1 Erotu rukiri rw'emikati nji isira chachu, rwabikirwa mbu Pasaka,* rwabesenga ngie ruri keya. 2 Ebakwakare b'ebakuhani n'ebahani b'eMyomba babesenga basondange buni buseshurishayo bo Yesu, ina babesenga basubahange ebea.

3 Nampo ke, Mushumbu wakime mu mutima wa Yuta Isikarioti, uma mu santumwa sa Yesu. 4 Yuta wenda kashambara n'ebakwakare b'ebakuhani, hima n'ebakwakare b'ebasura mbi barangangǎ eNumba ya Ongo, kongo warana nabo buni busesibure we bo Yesu. 5 Ebakwakare mbo bashima nguru, na barana nae mbu basemuninka behe. 6 Yuta warisia, wabucha isonda ntambi yakonda y'erininka bo Yesu n'ebea nti tíbosi.

7 Erotu rukiri rw'emikati nji isira chachu rweya. Mu rotu ndo, eBayuta babesenga bashuranga mburi bushwa n'erotu rukiri rw'ePasaka. 8 Yesu watuma Petero na Yohana, were bo mbu: «Mwendi katuteke bio byerotu rukiri rw'ePasaka kongo twarisa.» 9 Bamushisha mbu: «Mbeni ushima twendi katekere byo kuni?» 10 Were bo mbu: «Mwendi murubungu rukiri. Mumeya ko, mukukumana mwea uma waria irea ra mecha. Emwea ngo mumumisanga mu numba nji yasekime mu we, 11 na mwerenga mine mo mbu: ‹eMuhani ukushishange kuba hani nge hari buari mu numba haserire we ebio by'ePasaka hima n'ebanafunsi bae.› 12 Nae wasebushea buari bukiri ekwio inku ekwamatunganyiwa. Nanko nge kuteki banu ebio by'ePasaka.» 13 Ebanafunsi mbo benda. Bakianga bameya ko, bakumana ebikai biti mbu bwakianga Yesu were bo. Nampo, bateke ho ebio byabo byerotu rukiri rw'ePasaka.

14 Entambi yakianga yameya, Yesu n'esantumwa sae barika n'ibucha irisa.Yesu ubengange emukati 15 Were bo mbu: «Nakuhunanga nguru irisa ninu ebio bino byerotu rw'ePasaka kubusondori n'erinuba rani! 16 Bushwa nibwirengi mbu ntarisiyo tu ninu Pasaka ieya n'erotu ndu rusekɨayo narisa imbi byarumira mu Bwami bwa Ongo.»

17 Nampo, Yesu watinge erusara, watata Ongo n'ieba mbu: «Mutingi erusara runo, na mwomu banu bati. 18 Bushwa nibwirengi mbu itukire enompena, ani nt'omu tuyo ndifai ieya n'erotu ndu ruseyayo eBwami bwa Ongo.»

19 Kuruma nampo, Yesu watinge mukati, na watata Ongo. Wanoa o n'ininka esantumwa sae n'iere bo mbu: «Uno nge mubi wani ewamakinda isiburwa bushwa ninu. Mwendi muronja buno murinikandira.»

20 Bakianga bamahea irisa, Yesu waninka hotu bo usara rwa ndifai n'ieba mbu: «Erusara runo ng'erirai rishasha r'enchama yani eisekubuka bushwa ninu. Iro ng'erirai ndi raronjanga Ongo mu nchama yani inji isekubuka bushwa ninu.

21 «Ina mukaenga! Emwea ngu usenisibura ngie urisange hima nani. 22 Mu riira, ani eMwana w'eMwea nasekwa imbu bwakianga Ongo weba. Ina waherwa emwea ngu wasenisibura!» 23 Nampo, esantumwa sabucha ishishana munkati nato kuba inye ngwasekora ekinwa ncho!

