1 Pagkatigkas yan, awun kyinitaꞌ ku na anghil na nyanog lekat adti tas na langit. Aw pig-awidan nan ya lyabi sa sab na gawang na walaꞌ ya katantanan. Aw dyumala uman sa dakulaꞌ na sangkaliꞌ. 2 Aw pigdakep na anghil ya dakulaꞌ na ulud. Pig-eketan nan na sangkaliꞌ pada diliꞌ kabuliyan seled na sammalalan (1,000) ka umay. Na, ya ulud yeiy, yan ya Busaw na si Satanas na miggaway sa manga utaw asini muna. 3 Pagkatigkas yan, pig-ulug sakanan na anghil adti gawang na walaꞌ ya katantanan. Aw pigbalagsangan nan ya sab na gawang aw pangilalayi nan pada walaꞌ ya makabukas. Pig-imoꞌ yeiy pada diliꞌ da ni Satanas kagawayan ya manga nasud na manga utaw mendaꞌ na matigkas ya sammalalan (1,000) ka umay aw tigkas yan buliyan sakanan na diliꞌ to-o madugay.

4 Aw awun uman kyinitaꞌ ku na madég na manga ingkudanan, aw ya manga nyan-ingkud dun, pigtumbay kanilan ya pag-ukum. Kyinitaꞌ ku uman ya kalaluwa na manga mangintu-uway na pyan-utudan sa liyeg asuntu sa pagpa-edeꞌ nilan sa Madyaw na Ubat-ubat kan Jisus aw sa tingeg na Tyumanem, aw asuntu uman na walaꞌ nilan simba͡a ya tagnaꞌ na ayep aw ya kanan inutaw, aw walaꞌ nilan dawata ya marka nan adti kanilan lawas. Aw pigmataw silan na un maghariꞌ eped ni Kristu seled na sammalalan (1,000) ka umay. 5 Aw yeiy ya tagnaꞌ na pagmataw. Manang ya manga eped na nyangkamatay, diliꞌ pa silan matawun mendaꞌ na matigkas ya sammalalan (1,000) ka umay. 6 Madyaw ya kana manga mangintu-uway na maka-eped sa tagnaꞌ na pagkataw. Kay ya kadwa na pagkamatay walaꞌ da ya katundanan adti kanilan. Pigtani la silan na un ma-imoꞌ magdadugsu-ay na manga utaw adti Tyumanem aw kan Kristu, aw un silan maghariꞌ eped ni Kristu seled na sammalalan (1,000) ka umay.

7 Na, pagkatigkas da na sammalalan (1,000) ka umay, paluwa-en si Satanas lekat adti pigkalabusuwan kanan 8 aw madtu sakanan na un pa nan gawayan ya kadég na manga nasud asini tas na lupaꞌ na yan ya pigtawag na Gog aw Magog. Tipunun nan ya manga sundalu nilan pada mag-imoꞌ silan sa dakulaꞌ na tanam. To-o madég silan, kasiling na pantad dun ni dagat na diliꞌ ma-iyap. 9 Aw manaw silan lekat adti manga banwa nilan, aw madtu silan ni syudad na pigginawa͡an na Tyumanem aw libedan nilan ya pigkampuwan na kanan manga utaw. Manang apnasen silan na Tyumanem magi sa atulun na lekat adti tas na langit. 10 Aw si Satanas na miggaway kanilan, agbel sakanan adti danaw na atulun na asupri na pig-agbelan dadan sa tagnaꞌ na ayep aw propita na galu-un. Aw walaꞌ ya katigkasan na pagpati-is kanilan, pangkay allaw aw gabi.

11 Pagkatigkas yan, awun kyinitaꞌ ku na to-o dakulaꞌ na trunu na maputiꞌ, aw ya nyingkud dun yan ya un mag-ukum. Aw ya langit aw lupaꞌ nyalanas da lekat adti kanan aw diliꞌ da kita-en salut. 12 Aw kyinitaꞌ ku ya manga nyangkamatay na nyataw da, dala alag ya manga mangkalangkaw aw manga tagituꞌ, aw nyindeg silan dun ni asdangan na trunu. Aw pig-ulad ya manga libru, dala ya sambuk na libru na pigsulatan sa ngalan na manga utaw na nyakatagtun sa ginawa na walaꞌ ya katigkasan. Aw pig-ukuman ya manga nyangkamatay umbaꞌ sa manga pig-imoꞌ nilan na alag nyakasulat adti manga libru. 13 Ya kadég na awun ni banwa na Kaludukan dala ya nyatay dun ni dagat aw adti lupaꞌ, alag silan pigtipun adti asdangan na Tyumanem aw pig-ukuman umbaꞌ sa manga pigpan-imoꞌ nilan. 14 Pagkatigkas yan, ya Kamatayen aw ya banwa na Kaludukan, alag pig-agbel adti danaw na atulun. Yeiy da ya kadwa na pagkamatay. 15 Aw pangkay singalan ya walaꞌ ya ngalan nan dun ni libru na pigsulatan sa manga nyakatagtun sa ginawa na walaꞌ ya katigkasan, agbel sakanan adti danaw na atulun.