1 Pagkatigkas yan, awun dyengeg ku na tingeg na madég to-o na manga utaw adti tas na langit na miglong, "Deyen tadun ya Tyumanem! Deyen tadun ya Tyumanem na To-o Matulus! Kay pigpaluwaꞌ kitadun nan, aw umbaꞌ sakanan patasen. 2 Matinaw saba ya kanan pag-ukum aw umbaꞌ ya pagbayaꞌ nan. Pigpa-emel-emel nan ya syudad na dengganen kay kasiling na ka͡ubayan na to-o migkasala-enen aw miggagad uman sa madég na utaw. Aw pigmalitan da na Tyumanem ya manga sugu-anen nan na pigpatay." 3 Aw miglong da uman silan, "Deyen tadun ya Tyumanem! Aw mullut ya ebel na walaꞌ ya tyamanan lekat adti syudad yan." 4 Aw ya kaluwa͡an tag upat (24) ya magdadumala͡ay, aw ya upat ya sangkamuluꞌ na pig-imoꞌ na Tyumanem, alag silan lyumuhud adti asdangan na Tyumanem na nyingkud dun ni trunu aw migsimba silan kanan na miglong, "Deyen tadun ya Tyumanem! Amén!"

5 Pagkatigkas yan, awun dyengeg ku na tingeg na lyumekat apit adti trunu na miglong, "Deyenan ya kanaten Tyumanem, kadég mayu na sugu-anen nan na awun pagkallek kanan! Pangkay mangkalangkaw kamu aw pangkay tagituꞌ kamu, deyenan mayu ya kanaten Tyumanem." 6 Pagkatigkas yan, dyengeg ku uman ya tingeg na to-o madég na manga utaw na kasiling na sagana na tubig, aw kasiling uman na dalakalak, aw miglong silan, "Deyen tadun ya Tyumanem! Kay pighari-an da saba na kanaten Tyumanem ya kadég. 7 Naten magleya aw magdeyen kanan kay dyumateng da ya allaw na kasalen da ya Nati na Karniro, aw ya kanan pangugnanenen nyakatagilan da. 8 Pigkadégkadégan sakanan na maputiꞌ na walaꞌ ya taping." Na, ya kadégkadég nan na to-o maputiꞌ, yan ya pundinganan sa madyaw na manga pigpan-imoꞌ na manga mangintu-uway.

9 Pagkatigkas yan, migsuguꞌ ya anghil kanaken, law nan, "Sulata ya ini: ‘Madyaw ya kana manga utaw na pigpamilit adti kasal na Nati na Karniro.’ " Aw miglong pa uman ya anghil, "Ya manga tingeg yeiy alag matinaw kay yeiy ya piglong na Tyumanem." 10 Yanagaw lyumuhud aku adti asdangan na anghil na un ku galu simba͡en, manang piglongan aku nan, "Ya-i la! Oloꞌ aku sugu-anen kasiling mu aw manga eped na manga mangintu-uway na migpa-edeꞌ sa Madyaw na Ubat-ubat kan Jisus. Tyumanem oloꞌ ya umbaꞌ mu simba͡en." Kay ya matinaw na palna-u kun singalan si Jisus, yan uman ya pigpa-edeꞌ aw pigsulat na manga propita.

11 Pagkatigkas yan, kyinitaꞌ ku na kyabukasan ya langit. Aw sa pag-inunu ku, awun kudaꞌ na maputiꞌ. Aw ya syumakay pigtawag na Kasaligan aw Katinawan, kay alag saba matinaw ya pag-ukum nan aw ya pagtanam nan sa kanan manga po-on. 12 Ya manga mata nan kasiling na laga na atulun. Aw awun madég na korona adti ulu nan, aw nyakasulat dun ni kanan ya sambuk na ngalan na yan oloꞌ ya nya-edeꞌ. 13 Syumut sakanan sa kadégkadég na dadan da pig-elem adti duguꞌ. Ini ya ngalan na pagtawag kanan: Ya Tingeg na Tyumanem. 14 Aw gyumuyud kanan ya to-o madég na sundalu na lekat adti tas na langit. Syumakay uman silan sa kudaꞌ na maputiꞌ, aw syumut silan sa kadégkadég na to-o maputiꞌ aw walaꞌ ya taping. 15 Aw ya migma-una na pigguyudan nilan, ya tingeg nan kasiling na lipang na to-o matalem, aw yeiy ya un nan pagdeg sa manga nasud na nyatu kanan. Aw walaꞌ ya makadeg sa pagdumala nan. Pakitaꞌ nan ya kadaman na Tyumanem na migdumala sa kadég. Ya kadaman yeiy, kasiling na migpigis sa manga bunga na paras. 16 Dun ni kadégkadég na pigsut nan aw adti pud nan awun nyakasulat: "Ya Hariꞌ sa kadég na manga hariꞌ aw Matas na Pangulu sa kadég na manga pangulu."

17 Aw tigkas yan, kyumitaꞌ aku sa sambuk na anghil na nyindeg dun ni pagsilatan na sega. Aw migtatawag sakanan sa dakulaꞌ na tingeg adti kadég na maglupad dun ni dalem na langit, law nan, "Panamal da kamu pada makatambung kamu sa dakulaꞌ na kakan na pigtagilan da na Tyumanem! 18 Pangkana mayu ya unud na lawas na manga hariꞌ aw manga hénéral aw sundalu nilan, aw ya unud na lawas na manga kudaꞌ dala ya manga syumakay, pangkay ya manga allang aw bekeꞌ na allang, aw pangkay tagituꞌ aw mangkalangkaw."

19 Pagkatigkas yan, kyinitaꞌ ku ya tagnaꞌ na ayep na to-o kallekanan, aw ya manga hariꞌ na migdumala asini tas na lupaꞌ na dyumalug kanan. Aw pigpantipun nilan ya kanilan manga sundalu pada tanamen nilan ya syumakay sa maputiꞌ na kudaꞌ aw manga eped nan na lekat adti tas na langit. 20 Aw nyadakep ya tagnaꞌ na ayep. Aw nyadakep uman ya propita na galu-un na gayed miggaway sa madég na manga utaw magi sa manga pangilala. Magi sa pig-imoꞌ nan yeiy, nyagagad nan ya manga utaw na dyumawat sa marka na tagnaꞌ na ayep aw pigsimba nilan ya kanan inutaw. Aw ya duwa yeiy pig-agbel silan adti danaw na atulun na asupri na utaw pa. 21 Aw ya nyasamaꞌ na manga eped nilan, nyabus uman pigpamatay. Kay ya syumakay sa kudaꞌ na maputiꞌ, yan ya mig-apnas kanilan magi sa tingeg nan na kasiling na lipang. Aw pyantubug na manga langgam ya lawas na manga nyangkamatay aw pyasungkuꞌ nilan ya pagkan.