-o migpalibantug ya manga magbalikwatay, kay magi sa manga talagamutan dun ni syudad kyagawayan baling ya kadég na nasud. 24 Aw bekeꞌ na yan da oloꞌ. Pigpa-emel-emel ya syudad yan asuntu na dun pataya ya manga propita na Tyumanem aw manga utaw na nyangintu-u kan Jisu-Kristu, aw ya kadég na pigpamatay asini kadakulaꞌ na banwa."