24 Kuruma nampo, ebanafunsi babucha buhaka bukiri bw'isiba kuba inye ngwamubese mukwakare munkati nabo. 25 Yesu were bo mbu: «Mu bea mbi ntíbosi Ongo, ebami babo basimanirengǎ bo mu maa. Ina ebakwakare bashimangǎ ebea babikire bo mbu: ‹Bakori ba binwa byakonda.› 26 Ina kiro byendi bibesange mbo munkati ninu. Kinsi mwea ngu mukwakare mu banu ngwakomenwa ibese buri iwe nge mwanunke, n'emukwakare wahwa ibese buri iwe nge mukori. 27 Mbeni inye nge mukwakare mu bea bano: ingu warika mwirisa ebio abe ingu eumusheengi byo? Kai ntí ngu warika n'urisange ebio! Ina ani niri munkati ninu buri mukori.

28 «Banu ntímukunisianga mu ntambi y'emyereko yani. 29 Bushwa nancho, namabuninka eBwami imbu bwakianga hotu Tita wanininka bo, 30 kongo murisa n'iomo hima nani mu Bwami bwani. Na banu tu mukurikayo mu bitumbi by'ebami kongo muhukumuyo esanganda ikumi na sibi s'eBaisiraeri.»

31 Kuruma nampo, Yesu were Simoni mbu: «eSimoni, Simoni! Rukira! Mushumbu wamaninkwa ntambi y'eribufufura ebukianga emwea wafufura engano. 32 Ina namakuheme kongo utusii erisimira rabe kuri ani. N'entambi isekia ukuruka kuri ani, usakenga banakinu kongo baandira nguru mu risimira.»

33 Petero wamwire mbu: «eNyere Kuritu, ani nasimira iminwa hima nabe n'ikwa hima nabe.»

34 Yesu wamusako mbu: «Nikwirengi ǒngo Petero mbu runotu enchongore isebikira na nt'umakinda inituna meta ashatu mbu ntíǒngonosi.»

35 Kuruma nampo, Yesu washisha ebanafunsi bae mbu: «Mbeni nakianga nabutuma, banu nti tímuria behe, kimbesa abe birato, mbeni kuri kikai charukwanga banu?» Nabo mbu: «Anga!»

36 Nae were bo mbu: «Eo ke, kinsi ngu uri na karufaranga watingi ko, nangu uri na kimbesa nae watingi cho, nangu usira mbenge wachuye enchangi yae kongo wachura yo. 37 Nibwirengi mbu rakomenwa ebinwa bino binihieri imbi ebyaandikwa mu Kitabo Chashurukara mbu: ‹Uansirwange munkati n'ebabisha.›* Iira, ebinwa biti mbi byanikae ani ngie biri kwihi n'ieya hende.»

38 Nampo, ebanafunsi bamwire mbu: «eNyere Kuritu, kae, turi na mbenge sibi hano.» Nae wasako bo mbu: «Ae, mushiri mpo.»

39 Yesu watuka mpo, wátarie mu rou rw'eMiseituni imbu bwabesenga bukianga ho we. N'ebanafunsi bae bamutucha. 40 Warekia wameya ko, were bo mbu: «Muheme kongo muhundusa emyereko.» 41 Kuruma nampo, wishika kore kakeke nabo mu bwende ebwamuhierě mo ikoi ritawa na mwine, wakome emaru n'ihema mbu: 42 «eTita, kuba usasa, erusara runo rw'eminubo ino n'echei ro kore nani! Ina kiro byabunduke buri ebwashima ani, ina ebyashima ǒngo nge bikorwe.» [ 43 Nampo, maraika uma watuka mu mbingu weya kongo wamuninka maa. 44 Yesu wabesenga na koha nguru, nampo wabucha ihema ketu na maa. N'esantubano sabucha imutuka mo n'irara ekwansi buri matondi a nchama.]

45 Yesu wakianga wamakinda ihema, wasimana n'ikuruka hari ebanafunsi bae. Wakumana bo nti barere bushwa babesenga na bonso bwingi. 46 Were bo mbu: «Mbeni banu murere bushwa nki? Musumuke na muheme kongo kiro mukime mu myereko.»

