Legalidades

A djï əpʉ ama əgbro azü əgɔ

1 Azü nɔ̂ djï əpʉ ama əgbro azü əgɔ, mbrə ə̂në əpʉ ngerə nɔ̂ to mâ ndə Ndjapä â wutu, â əgbro azü əgɔ nɔ̂, Ndjapä kə kô əndje tə alayïngerə kɔ. 2 Âdârə ə̂në əzü ə̂në tshə wəra tə̂ ye ndə kə pa tshə dji əpʉ ama əgbro azü əgɔ, tshə wəra tə̂ ye tə̂ ərə ə̂në Ndjapä mbrə̂ də äwänə kɔ gâ ye. Â azü ə̂në əndje sə kə wəra tə̂ əndje tə̂ əgbro azü nə kɔ, əndje sə kə e ngbanga gâ pâ əndje də ə̂tə̂ əndje. 3 Ə də̂ mbrə ə̂rɔ̂ kə mbrə ərə də̂ awa əgbro azü əgɔ ə mbrə azü ne; bale mbrə əmbrʉ kə mbrə ərə də̂ awa əndje sə kə mbrə azü. Bə yində nə ə pa rawa əgbro azü əgɔ mbrə əbə mbrə ne a? Mbrə ə̂rɔ̂ ərə, əgbro azü əgɔ nə sə kə yində ə̂rɔ̂ ərə nə ə̂në bə mbrə kɔ. 4 Əgbro azü əgɔ sə tə alayïkosəra nə̂ Ndjapä ndə kə pa əndje yisə̂ äwä ə̂rɔ̂ ərə kə əbə. Bale, kədə bə mbrə əmbrʉ ərə, awa mbrə̈ əbə. Mbrə ə̂në ə də̂ tə ambanə də̂ əndje wa ngbanga kɔ ne. Əndje sə tə alayïkosəra nə̂ Ndjapä nə ndə kə pa əndje yisə̂ əkɔ nə̂ Ndjapä nə gashu ə wa ngbanga gâ pâ əzü ə̂në tshə sə kə mbrə əmbrʉ ərə kɔ. 5 Rəkɔ, ə lï ndə kə pa əzü dji əpʉ ama əgbro azü əgɔ, ə də̂ kʉ mbrə awa ngbanga nə də̂ ne, bale mbrə ə̂në, lə akrɔ əzü ə sə ndje tə ərə ə̂në ə sə də äwänə.

6 Mbrə nə ndje də̂ e piyi lapɔ kɔ. Mbrə ə̂në aaworɔ ngendja lapɔ nə sə tə alayïkosəra nə̂ Ndjapä, alɔ ə̂në əndje sə kə mbrə kosəra nə kɔ. 7 E kö aərə ə̂në ə lï ndə kə pa e ko kə azü kɔ, kə azü nə: e pïyi lapɔ kə alayïlapɔ nə, ə pïyi ngendja alabə̈ aərə kə piyi nə kə alayïnga nə, ə kpë rawa azü ə̂në e lï ndə kə pa e kpe rawa əndje kɔ, ə lʉ̈ azü ə̂në e lï ndə kə pa e lʉ əndje kɔ.

Kə yində angâ zə sə tə kə mbrə ndəma âgbɔ̂ əpʉ nə̂ Ndjapä

8 Ködä ə̈bə̈ ərə bale nə̂ ə̈bə̈ əzü sə̈ sə̈ lə kumu e ne, kʉtə̂ ködä kə yi tə̂ e lə takpa tə̂ e ka ə sə lə kumu e. Mbrə ə̂në əzü ə̂në tshə yində angâ nə, tshə mbrə̂ ndəma âgbɔ̂ əpʉ nɔ̂ gâ ye.

12 E mbrə̈ tə̂ e də äwänə lə takpa tə̂ azü ə̂në əndje wusə̂ Ndjapä wu ne kɔ, ndə kə pa, ə̂në əndje sə kə lea e ə pa e sə kə mbrə əmbrʉ ərə kɔ, əndje wu aə̂rɔ̂ aərə ə̂në e sə kə mbrə nə kɔ ka ə mbe Ndjapä tə̂ alɔ ə̂në tshə sə kə yi kumu ye.

13 Mbrə Âgbɔ̂ Əyïngerə, e djï əpʉ ama əgbro azü əgɔ nɔ̂, e djï əpʉ ama əyïngerə əgɔ, ə̂në tshə sə gâ pâ azü nɔ̂ kɔ, 14 ə djï ndje əpʉ ama akomandâ əgɔ ə̂në əyïngerə nə wlâ əndje ndə kə wa ngbanga gâ pâ azü ə̂në əndje sə kə mbrə əmbrʉ ərə kɔ, bale ndə kə tra azü ə̂në əndje sə kə mbrə ə̂rɔ̂ ərə kɔ.

17 Pä kə ä, bə wu ənə̂ zə atâ: âgbɔ̂ əpʉ zâ äwä kə ä ndə kə pa ä piyi lapɔ kə Sezarə, âgbɔ̂ əyïngerə əgɔ Rɔmə wala ə zâ äwä nə zâ kə ä ne a?»

18 Bale, Jezu wûsə̂ əmbrʉ ərə ə̂në ə sə̂ tə̂ lɔsu əndje kɔ, kîrə əpʉ ə pa: «E-e, alayïama bishi, e yində kə le əmə ə le mbrə yekɔ? 19 E mä ə̈bə̈ ngbengewle ngendja ə̂në e sə kə piyi də lapɔ nə kɔ mə wu!» Əndje mâ ə̈bə̈ ngbengewle ngendja kə ətshə. 20 Â tshə yû əndje ə pa: «Tshitshi əde də əɨrɨ əde kə sə̂ la nə kɔ?» 21 Əndje kîrə əpʉ kə ətshə ə pa: «Ənə̂ Sezarə.» Bale, tshə pâ kə əndje ə pa: «Rəkɔ, e kö aərə ə̂në ə sə tə ənə̂ Sezarə kɔ kə Sezarə, ə kö aərə ə̂në ə sə tə ənə̂ Ndjapä kɔ kə Ndjapä.»

