1 Yesu wakere ebanafunsi bae emushinga uno mbu: «Kwarikanga mutumba uma. Emutumba ngo nt'uri na mwea wae w'imurange ebehe byae. Emurangi ngo, ebea benda kamusongere kuri nyere kurwabo mbu ushatange n'ebehe byae. 2 Nyere kurwabo wamubikira n'imushisha mbu: ‹Ini myasi nji irukirange ani eyebange ebea bushwa nabe? Bushwa nancho, niansiri ebehe byani biti enompena, bushwa mbu uturangi tu byo.›

3 «Emurangi ngo wabucha kwiebesha mbu: ‹Nyere Kuritu usondange inihensa mu murimo. Naseronja ke buni? Emaa erihinga nsira o, n'erihema-hema naro risendishie nkene. 4 Mbo! Namasiba ebuseronja ani kongo entambi nji basenihensa mu murimo, bampe bea bendi banikokengi mu manumba abo.› 5 Nampo wabikira kinsi mwea ngu watingenga mwinda wa nyere kurwabo. Washisha ewaroso mbu: ‹Mbeni ongo'ri na mwinda wa nki wa nyere kuritu?› 6 Emwea ngo wamusako mbu: ‹Nkunguru iyana sa mafuta.› Emurangi wamwire mbu: ‹Tinge ekaratasi kabe, rika hano tete, andika makumi asanu.› 7 Kuruma nampo, wabikira umpe mwea n'imushisha mbu: ‹Na ǒngo uri na mwinda wa nki?› Nae wamusako mbu: ‹Tuterere iyana twa nchano ya ngano.› Emurangi wámwire mbu: ‹Tinge ekaratasi kabe, andika makumi munani.› 8 Nampo ke, nyere kurwabo emurangi ngo mukongobanya wamutata bushwa n'ebwenge bwae. Nameba mbo bushwa mbu ebea b'echuo kino baronjangǎ ebinwa byabo by'ebukongobanya hima na banachabo irenga mbi bari mu chaka.»

9 Bushwa nancho, Yesu weba tu mbu: «Nani nibwirengi mbu: mwendi mukoresha ebehe byinu by'ebukongobanya by'echuo kino mwironja bwira. Bushwa mbu, ebehe mbyo bisekiayo byamarukwa, Ongo wasebukokeyo mu mbingu mu numba y'ebuingo bw'ematu ati. 10 Emwea uri n'eriira mu bikai bikeke, ungo nge mwea w'eriira hotu mu bikai bingi. N'emukongobanya mu bikai bikeke nge mukongobanya hotu mu bikai bingi. 11 Kuba ke banu mufundwa ibese bea b'iira mwiranga ebehe by'ebukongobanya bya kino chuo, mbeni inye nge usebwinyihireyo mwibuninka behe byeriira? 12 Kuba mutumakocha iranga bya bampe bea mu riira, inye ke ngwamubuninkǎ binu?

13 «Kusira mukori wamukocha ikore bakwakare babi. Bushwa mbu wasebaa ho uma n'ishima umpe, abe waserandakana ho n'uma n'inena umpe. Mutukoche ikore Ongo n'ikore ebehe mongo.»

14 eBafarisayo bakianga barukira ebinwa mbyo, basea Yesu bushwa mbu babesenga bashima behe nguru. 15 Yesu were bo mbu: «Banu mwisheanga kuri ebea mbu banu ho nge bea baombokara, ina Ongo usibanga ebiri mu mitima yinu. Bushwa mbu, ekisungwanga mu meso ebea mbu kikai kikiri, Ongo iwe wanena cho.

16 «eMyomba ya Musa n'ebitabo by'ebatahwa nge byabesenga byemisange ebea ieya na mu matu a Yohana Murubiki. Itukire mu matu ngo, n'ituranga eMwasi Wakonda w'eBwami bwa Ongo. Itukire mu matu ngo eMwasi Wakonda w'eBwami bwa Ongo nge uturwange ho mu matu ano, na kira mwea uronjange maa ae ati kongo wakime mu Bwami mbo. 17 Ratamba kuri echuo n'embingu irimina, ina eMyomba ya Ongo itatukiyo mo anga na kakinwa kakeke.

18 «Kinsi wabume wahensa mukari n'ibinga umpe, wakora nsingirani. Nangu wabinga mumina ngu wahenswa na moke nae wakora hotu nsingirani.»

19 Yesu wakera tu emushinga uno mbu: «Kwarikanga mutumba uma. Emutumba ngo wabesenga umbaranga nchangi sakonda nguru na sa busi bwasuma nguru, na nt'urisanga shu kirotu. 20 Kwarikanga hotu na musene uma mbu nge Rasaro. Rasaro ngo, emubi wae uti wabesenga urisere bihuru. Wabesenga urikanga hamiango mw'emutumba ngo. 21 Wabesenga wisanenga ebio mbi bikirengi itukire mu mesa y'emutumba ngo. N'esambibi sabesenga seyangǎ karamba ebihuru byae.

22 «Otu ruma, Rasaro wakwa. Ebamaraika beya kamuringa n'imuria hari Iburahimu. Emutumba nae wakwa, n'ebea benda kamutaa. 23 Emutumba warekia uri mu marunga nt'unubange nguru, watarisha emeso, wasunga Iburahimu kore, na Rasaro kumushi nae. 24 Warake Iburahimu n'ieba mbu: ‹Etita, ninubange nguru mu kasha kano, nikwiri bonso! Nitumiri Rasaro warubike entonga y'emurimba wae mu mecha kongo waboboya erwami rwani.›

25 «Ina Iburahimu wamusako mbu: ‹Emwana'ni, uanikiranga mbu ubesenga na butumba bwingi mu chuo, ina Rasaro iwe nt'unubange. Na hano ke, uri mu sangoa na ǒngo unubange. 26 Usibanga tu mbu hari kiribu kikiri nguru munkati na bate ninu. Ngebumbo, ebari kuno, kuba bahunange isoka kuri banu nko, batamukocha. N'ebari kuri banu nko, batamukocha isoka kuno kuri bate.› 27 Emutumba weba mbu: ‹Etita, nikuhemange utume ke Rasaro mu mwitu, 28 bushwa mbu basike bitu basanu bari mo, wendi katonde bo kongo batahieriyo mu minubo ino.› 29 Iburahimu wamusako mbu: ‹Basike binu bari n'ebitabo bya Musa nambi by'ebatahwa, bendi bamisange imbu ebweba byo!› 30 Emutumba weba mbu: ‹Anga, etita Iburahimu! Ritamende mpo nensi. Ina kuba kuri ingu wamufuka wamenda katonde bo, basereke esansambi sabo.› 31 Ina Iburahimu wamwire mbu: ‹Kuba banakinu mbo batamukocha irukira emitiro ya Musa na y'ebatahwa, batakoche hotu irukira emahano angu wafuka.›»