47 Yesu wakianga ukiri webange, hiha-hiha kikembe cha bea chamusaire nsisu. Yuta uma mu santumwa sae nge wasondorenga bo. Wákensere hari Yesu kongo wámukoke.Yuta wasibura Yesu 48 Ina Yesu wamushisha mbu: «eYuta! Mbeni mu rinikoke nge ranisibura mo ǒngo, ani eMwana w'eMwea?» 49 Ebea mbi babesenga hima na Yesu barekia basunga ebyasondanga isungwa, bamushisha mbu: «eNyere Kuritu, mbeni tukondae bo na mbenge?» 50 Hiha-hiha uma mubo wakera ekote kw'ekwabume kw'ekahungu k'emukwakare w'ebakuhani. 51 Ina Yesu weba mbu: «Koko, burombo!» Watinge mu kote kw'emwea o n'imuramya.

52 Nampo Yesu were ebakwakare b'ebakuhani, n'ebakwakare b'ebasura mbi ebarangangǎ eNumba ya Ongo, n'ebakungu mbi beyanga kamumina mbu: «Bushwa nki banu muniyere na mbenge hima na mihumbo buri ani mwibi? 53 Ematu ati nabesenga niri ninu mu Numba ya Ongo ina ntímunitingenga. Ina entambi ino nge yinu na ntambi y'emukwakare w'emwirimya.»

54 Kuruma nampo, ebea mbo batinge Yesu. Bakianga bamamutinge, bamuria mu numba y'ekuhani mukwakare. Petero wabesenga umisange bo kasando kihi na kare.

55 Barekia beya, bakoya kasha munkati n'ebutara bw'ekuhani mukwakare, n'irika. Petero nae weya kanyukara mu kasha hima nabo. 56 Mukori uma wamumina wasunga Petero ntwarika kumushi n'ekasha. Ekikumi ncho chamusisirisa nguru n'ieba mbu: «Ewabume ngu nae uri rero hima na Yesu!» 57 Ina Petero wituna n'ieba mbu: «Ǒngo mumina, ntínosi emwea ngo!»

58 Kuruma na ntambi nkeke, umpe mwea nae wasunga Petero n'imwire mbu: «Na ǒngo hotu uma mu bo.» Ina Petero wasako emwea o mbu: «Etita, ani ntínimosi.»

59 Kwakianga kwameta buna ntambi nima, umpe mwea weba na kwimima mbu: «Muriira, emwea ngu iwe nae wabeseyo hotu hima na Yesu, bushwa mbu iwe nae mwea w'echuo cha ku Ngariraya.»

60 Ina Petero wamwire mbu: «Etita, ntínosi chebange ǒngo!» Wakianga ukiri webange, enchongore yabikira nakuba. 61 Nyere Kuritu wikebera, wasindera Petero. Petero wasubukia ebinwa byamwerenga Nyere Kuritu mbu: «Nikwirengi ǒngo Petero mbu runotu enchongore isebikira na nt'umanituna meta ashatu mbu ntíǒngonosi.» 62 Petero watuka habutara na nt'urengi nguru.

63 Ebea mbi babesenga barangange Yesu babesenga bamuseange n'imuhumba. 64 Bamumina emeso n'imushisha mbu: «Tabura k'emwea ngu wamakukaso!» 65 Ibo bamurekeranga bimpe binwa bingi by'imukambaa.

66 Ebutu bwakianga bwamacha, ebakungu b'eBayuta n'ebakwakare b'ebakuhani hima n'ebahani b'eMyomba bakumanana mu Rushu rukiri rwabo. Nampo barisha Yesu mu makako abo. 67 Bamushisha mbu: «Eo twiri ke, mbeni ǒngo nge Kirisitu?» Yesu wasako bo mbu: «Nakiro namubwire, mutunisimiri, 68 na namubushishǎ kinwa mutunisubii. 69 Itukire enompena, ani eMwana w'eMwea, mu ruharo rw'ekwabume rwa Ongo mine maa nge mwenda karika ani.»

70 Nampo ke, ebati bamushisha mbu: «Ngerieba mbu ǒngo ng'eMusike wa Ongo?» Na Yesu mbu: «Banu nge mumeba mbo!»

71 Mu rikindanya, beba mbu: «Ntítwirae tuna mu mwea uti-uti ngu wamututure emyasi y'emwea uno! Bushwa mbu twamakinda irukira bate bisine ebyameba we!»