Jezu də Piarə pîyi lapɔ Anda Ndjapä

24 Alɔ ə̂në Jezu də atrawaya nə̂ ye yî kumu əndje mâ Kaprənayɔmə kɔ, aaworɔ ngendja lapɔ Anda Ndjapä nâ gâ ngotə̂ Piarə ə yû ətshə ə pa: «Awoyisə̂ ərə nə̂ e sə sə kə piyi lapɔ Anda Ndjapä nə ne a?» 25 Piarə nə kîrə əpʉ ə pa: «Ayî, tshə sə kə piyi nə.»

Alɔ ə̂në Piarə nə nâ ə lî gâ lə anda gâ ye kɔ, Jezu zâ əpʉ angbʉlînə ə pâ: «Shemɔ, mâ tə̂ lɔsu zə, əde kə lï ndə kə piyi lapɔ kə alayïngerə tshepashɔ səye? Azü əgɔ nə̂ əndje wala atshângâ a?» 26 Piarə nə kîrə əpʉ ə pa: «Atshângâ.» Jezu pâ kə ətshə ə pa: «Rəkɔ, azü əgɔ nə lï lï ndə kə piyi nə ne. 27 Bale, ndə kə pa tshelə əndje ko əndje ko tə̂ əzə̂ ne, nä mâ ala dala ə̂ngû ə wlï yangɔ. Əlî giangû ə̂në bə sə kə za ətshə kɔ, ä tshelə ama ye, bə sə kə sɔtə̂ ngendja. Zä ə pïyi lapɔ nə lə kumu əzə̂ də aəmə kə əndje.»

25 «Alɔ ə̂në bə sə də əpʉ də ə̈bə̈ əzü â tshə sə kə na də əbə gâ ətshi alayïngbanga, prä äwä katshä ndə kə pa e dji tə̂ e də ətshə pə lə äwä, ndə kə pa tshə za əbə za gâ lə kəna əyïngbanga, əyïngbanga nə za əbə gâ lə kəna kapita, kapita nə wli əbə gâ lə anda kânga ne. 26 Djatra əpʉ, mə pa kə əbə, bə sə sə kə wutu lə anda kânga nə bale ne ʉrrr bə piyi ngendja ə̂në əndje dɨ̂ kə əbə kɔ nɔ̂ gâ ye kane.»

18 Əndje sə kə gbətɔ e ə na də e gâ ətshi əgbro azü əgɔ də alayïngerə, mbrə əmə, ndə kə pa e pa əpʉ nə̂ əmə kə əndje də azü ə̂në əndje sə̂ sə̂ tə Ajuwufu ne kɔ. 19 Bale, alɔ ə̂në əndje na də e gâ ətshi alayïngbanga, e lï tshelə e lï gâ pâ äwä ə̂në e sə kə pa əpʉ də nə kɔ wala e pa atâ ne. Kʉ tə̂ alɔ nə səkɔ, aəpʉ ə̂në e sə kə pa nə kɔ, Ndjapä sə kə yisə̂ nə kə e.

Əpʉ kə zu Jezu

1 Tə̂ alɔ nə səkɔ, âgbɔ̂ əyïngerə əgɔ Rɔmə ə̂në əɨrɨ ye kə də̂ Ɔgustə kɔ zâ ama ndə kə pa əndje dɨ azü tshelə əgɔ nə̂ ye nɔ̂. 2 Angbʉlî kə dɨ azü səkɔ sə̂ tə̂ alɔ ə̂në Kirinusə sə̂ tə komandâ əgɔ Siri. 3 Azü nɔ̂ nâ na ye ndə kə pa əzü bale bale ta əɨrɨ ye gâ lə fraka lə gala nə̂ ye də ə̂tə̂ ye. 4 Jozafu ndje âfɔ lə gala Nazaratə mâ Galile ndə kə na mâ lə ashɔ Jude, mâ Beteləyamə, lə gala nə̂ âgbɔ̂ əyïngerə Davidə; mbrə ə̂në Davidə nə sə̂ tə ätä Jozafu nə. 5 Jozafu nə gâ ndə əwɔ nə də Marə̂ ə̂në tshə sə̂ də əndu əgblə koshe kɔ, nâ na ye ndə kə pa əndje ta əɨrɨ əndje gâ lə fraka.

9 mbrə ə̂në ə̈bə̈ âgbɔ̂ äwä krɔ̂ kə əmə gâ ye mbrə ə̈bə̈ kosəra, kədə alayïəpʉ nə ngba kəmə ndje ə ngba.

10 Bale, Pilatə nə pâ kə ətshə ə pa: «Bə wusə̂ nə wu ə pa mə sə də awlra ndə kə pa mə katə̂ zə, ndje ndə kə pa mə ku əbə gâ ala masheyɔ ne a?» 11 Jezu kîrə əpʉ ə pa: «Bə sə sə də ə̈bə̈ awlra bale gâ pâ əmə ne, kədə əndje zâ zâ kə əbə mâ lafɔ ne. Âdârə ə̂në əzü ə̂në tshə zâ əmə gâ lə kəna zə kɔ, âgbɔ̂ nyaka sə lə kumu ye ə rô ənə̂ zə gâ ye.»