1 Aw pagkatigkas yan, kyumitaꞌ aku sa upat ya anghil: Ya sambuk nyindeg apit adti silatan, aw ya sambuk apit adti sallepan, aw ya duwa migdadipagay silan apit adti balabagan. Aw pigtagenan nilan ya samet pada diliꞌ tumambel asini tas na lupaꞌ aw adti dagat, aw adti pangkay unu na kawuy. 2 Aw tigkas yan, awun kyinitaꞌ ku na sambuk uman na anghil na apit adti silatan na nya-engat pasinan adti langit. Aw awun pigdala nan na un pagmarka sa manga utaw na Tyumanem na Gayed Awun. Aw pigtatawag nan ya upat ya anghil na pig-atagan na Tyumanem sa katundanan na un magkalat sa lupaꞌ aw sa dagat, 3 aw law nan kanilan, "Ya-i pa mayu pag-ilabeti ya lupaꞌ aw ya dagat aw ya manga kawuy. Tagadi pa na kamarka͡an naten una ya bayuꞌ na manga utaw na sugu-anen na Tyumanem." 4 Aw walaꞌ kadugay, pigdengeg ku na ya kadég na manga utaw na kyamarka͡an da, sanggatus aw kapatan tag upat kamalalan (144,000) na alag lekat adti buwadbuwad na manga mangayseꞌ ni Isra-él na eseg:

5 Sampuluꞌ tag duwa kamalalan (12,000) ya lekat adti manga buwadbuwad ni Juda,

sampuluꞌ tag duwa kamalalan (12,000) ya lekat adti buwadbuwad ni Rubin,

sampuluꞌ tag duwa kamalalan (12,000) ya lekat adti buwadbuwad ni Gad,

6 sampuluꞌ tag duwa kamalalan (12,000) ya lekat adti buwadbuwad ni Asyir,

sampuluꞌ tag duwa kamalalan (12,000) ya lekat adti buwadbuwad ni Naptali,

sampuluꞌ tag duwa kamalalan (12,000) ya lekat adti buwadbuwad ni Manasés,

7 sampuluꞌ tag duwa kamalalan (12,000) ya lekat adti buwadbuwad ni Simyon,

sampuluꞌ tag duwa kamalalan (12,000) ya lekat adti buwadbuwad ni Libi,

sampuluꞌ tag duwa kamalalan (12,000) ya lekat adti buwadbuwad ni Isakar,

8 sampuluꞌ tag duwa kamalalan (12,000) ya lekat adti buwadbuwad ni Zébulun,

sampuluꞌ tag duwa kamalalan (12,000) ya lekat adti buwadbuwad ni José,

aw sampuluꞌ tag duwa kamalalan (12,000) ya lekat adti buwadbuwad ni Bénjamin.

9 Pagkatigkas yan, awun kyinitaꞌ ku na madég to-o na manga utaw na diliꞌ mabatug iyapen. Aw pangkay unu ya tribu nilan, aw pangkay ayin silan na nasud paka-akup, aw kun unu ya punganan na tingeg na piglong nilan, alag silan nyan-indeg adti asdangan na trunu na Tyumanem aw asdangan na Nati na Karniro. Aw alag silan migkadégkadég sa maputiꞌ aw nyan-awid sa manga palwa na palma. 10 Aw miglong silan sa dakulaꞌ na tingeg: "Ya pagpaluwaꞌ kanaten lyumekat saba adti Tyumanem na yan ya nyingkud adti trunu aw lekat adti Nati na Karniro!" 11 Aw ya kadég na manga anghil, pigpalibedan nilan ya trunu aw ya kaluwa͡an tag upat (24) ya magdadumala͡ay, aw ya upat na sangkamuluꞌ na pig-imoꞌ na Tyumanem. Aw lyumuhud ya kadég na manga anghil adti asdangan na trunu aw pigsimba nilan ya Tyumanem. 12 Aw miglong silan, "Yeiy saba ya matinaw, ya kanaten Tyumanem yan oloꞌ ya umbaꞌ deyen. Matas ya kanan dengeg, aw umbaꞌ sakanan pasalamatan aw basa͡an. To-o dakulaꞌ ya kanan katadeng, aw to-o sakanan matulus aw mabagseg. Yanagaw naten deyen na walaꞌ ya tyamanan! Amén."

13 Aw tigkas yan, nyusip kanak ya sambuk na lekat adti kaluwa͡an tag upat (24) ya magdadumala͡ay, law nan, "Unu, nya-edeꞌ kaw kun singalan ya manga utaw yeiy na syumut sa mangkatas na kadégkadég na maputiꞌ? Aw ayin silan lekat na banwa?" 14 Aw tyumubag aku kanan, "Ikaw gya kay Sir ya nyaka-edeꞌ." Aw miglong sakanan kanak, "Ya manga mangintu-uway yeiy, nyati-is nilan ya to-o dakulaꞌ na kalugan. Pigbugsakan da nilan ya kanilan manga kadégkadég, aw magi sa duguꞌ na Nati na Karniro migkaputiꞌ da ya kadégkadég nilan. 15 Yanagaw nyan-indeg silan adti asdangan na trunu na Tyumanem. Allaw aw gabi gayed nilan pigsimba sakanan dun ni Témplo nan. Aw ya nyingkud dun ni trunu, yan ya migtameng kanilan. 16 Aw diliꞌ da silan magetem aw talaynemen, aw diliꞌ da silan to-o kapasu-an na sega. 17 Kay ya Nati na Karniro na awun ni trunu, yan ya magdiyaga kanilan. Aw yan ya mag-allad kanilan adti manga selep na gayed tyumugbul na nyatag sa ginawa na walaꞌ ya katigkasan. Aw dayaw na Tyumanem galisan ya manga luwaꞌ na mata nilan."