1 "Sulata ya ini adti anghil na migtungguꞌ sa manga mangintu-uway na nyanimba adti syudad na Sardis: ‘Asini kanak ya Ispiritu Santo, aw aku ya nyawid sa pitu ya bitun. Aw ini ya un ku paglongun kamayu: Nya-edeꞌ aku sa kamayu manga imo-unun. Matas saba ya dengeg mayu adti manga eped na manga mangintu-uway, aw miglong silan na masalig da ya kamayu pagpangintu-u. Manang ya tengteng matinaw kasiling kamu na nyatay da. 2 Yanagaw pagmata kamu! Aw pakasaliga ya pagpangintu-u mayu na un da malagak. Kay kyinitaꞌ ku na walaꞌ pa kalingeb ya manga imo-unun na pig-atag kamayu na Tyumanem na kanak Ama. Agpet da matay ya pagpangintu-u mayu. 3 Anenganenga ya palna-u na dyengeg mayu idtu muna na pigdawat mayu. Pagselsel kamu aw daluga mayu! Kun diliꞌ kamu magmata, kawunan ta kamu kasiling na matakaw na diliꞌ mayu pag-imanmanen. 4 Manang awun pa manga eped kamayu dun ni Sardis na walaꞌ pag-imoꞌ sa malatay. Kasiling silan na utaw na walaꞌ katapingi ya kanilan kadégkadég. Aw silan ya umbaꞌ maka-iyeped kanak na sumut sa kadégkadég na maputiꞌ. 5 Ya utaw na dumeg sa malatay, yeiy ya un ku pasutun sa kadégkadég na maputiꞌ. Aw diliꞌ ku papasen ya ngalan nan dun ni libru na pigsulatan sa ngalan na manga nyakatagtun sa ginawa na walaꞌ ya katigkasan. Aw aku ya magmatinaw kanan adti asdangan na kanak Ama aw adti kanan manga anghil.

6 " ‘Yanagaw, kamu na migpakanyeg, ka-ilangan kalabetan mayu ya piglong na Ispiritu Santo adti kadég mayu na manga mangintu-uway.’

7 "Sulata ya ini adti anghil na migtungguꞌ sa manga mangintu-uway na nyanimba adti syudad na Piladélpiya: ‘Aku ya tengteng matinaw aw asini kanak walaꞌ ya salaꞌ. Aku ya nyawid sa lyabi ni Dabid, aw kun unu ya pig-uwangan ku, walaꞌ ya un makatakep, aw kun unu ya pigtakep ku, walaꞌ ya un maka-uwang. Aw ini ya un ku paglongun kamayu: 8 Nya-edeꞌ aku sa manga imo-unun mayu. Nya-edeꞌ aku uman na kamu na manga mangintu-uway dun, pangkay diliꞌ kamu to-o dengganen kay tabay kamu, manang kenneꞌ mayu pigdalug ya palna-u ku, aw walaꞌ mayu balyawan ya kanak ngalan. Tanawa! Awun suwangan na pig-uwangan ku kamayu, aw walaꞌ ya pangkay singalan na makatakep. 9 Aw pakanyegi mayu ya un ku paglongun: Padalemen ku ya manga Judiyu na nyaka-akup da adti pagdumala ni Satanas. Pangkay Judiyu ya tyugbulan nilan, manang bekeꞌ na matinaw ya kanilan piglong. Paduludun ku silan kamayu, aw papangillupungun ku silan adti asdangan mayu. Aw ka-ede-an nilan na pigginawa͡an ku kamu. 10 Dumateng saba ya allaw na manga kalugan pada tanda-en ya kadég na utaw dun ni tas na lupaꞌ magi sa manga pagti-is. Aw asuntu na pigdalug mayu ya suguꞌ ku aw nyati-is mayu ya manga pamulayam aw kalugan, yanagaw tamengan ta kamu. 11 Agpet da aku lumikuꞌ. Tibagsegi na magpadeleg ya kasalig na pagpangintu-u mayu kanak, pada walaꞌ ya maka-agaw sa korona mayu. 12 Ya utaw na dumeg sa malatay, imo-un ku sakanan aligi na walaꞌ ya tyamanan adti eya-anan na kanak Ama na yan ya Tyumanem. Aw pangilala͡an ku sakanan sa ngalan na Tyumanem na yan ya kanak Ama aw ya ngalan na kanan syudad na bagu na Jérusalim na un nan papanogun lekat adti tas na langit. Aw pangilala͡an ku uman sakanan sa bagu na ngalan ku.

13 " ‘Yanagaw, kamu na migpakanyeg, ka-ilangan kalabetan mayu ya piglong na Ispiritu Santo adti kadég mayu na manga mangintu-uway.’

14 "Sulata ya ini adti anghil na migtungguꞌ sa manga mangintu-uway na nyanimba adti syudad na La͡odiciya: ‘Aku ya pigtawag na Amén kay aku ya kasaligan, aw matinaw ya piglong ku. Aku ya lyekatan sa kadég na pig-imoꞌ na Tyumanem. Aw ini ya un ku paglongun kamayu: 15 Nya-edeꞌ aku sa manga imo-unun mayu. Walaꞌ kamu atu kanak, manang walaꞌ mayu tibagsegi ya pagdalug kanak. Kasiling kamu na tubig na manimullaw na diliꞌ manikiꞌ aw diliꞌ uman mapasuꞌ. Madyaw pa kun manikiꞌ kaw aw kun bekeꞌ yan mapasuꞌ baling. 16 Manang asuntu na diliꞌ kamu manikiꞌ aw diliꞌ kamu uman mapasuꞌ, agpet da ta kamu kele͡an, kasiling na utaw na migduppu sa tubig na malat ya nanam. 17 Miglong kamu, "Makabatug kami aw mayaman da. Walaꞌ da ya pigkapelek nami." Manang walaꞌ mayu kalabeti ya tengteng matinaw na adti Tyumanem to-o kamu makalalat, aw walaꞌ ya pagkamangan mayu, aw buta kamu, aw kasiling kamu na utaw na walaꞌ da ya un nan sutun na kadégkadég. 18 Yanagaw palna-uwan ta kamu: Adi kamu oloꞌ ni kanak bayad sa tengteng na bulawan pada ma-imoꞌ kamu mayaman. Aw adi kamu oloꞌ ni kanak bayad sa kadégkadég na maputiꞌ na un mayu sutun pada diliꞌ kamu mamulamula. Aw mayad kamu uman adi kanak sa babulung sa manga mata mayu pada mabangal da mayu kun unu ya tengteng matinaw. 19 Ya kadég na manga mangintu-uway na to-o ku pigginawa͡an, gayed ku silan pigsagda aw pagpitulun. Yanagaw pagselsel kamu aw pakabagsega ya kamayu pagpangintu-u. 20 Pakanyegi! Nyindeg aku asini gisakan aw migtatawag aku, "Ini aku!" Pangkay singalan ya dumengeg sa tatawag ku aw uwangan nan ya tatakep na suwangan, sumeled aku saba aw sumalu aku kanan kuman. 21 Ya utaw na dumeg sa malatay, pa-ingkudun ku sakanan adti tampid na trunu ku, kasiling ku na dyumeg kan Satanas aw pigpa-ingkud aku na Ama ku dun ni tampid na trunu nan."Pakanyegi! Nyindeg aku asini gisakan aw migtatawag aku."

22 " ‘Yanagaw, kamu na migpakanyeg, ka-ilangan kalabetan mayu ya piglong na Ispiritu Santo adti kadég mayu na manga mangintu-uway.’ "