1 Pagkatigkas yan, awun pa uman kyinitaꞌ ku: Ya Nati na Karniro nyindeg adti tas na Buntud na Ziyon. Aw awun manga eped nan na sanggatus aw kapatan tag upat kamalalan (144,000) ya manga utaw. Aw nyakasulat dun ni kanilan manga bayuꞌ ya ngalan na Nati na Karniro aw ya ngalan na kanan Ama. 2 Aw dyumengeg aku sa tingeg na lyumekat adti tas na langit na kasiling na sagana na tubig, aw kasiling uman na dalakalak, aw kasiling uman na uni na madég na manga arpa. 3 Aw ya sanggatus aw kapatan tag upat kamalalan (144,000) migdalangan silan adti asdangan na trunu na Tyumanem aw adti upat ya sangkamuluꞌ na pig-imoꞌ na Tyumanem, aw adti manga magdadumala͡ay. Aw yan ya pigdalangan nilan ya bagu na dalangan na silan oloꞌ ya nyaka-edeꞌ sa kakawasan kay piglekat silan ni Jisus. 4 Ya manga utaw yeiy, walaꞌ silan kalipa-i aw migpadeleg dyumalug sa pagkaliman na Tyumanem. Kasiling silan na eseg na walaꞌ pagkasala-enen adti eped na ka͡ubayan. Pigdalug nilan baling ya Nati na Karniro pangkay ayin kadtu, kay piglekat da silan lekat adti manga utaw asini tas na lupaꞌ. Kasiling silan na tagnaꞌ na bunga na pig-ani na pigdugsuꞌ adti Tyumanem aw adti Nati na Karniro. 5 Aw walaꞌ ya piglong nilan na galuꞌ, aw walaꞌ ya pagsalaꞌ sa bet nilan.

6 Pagkatigkas yan, kyumitaꞌ aku sa sambuk uman na anghil na lyumupad dun ni dalem na langit. Aw dyala nan ya Madyaw na Ubat-ubat na walaꞌ ya pagka-uman. Aw pigpa-edeꞌ nan yeiy adti kadég na manga utaw na asini tas na lupaꞌ, pangkay unu ya kanilan tribu, aw pangkay ayin silan na nasud paka-akup, aw kun unu ya punganan na tingeg na piglong nilan. 7 Aw miglong ya anghil adti kanilan sa dakulaꞌ na tingeg, "Kalleki mayu ya Tyumanem aw deyenan mayu sakanan! Kay dyumateng da ya udas na kanan pag-ukum. Simba͡en mayu sakanan, kay yan ya mig-imoꞌ sa langit aw sa kadakulaꞌ na banwa, aw sa dagat, aw sa manga tyugbulan na tubig."

8 Pagkatigkas yan, dyumalug ya sambuk na anghil sa nyaka-una. Aw miglong sakanan, "Walaꞌ da! Walaꞌ da ya Babiloniya na yan ya to-o dengganen na syudad asini tas na lupaꞌ. Pigpa-emel-emel da sakanan kay madég ya nasud na pigpa-inem nan sa kanan bino na yan ya paggagad nan kanilan adti imo-unun na to-o malatay."

9 Aw awun uman dyumalug na katlu na anghil aw miglong sakanan sa dakulaꞌ na tingeg, "Pangkay singalan ya magsimba sa tagnaꞌ na ayep aw sa kanan inutaw aw dumawat sa marka nan adti kanan bayuꞌ, aw kun walaꞌ yan, adti kanan kamaw, 10 pa-inem saba kanan ya inemenen na mabulut na awun ni tabuꞌ na walaꞌ ya nyakadaliꞌ na yan ya kadaman na Tyumanem. Magti-is ya utaw yan dun ni atulun aw asupri. Aw ya pagti-is nan bantayan na manga anghil na Tyumanem aw Nati na Karniro. 11 Asuntu sa pagsimba na manga utaw sa tagnaꞌ na ayep aw kanan inutaw, aw asuntu uman sa pagdawat nilan sa marka na kanan ngalan, yanagaw allaw aw gabi gayed silan magti-is. Aw ya ebel na lekat adti laga na atulun na magpati-is kanilan, gayed mullut adti tas na walaꞌ ya tyamanan."

12 Yanagaw, kadég mayu na mangintu-uway, padelega mayu ya pagpangintu-u kan Jisu-Kristu aw ya pagdalug sa manga suguꞌ na Tyumanem, aw ti-isa mayu ya manga kalugan.

13 Na, awun uman dyengeg ku na tingeg lekat adti tas na langit, law nan, "Sulata ya ini: ‘Lekat adun, madyaw ya kana manga utaw na matay dun ni pagpangintu-u sa Matas na Pangulu tadun na si Jisus.’ " Aw miglong ya Ispiritu Santo, "Matinaw saba na makalagdeng da silan lekat adti kanilan manga imo-unun, kay ya madyaw na bunga na pigpan-imoꞌ nilan diliꞌ saba kalingawan."

14 Pagkatigkas yan, awun kyinitaꞌ ku uman na labun na maputiꞌ, aw nyingkud dun ya kasiling na utaw. Awun korona na bulawan adti ulu nan, aw nyawid sakanan sa to-o matalem na gagalab. 15 Aw awun uman anghil na lyumuwaꞌ lekat adti Témplo na awun ni tas na langit, aw migtatawag sakanan sa dakulaꞌ na tingeg adti nyingkud dun ni labun, law nan, "Dyumateng da ya udas na pag-ani! Galaba la ya aniyenen na awun ni tas na lupaꞌ kay nyangka-inug da." 16 Yanagaw ya nyingkud dun ni labun, piggalab nan ya aniyenen dun ni tas na lupaꞌ.

17 Tigkas yan, awun uman sambuk na anghil na lyumuwaꞌ lekat adti Témplo na awun ni tas na langit. Aw nyawid uman sakanan sa to-o matalem na gagalab.

18 Aw awun pa uman anghil na lyumuwaꞌ lekat adti tampid na sunuganan sa insénso. Yeiy ya pigtaliguwan sa atulun. Aw migtatawag sakanan sa dakulaꞌ na tingeg adti eped nan na nyawid sa gagalab na to-o matalem, law nan, "Dala͡a ya kanmu gagalab adti tas na lupaꞌ aw galaba ya manga bunga na paras aw panimuna, kay nyangka-inug da." 19 Yanagaw piggalab na anghil ya manga bunga na paras. Aw pigpanimun nan ya manga bunga lekat adti parasan, aw pig-asag adti to-o dakulaꞌ na pigisanan. Aw ya pagpigis sa bunga na paras, yan ya pundinganan sa kadaman na Tyumanem adti manga utaw na walaꞌ pangintu-u. 20 Na, ya pigisanan sa bunga na paras, apit adti luwaꞌ na syudad. Aw sa pagpatagunaꞌ sa paras, awun duguꞌ na lyumuwaꞌ, aw ya kalalem na duguꞌ taman na kakang na kudaꞌ. Aw ya kalawig na pig-iligan na duguꞌ, tulunggatus (300) ka kilomitro.