1 Otu ruma rwa Sabato, Yesu wabesenga wetange mu mashwa a ngano. Ebanafunsi bae babucha ikekeraa etukobe tw'engano, babungabunga to mu mine n'irisa etuma. 2 Bafarisayo bima bashisha bo mbu: «Era! Bushwa nki banu mukiange binwa ebyahangirwa ikorwa erotu rw'eSabato?»

3 Yesu wasako bo mbu: «Ntinensi musoma imbu bwaronjanga Ndauti wisine n'ebea bae entambi yarukiranga bo rwaka? 4 Wakimenga mu Numba ya Ongo, watinge mikati eyasiburwanga Ongo, warisa yo n'ininka mu yo ebea bae, n'emikati njo yakomenwanga rero iriwa ho n'ebakuhani bisine.»* 5 Ngyasingwanga ke Yesu were bo mbu: «Ani Mwana w'eMwea nge mine erotu rw'eSabato.»

6 Otu rumpe rwa Sabato, Yesu wakime mu sinangoki n'ibucha ihana ebea. Kumunda mo nti muri mwea uma wa rumbonsa mu rikasa r'ekwabume. 7 Ebahani b'eMyomba n'eBafarisayo babesenga bakairirengi Yesu kuti useramya mwea mu rotu rw'eSabato, kongo bashee kinwa chimusongere. 8 Ina bushwa Yesu wabesenga wosi emyanikiri yabo, ngerikia ke were emwea w'erumbonsa mu rikasa mbu: «Simana! Kensere habusondori n'ebea.» Nae wenda kasimana mpo. 9 Ngerikia ke Yesu were bo mbu: «Nibushishange: mbeni eMyomba yatukonga ikora byakonda abe ebyema mu rotu rw'eSabato? Iramya mwea abe imushura?»

10 Yesu wakae bo ebati, kuruma nampo were emwea ngo mbu: «Oro erikasa rabe.»

Nae woro erikasa, n'erikasa rae rabesa tu shu. 11 Ina ebahani b'eMyomba n'eBafarisayo mbo basubuka nguru, babucha ishishana bisine kinki echamukore bo Yesu.

12 Otu ruma, Yesu wataya mu rou, wenda kakeresha mwihema Ongo emutu muti. 13 Ebutu bwarekia bwamacha, wabikira ebanafunsi bae, n'irondora mu bo ikumi na babi, wabikira bo mbu ntumwa. 14 N'emina abo nge ano: Simoni ingu wakianga Yesu waninka erina ra Petero na musikyabo Nderea, na Yakobo, na Yohana, na Firipo na Bariteremayo, 15 na Matayo, na Tomasi, na Yakobo musike wa Arufayo, na Simoni w'ekikembe ch'eBaseroti, 16 na Yuta musike wa Yakobo, na Yuta Isikarioti ingu wasiburanga Yesu.

17 Yesu wahita mu rou hima n'esantumwa sae, n'isimana hari buari bwarambama. Himpo nge habesenga ebanafunsi bae hima na kikembe kikiri nguru cha bea ebatukanga murubungu rwa ku Yerusaremu, na mu chuo cha ku Yundea, na mu sankaro-nkaro s'esambungu sa ku Tiro na ku Sindoni mwendende enyansa. 18 Ebea mbo beyanga karukira Yesu na kongo waramya emakoni abo. Nambo ebabesenga barenubiwa n'ebifwasi barama. 19 Ebea bati basondanga imutinge mo, bushwa mbu kumunda nae kwabesenga kusaange maa aramyange ebati.

20 Yesu wakae ebanafunsi bae n'ieba mbu:

«Mukasanirwa banu mbi ebasene,

bushwa mbu eBwami bwa Ongo bwinu.

21 Mukasanirwa banu mbi muri na rwaka enompena,

bushwa mbu mukusukutǎ.

Mukasanirwa banu mbi murengi enompena,

bushwa mbu mukûsea.

22 «Mukasanirwa banu, kuba ebea babubaa, bamikuto kuri banu, bamabukamba n'ibubishie emina inu bushwa nani eMwana w'eMwea! 23 Ebinwa mbyo bisekia byamasaa, mumoanga na kwikuba-kuba, bushwa mbu mubikirwa bihembo bikiri mu mbingu. Bumbo nge bwakianga bishiku babo bakore ebatahwa.

24 «Ina mumaherwa banu ebatumba,

bushwa murikinda ishee esangoa sinu.

25 Mumaherwa banu mbi musukuta enompena,

bushwa mbu mukukwa rwaka.

Mumaherwa banu mbi museange enompena,

bushwa mbu mukusungayo buhanya n'irire.

26 Mumaherwa banu kuba ebea bati babutatange, bushwa mbu bumbo nge bwakianga bishiku babo batata hotu ebatahwa b'emanko!»

