1 Otu ruma rwa Sabato, Yesu wenda kara bio mu numba ya mukwakare uma wa Bafarisayo. Ebea mbi babesenga kumunda n'enumba barika nti bamukairirengi mwisunga ebisekora we. 2 Na habusondori na Yesu, kai nti hari mwea uma wasamba bukoni bwibimba-bimba emubi. 3 Yesu washisha ebahani b'eMyomba n'eBafarisayo mbu: «Mbeni eMyomba yitu yarisia abe yahangire iramya mwea otu rwa Sabato?» 4 Ina bibebere. Nampo ke, Yesu watinge mu mukoni, wamuramya n'imwire mbu wendi rae. 5 Kuruma nampo, Yesu washisha ebea mbo mbu: «Inye munkati ninu, emwana wae abe enkambu yae yamahuka kumunda n'ekiribu cha mecha, wamurukwa ieya tete n'ikuto yo mo bushwa ho mbu otu rwa Sabato?» 6 Ina ntíbakochanga isako mu binwa mbyo.

7 Yesu warekia wamasunga ebukiange ebakubikirwa bitoma eburiki bwa roso, waninka bo ihano mbu: 8 «Kuba mwea wakubikira mu kibimbi ch'iherucha, ang'ienda utairire irika mu kitumbi cha kubusondori. Munantambi kwakubikirwa umpe mwea wakurenga itunda. 9 Nangu ewakububikiranga banu babi wameya, wakwiri mbu: ‹Siere uno ekitumbi warike.› Nampo ukusimana n'ienda karika mu kitumbi cha kuruma na nkene singi. 10 Ina kuba ubikirwa, wendanga kǎrika mu kitumbi cha kuruma, kongo ingu wakukubikiranga wasekia weya, wakwiri mbu: ‹Emirani, iya kuno kubusondori.› Nampo ukubese nti umaninkwa itunda munkati n'ebea bati mbo ebarirengi hima. 11 Ngyasingwa kinsi mwea witarishanga wasehichiwayo, na ngu wihichanga wasetarishiwayo.»

12 Kuruma nampo, Yesu were emwea ewakumubikiranga mbu: «Kuba ǒngo ubikirange ebea mu kibimbi, rabesa mukoma-koma abe mwiyoro, kiro ubikira ho bira babe, abe basike binu, abe ebabuti babe, abe ebatumba imbi bari mwendende nabe, kongo nabo bakubikirayo. Nampo risebeseyo buri ikukuruchie ebyaninkanga ǒngo bo. 13 Ina kuba ubikira bea mu kibimbi, wendi ubikira ebasene, esankata, ebirema, n'ebihumihumi. 14 Nampo, Ongo wasekukasane bushwa mbu ebea bano basira ch'erikukuruchie. Na wasekukuruchieyo erotu rusekiayo ebakoranga byakonda bafuka.»

15 Mwea uma mu bea ebabesenga barisange hima na Yesu, wakianga warukira ebinwa mbyo, were Yesu mbu: «Wakasanirwa emwea ingu userayo bio mu Bwami bwa Ongo.»

16 Yesu wamukere emushinga uno mbu: «Kwarikanga mwea uma waronja bio bya kibimbi, wabikira bea bingi. 17 Entambi y'eririsa yarekia yamarumira, watuma emukori wae wendi kere ebakubikirwa mbu: ‹Mweye ke bushwa mbu ebikai biti byamarumira.› 18 Ina kira mwea wabucha kwireme. Waroso wamwire mbu: ‹Nakuchura ishwa, na nahwa ienda kasunga ro. Nikuhemange unisasire.› 19 Umpe wamwire mbu: ‹Nakuchura nkambu ikumi s'ihinga, na nendange kereka to kuba samukora. Nikuhemange unisasire.› 20 Na umpe wamwire mbu: ‹Nakuherucha, na bushwa nancho nteyi ko.›

21 «Emukori wakuruka kature nyere kurwabo ebwamamusako bo. Nampo, mine numba wasubuka n'iere emukori wae o mbu: ‹Enda tete ekubutara bukiri, eta na mu mitanga y'erubungu, ringa ebasene, esankata, ebirema n'ebihumihumi bakimi muno.› 22 Kuruma nampo, emukori wakuruka n'ieba mbu: ‹Enyere kuritu, ebiti byakunerenga ǒngo namakora byo, ina kumunda enumba kukiri buari.› 23 Nampo ke, nyere kurwabo wamwire mbu: ‹Enda mu sanse s'esambungu na s'ekutunsari karinga ko bea, kimia bo na kamimo kongo enumba yani yarisa bea. 24 Nibwirengi mbu anga n'uma mu bakubikiranga ani ewaserora mu bio byani.›»

25 Otu ruma, bea bingi babesenga bamisange Yesu. Wabunduka kuri bo n'iere bo mbu: 26 «Kinsi mwea ingu usondange inimisa, wanchime irenga ishe, na nina, na mukari, n'ebana bae, na basike babo, na bisi babo. Na wanchime irenga mbu bwishima we. Kuba ntímbo, watakoche ibese mwanafunsi wani. 27 Kinsi mwea ngu watangaria emusaraba* wae n'inimisa, watakoche ibese mwanafunsi wani.

28 «Mbeni inye mu banu kuba usondange iumba numba nkiri, wamurukwa kasa irika n'ibucha iansa ebehe ebisekoresha we kongo wasiba imbi bikwengi we ebyamukindanya ebwimbe? 29 Bushwa mbu wamimba emusingi, kuruma nampo wafundwa ikindanya ebwimbe bw'enumba njo, ebea bati mbi basenda basungange yo basenda bamuseange 30 n'ieba mbu: ‹Emwea uno wakubuchanga iumba na wafundwa tu irísía enumba!›

31 «Mu ntambi mubake murebe usondange ikwana na umpe mubake, rakomenwa warike kasa, kongo wasunga, kuba ietere emaa Ebasura bae erefu sibi, wamukocha ihima mine eurikire n'ebasura erefu makumi abi. 32 Kuba wasunga mbu watamakocha, kai wasekia ukiri kore, wamutuma bea kuri mine bamushishe mbu wakie buni kongo washee buhoro. 33 Ngebumbo hotu kuri banu! Kusira uma mu banu ewamukocha ibese mwanafunsi wani kuba watamakocha isia ebiti bikwengi we.»

34 Yesu were tu bo mbu: «Emukwa* ushamukanga. Ina emukwa wamariminya ebushamuke bwaa, kinki ke tu echamukocha irishie tu o ebushamuke? 35 Emukwa ngo nti usira tu mufa abe mu roto abe mu buinu. Ebea bataangǎ o hambuka. Ingu uri n'emate erirukira warukire!»