1 E wü marä tə̂ kə yində əzə̂ ə̂në Abä yîndə əzə̂ kɔ, ndə kə pa tshə e əzə̂ tə aneshe nə̂ ye kɔ, â tə̂ banda əpʉ, a sə tə aneshe nə̂ ye nə! Mbrə nə, tshepashɔ wusə̂ əzə̂ wu ne, mbrə ə̂në ə wûsə̂ Ndjapä nə wû ne. 2 Alaye ə̂në mə yində e ngbatshe kɔ, mandânə səye a sə tə aneshe nə̂ Ndjapä, â marä tə̂ kə sə əzə̂ nə te te pa ə wutu gashu ne. Bale, a wusə̂ nə ə pa, tə̂ alɔ kə gu Kristə nə, a sə kə sə a pa də ətshə, mbrə ə̂në a sə kə wu ətshə mata ə̂në tshə sə kɔ. 3 Əzü nɔ̂ ə̂në tshə za lɔsu ye gâ pâ əpʉ Kristə nə rə, tshə sə kə mbrə tə̂ ye mvo, mata ə̂në Kristə nə sə mvo kɔ.

4 Əzü nɔ̂ ə̂në tshə sə kə mbrə nyaka alɔnɔ̂, tshə sə kə mbrə ndje ərə kpî tə̂ âgbɔ̂ əpʉ nə̂ Ndjapä, â nyaka nə kə də̂ kə mbrə ərə kpî tə̂ âgbɔ̂ əpʉ nə̂ Ndjapä nə. 5 E wusə̂ nə ə pa Jezu nâ ndə kə pa tshə djɔ anyaka lə kumu azü â nyaka sə sə lə kumu ye ne. 6 Əzü nɔ̂ ə̂në tshə tɔ popo Jezu Kristə nə, tshə sə sə kə mbrə nyaka alɔnɔ̂ ne. Əzü nɔ̂ ə̂në tshə sə kə mbrə nyaka alɔnɔ̂, tshə wû Kristə nə wû ə wûsə̂ ye wû ne.

7 Aneshe nə̂ əmə, əzü bale frɔ̈ e frɔ̈ ne. Əzü ə̂në tshə sə kə mbrə ərə də äwänə, tshə sə tə ə̂rɔ̂ əzü, mata ətshə ə̂në tshə sə tə ə̂rɔ̂ əzü kɔ. 8 Əzü ə̂në tshə sə kə mbrə nyaka alɔnɔ̂, tshə sə tə əzü nə̂ djablo, mbrə ə̂në djablo nə sə kə mbrə nyaka kerə pə tə̂ ama nə. Kandää, Ɨrɨ Ndjapä nə nâ kɔ, tshə nâ ndə kə pa tshə ndɨ tshelə aərə ə̂në djablo nə sə kə mbrə nə kɔ.

9 Əzü nɔ̂ ə̂në Ndjapä kə zû ətshə kɔ, tshə sə sə kə mbrə nyaka alɔnɔ̂ ne, mbrə ə̂në Ndjapä nə lû sorô nə̂ ye gâ lə əzü nə gâ ye. Tshə lï lï ndə kə pa tshə mbrə nyaka ne, mbrə ə̂në Ndjapä kə zû ətshə kɔ. 10 Ərə ə̂në ə sə kə yisə̂ aneshe nə̂ Ndjapä nə də aneshe nə̂ djablo nə gashu kɔ kə səke: əzü nɔ̂ ə̂në tshə sə sə kə mbrə ərə də äwänə ne kɔ, tshə sə sə tə əzü nə̂ Ndjapä nə ne, gâ ndə əzü ə̂në tshə yində aye nə yi ndje ne kɔ.

11 Əpʉ ə̂në e djî pə tə̂ ama nə kɔ kə səye: a yï tə̂ əzə̂ lə takpa tə̂ əzə̂. 12 A mbrə̈ ərə mbrə̈ mata Kayinə*, ə̂në tshə sə̂ leme-e tə̂ ənə̂ djablo ə wô aye nə kɔ ne. Â tshə wô ətshə mbrə yekɔ? Mbrə ə̂në aərə nɔ̂ ə̂në tshə mbrə̂ kɔ sə̂ tə aəmbrʉ nə, â aənə̂ aye nə nɔ̂ sə̂ tə aə̂rɔ̂ nə.

