Maria

Maraika watura ebusebutwa Yesu

26 Ebukure bwa Risabeti bwarekia bwarengeka myeri mutuba, Ongo watuma maraika Kaburieri ku Nasareti, ubungu ruma rwa ku Ngariraya. 27 Wamutuma kuri kitasa kima nge Maria. Ekitasa ncho chabesenga nti nge muchumba wa Yosefu, mushukira uma w’ekisasa ch’emubake Ndauti. 28 Emaraika ngo weyere Maria mu mwabo n’imwire mbu: «Nakukea, ǒngo urishee nchumo ya Ongo! Nyere Kuritu uri hima nabe.»

30 Maraika wamwire mbu: «Usubahi, eMaria, bushwa mbu umashee nchumo kwa Ongo. 31 Ukuria bukure, ukubuta mwana wabume, na ukumuninka rina nge Yesu. 32 Wasebese mukwakare, wǎbikirwa Mwana wa Ongo ingu uri hiyo n’ebiti. Nyere Kuritu Ongo wasemuninkayo ekitumbi ch’ishiku Ndauti. 33 Iwe nge usesimanireyo ebea ba ku Isiraeri ematu ati, n’ebwami bwae butabesiyo na ngendero.»

Erumbo rwa Maria

46 Ngerikia Maria weba mbu:

«Emutima wani watatirisa Nyere Kuritu,

47 Namoere Ongo,

Muramya wani.

48 Bushwa wamanikwire bonso ani mukori wae.

Muriira, itukire enompena, ebea bati basembikira mbu nakasanirwa,

49 bushwa mbu Ongo Mine Maa wamanikore binwa bikiri.

Erina rae rashurukara ho!

50 Na wasenda ukwirengi bonso

ebamusubaha b’esankiso siti.

51 Wamakoresha emaa ae murikoresha ebunkangwe bw’emombo wae,

wamansansabanya ebari n’emutima w’engari.

52 Wamakuto ebami mu bitumbi byabo,

n’itumbia ebihohea.*

53 Wakusukucha ebakwa rwaka,

ina wakukurucha ebatumba kobokobo.

54 Wakweya kasake emukori wae Isiraeri

na ntíwakobya imukwire bonso,

55 imbu bwarananga we na batitanku bitu, ietere

kuri Iburahimu n’erubuto rwae ematu ati.»

4 Yosefu nae watuka murubungu rwa ku Nasareti, mu chuo cha ku Ngariraya, n’ienda mu chuo cha ku Yundea murubungu rw’emubake Ndauti, erubikirwange mbu Beterehemu. Wendanga nko bushwa wabesenga uma mu bana b’eruanda rwa Ndauti. 5 Wenda kiandikisha nko hima na Maria muchumba wae, na nti murito. 6 Barekia bari ku Beterehemu, ematu ae erikwikokora arumira. 7 Wabuta mwana, entangi yae. Wamubumbe byeri n’imuraamya mu muringa w’eririshie esanyama, bushwa barukwanga buari mu nkambi y’ebeni.

19 Ina Maria iwe, waranganga ebinwa biti mbyo kumunda n’emutima wae n’ianikira mu byo nguru.

34 Simioni wakasane bo, were Maria, nina w’emwana mbu: «Emwana uno wamabutwa kongo wakiria n’isimanya bea bingi ku Isiraeri. Wasebese kiteerere chatuka kwa Ongo ekisetinwa n’ebea, 35 kongo emihaki y’ebea bingi eyarebiswa itabukare. Na ǒngo Maria, ukurukirayo bwae buri mwea wasoswa itumo mu mutima.»

48 Ebabuti bae barekia bamamusunga, bashishara nguru. Nina wamushisha mbu: «Emwana’ni, bushwanki utukore biri buno? Ani na iso twamakusonda na nti twatingirwa na koha.» 49 Yesu wasako bo mbu: «Banu munisonderengi inki? Ntibanu mosi rero mbu rakomenwa nibesi mu numba ya Tita?» 50 Ina batateereri ekinwa ncho chakianga were bo.

51 Ngerikia ke Yesu wakuruka hima nabo ku Nasareti, wenderana irukire bo. Nina wabesenga nt’usubukianga ebinwa biti mbyo kumunda n’emutima wae.