27 «Ina banu mbi munirukirange, nibwirengi mbu mwendi mushima ebarenda binu, mwendi mukora byakonda kuri imbi babubaa. 28 Mwendi muhemere mukisa imbi ebabuherange. Mwendi muheme imbi babuterange. 29 Emwea wamakurasa kihi mu ritema rima, mushee n'erimpe hotu. Emwea wamakunyaka erikoti rabe, musieri n'erishibabu hotu. 30 Emwea wamakuhema kikai muninke cho, n'ewakunyaka bikai byabe, angimuhema mbu wakukurichii byo. 31 Mwendi mukore bampe imbu busondange ikorerwa hotu banu.

32 «Banu muri n'ishima ra buni kuti mushima ho mbi ebabushima? Bushwa mbu n'ebea b'esansambi nabo bashimangǎ ho imbi ebashima bo. 33 Kuba banu mukorengi byakonda kuri ho mbi ebabukorengi byakonda, ini nchime isheange banu? Bushwa mbu n'ebea b'esansambi nabo hotu bakoranenga bumbo. 34 Kuba banu musombyange ho mbi ebinyihire banu ho mbu bamubutua, ini nchime isheange banu? N'ebea b'esansambi hotu nabo basombyangǎ banachabo b'esansambi mu mwinyihiro mbu basetua imbu bwakwisombyanga bo! 35 Ina banu, mwendi mushima ebarenda binu. Mwendi mukore bo byakonda n'isombya bo na nti tímwinyihire ikuruchiwa. Nampo mukuninkwa uhembo rukiri na mukubeseyo bana ba Ongo ingu uri hiyo n'ebiti, bushwa mbu iwe mongo mu bea bati ebabi nambi ebatashimanga mu byakorerwa bo. 36 Mwendi mukwirane bonso, imbu bubukwirenga Tita winu bonso.»

37 «Kiro mwendi banu muhukumungi bampe, na Ongo nae watendi ubuhukumungi. Kiro mwendi banu mwansiranengi bibí, na Ongo nae watendi ubuansirengi bibí. Mwendi musasira bampe, na Ongo nae wendi ubusasirange na banu hotu. 38 Mwendi banu muninkange bampe, na Ongo nae wasenda ubuninkange. N'ekisebuninka we, waserisía cho shu n'isoseka cho, n'irisia esanku sinu mu meno. Bushwa mbu Ongo wasebupimireyo mu nengo nji ipimirengi mo banu kuri bampe.»

39 Yesu wakere tu ebanafunsi bae emushumo uno, washisha bo mbu: «Mbeni kihumihumi chamakochǎ ibunja kimpe kihumihumi? Ebati babi batakiri mu kiribu? 40 Emwanafunsi watarenganga emuhani wae. Ina kinsi mwanafunsi ingu warihanwa shu, wamubesě buri emuhani wae.

41 «Buni bwamusunga ǒngo ekasu kari kumunda n'eriso ra munakinu, ina utungarae mu kitika kiri mu riso rabe? 42 Abe, buni bwamukocha ǒngo iere munakinu mbu: ‹Reke nikukutu ekasu mu riso rabe›, na kendekese kumunda n'eriso rabe ǒngo mukiri kitika! Ǒngo mwea w'enkuse! Kuto kasa ekitika kiri mu riso rabe, kongo ukae ishu n'ikuto ekasu mu riso ra munakinu.»

43 «Kusira muti wakoma wamubuta byuma byema, abe kusira muti wema wamubuta byuma byakonda. 44 Bushwa mbu kira muti usibwanga mu byuma byao. Ebea batamusiro byamba abe nkobe mu muti w'erusoa. 45 Ngebumbo, emwea wakoma webanga binwa byakoma imbu bwakonda emutima wae. N'emwea wema webanga binwa byema imbu ebwema emutima wae. Bushwa mbu ebunu bw'emwea bwebanga binwa ebirisere mu mutima wae.»

46 «Bushwa nki banu mumbikirange ‹Nyere Kuritu, Nyere Kuritu›, na mutungakora imbi bibwirengi ani? 47 Nihunange ibushea imbu bwasusa emwea ngu unimisange, n'urukirange ebinwa byani n'ikora byo: 48 wasusanyiwa na mwea wumbanga numba. Watima nguru eroto n'ieya na mu rutandare. Kuruma nampo, wûmba emusingi hiyo n'erutandare n'iumba enumba hiyo n'emusingi. Mbura nyankende yarekia yamake, erusi rwarisa n'emikombi y'irasa mu numba njo, ina itatengi, bushwa mbu yimbwanga shu. 49 Ina ingu warukira ebinwa byani na watangaronja byo, wasusanyiwa na mwea wumbanga numba mu roto na nti tíwimba musingi. Emibimbi yarekia y'irasa mu numba njo, mu kashangi ho kakeke, yenduka n'ikakukara.»