13 Alaye, kumu e kpë kpë pâ əndu e ne, kədə tshepashɔ wəra tə̂ ye tə̂ e. 14 Əzə̂, a wusə̂ nə ə pa a rô djoko ndə kuzu gâ tə̂ sorô gâ ye, mbrə ə̂në a sə kə yində alaye. Əzü ə̂në tshə yində azü yi ne kɔ, tshə daka pə lə kuzu. 15 Əzü nɔ̂ ə̂në tshelə ye wəra tə̂ ye tə̂ aye nə, tshə sə tə awowo əzü, â e wûsə̂ nə gâ ye ə pa ə̈bə̈ awowo əzü bale sə sə də sorô nə̂ alɔnɔ̂ lə ye ne. 16 A wusə̂ kə yi tə̂ tə̂ äwä ərə səye: Jezu Kristə nə kâ tə̂ ye də sorô ye nɔ̂ mbrə əzə̂. Əzə̂ ndje, a lï ndə kə pa a ka tə̂ əzə̂ də sorô əzə̂ nɔ̂ mbrə alaye əzə̂. 17 Bale, kədə ə̈bə̈ əzü kə sə də aə̂rɔ̂ aərə tshepashɔ, â wu aye nə ə̂në tshə ma əgo ə̈bə̈ ərə kɔ â mbrə ə̂rɔ̂ nə mbrə kə ətshə ne, kə yində Ndjapä nə sə tə̂ lɔsu ye atâ a? 18 Aneshe nə̂ əmə, a yï tə̂ əzə̂ yï kʉ də ama wala kʉ də aâtshɔ̂ aəpʉ ne, bale a yï tə̂ əzə̂ də kə mbrə ərə, tə̂ äwä djatra əpʉ.

19 Rə də̂ a sə kə wusə̂ nə ə pa a sə tə azü nə̂ djatra əpʉ nə â lɔsu əzə̂ sə kə zɨtɨ ətshi Ndjapä. 20 Mbrə ə̂në, kədə lɔsu əzə̂ kə wa ngbanga gâ lə kumu əzə̂, âgbɔ̂ Ndjapä kə sə̂ ə̂në tshə rô lɔsu əzə̂ nə â tshə wusə̂ ərə nɔ̂. 21 Alaye ə̂në mə yində e ngbatshe kɔ, kədə lɔsu əzə̂ nə kə wa ngbanga wa gâ lə kumu əzə̂ ne, a sə sə kə mbrə awa ətshi Ndjapä nə ne. 22 Â ərə nɔ̂ ə̂në a yu tshuku nə kə ətshə, a sə kə sɔtə̂ nə lə kəna ye, mbrə ə̂në a sə kə mbrə ndəma aâgbɔ̂ aəpʉ nə̂ ye â sə kə mbrə ərə ə̂në ə fʉ lə ala ye kɔ. 23 Âgbɔ̂ əpʉ nə̂ ye nə kə səye: a zä lɔsu əzə̂ kə ətshə də əɨrɨ Jezu Kristə, Ɨrɨ Ndjapä nə, ə yï tə̂ əzə̂ lə takpa tə̂ əzə̂, ə lï də əpʉ nə ə̂në tshə zâ ama də nə kə əzə̂ gâ ye kɔ. 24 Əzü ə̂në tshə sə kə mbrə ərə Lïndə̂ ndəma Ndjapä nə, tshə daka pə tə̂ kə tɔ popo Ndjapä nə, â Ndjapä nə daka pə tə̂ lɔsu ye. A wusə̂ nə ə pa tshə daka pə tə̂ lɔsu əzə̂ tə̂ äwä ərə səye: tə̂ äwä Âgbɔ̂ Yîrə̂ nə ə̂në tshə zâ ətshə kə əzə̂ gâ ye kɔ.