1 Kuruma naha, Yesu weta mu sambungu nkiri-nkiri n'eseke-seke nti uhanange n'itura eMwasi Wakonda w'eBwami bwa Ongo. Esantumwa sae ikumi na sibi sabesenga hima nae, 2 na bamina bima mbi baramyiwanga nae bifwasi na makoni ampe. Munkati n'ebamina mbo, habesenga uma erina rae nge Maria, ingu ubikirwange mbu wa ku Makitara ingu wakianga Yesu wahambura mo bifwasi birinda, 3 na Shani mukari wa Kusa, murangi w'ebehe bya Herote, hima na Susana na bampe bingi. Ebamina bano babesenga bakutongǎ behe byabo mwisake Yesu n'esantumwa sae.

4 Bea ba kinsi ubungu babesenga biyerengi Yesu, na kikembe kikiri cha bea bakumanana. Nampo Yesu wakere bo emushinga uno mbu:

5 «Mweki uma wendanga keka mbuto sae. Warekia urekeraange esambuto mu rishwa rae, sima sarare mwendende n'ense. Ebea banyenchaa to n'emirónge yara to.Emweki urekeraange esambuto sae 6 Simpe sakire habasirwa n'erutandare. Sarekia samashuka, sakama bushwa n'erirukirwa mecha. 7 Simpe mbuto sakire munkati n'emenke. Emenke njo yashuka hima n'embuto n'iekenya to. 8 Ina simpe mbuto ito sarare mu oto rwakonda, sashuka na kira kakobe kabuta mpinga iyana.»

Yesu warekia wamakinda ieba ebinwa bya, weba mbu: «Ingu uri n'emate erirukira warukire!»

9 Ebanafunsi ba Yesu bamushisha ke buni nge bweba emushinga ngo. 10 Wasako bo mbu: «Banu mumashee nchumo y'erisiba enama y'eBwami bwa Ongo, ina ntí ngebumbo mu bea bampe. Ibo nerengi bo ebinwa bino mu ngano, kongo

‹Bakae ina batasungi kikai,

barukire ina batasibi kikai.›»*

11 Yesu weba mbu: «Emushinga w'emweki weba buno mbu: embuto nge kinwa cha Ongo. 12 N'embuto eyararenga mwendende n'ense nge sasusanyiwa n'ebea barukiranga ekinwa cha Ongo. Ina Mushumbu weyanga kakuto ekinwa ncho mu mitima yabo kongo batasimiri n'ikocha ishukara. 13 Esambuto nsi sararenga hutandare sasusanyiwa nambi barukiranga ekinwa cha Ongo n'isimira cho na ngoa. Ina ekinwa ncho kitarikanga na miri kumunda nabo. Basimiranga cho mu ntambi nkeke ho, emyereko yamahiere bo nti basia cho. 14 Embuto nsi sakirenga munkati n'emenke sasusanyiwa n'ebea mbi barukiranga ekinwa cha Ongo. Ina eminubo, ebusoki n'erishima by'echuo byekenyanga ekinwa ncho mu mitima yabo. Ngyasingwanga batabuti byuma byako. 15 Na nsi esararenga mu roto ndu rwakoma, ito sasusanyiwa n'ebea mbi barukiranga ekinwa cha Ongo n'ibika cho mu mutima wakonda na w'iira. Bimbo nge baranganga ekinwa ncho n'isumya mutima n'ihiere mwibuta byuma byakonda.»

16 Kuruma nampo, Yesu weba mbu: «Kusira mwea wamusacha eritara n'ibumbe ro mu kikai abe warie ro kumunda n'entange. Ina urembeanga ro mu kango kongo ebakimengi mu numba basunge echaka. 17 Kiti nchi chabiswa kisetaburwayo, na kinsi nama isesaayo hambuka.

18 «Kai mukohyanga n'eburukirange banu ebinwa. Bushwa mbu ingu urikire na kikai wasenikwa tu kimpe, ina ingu usira kikai wasenyakwa nanchi chanikirengi we mbu chae.»

19 Otu ruma, banachabo Yesu na nina beya kamusunga, ina ntíbakochanga imusunga bushwa n'ekikembe kikiri ch'ebea. 20 Ngerikia ke ebea bere Yesu mbu: «Banakinu na nsoko basimana hambuka, basondange ikusunga.» 21 Ina Yesu wasako bo mbu: «Banakitu na koyo nge bimbi barukirange kinwa cha Ongo n'ikora cho.»

22 Otu ruma Yesu wakime mu mutumbu hima n'ebanafunsi bae. Were bo mbu: «Tusoke mu o mwiri w'enyansa.» Benda. 23 Barekia basokange, Yesu wenda toro. Hiha-hiha, iuhu rasuma rikaso mu nyansa. N'emecha abucha ikime mu mutumbu, beya mu ngerero y'isonda itia. 24 Ebanafunsi bae bakensere kwihi nae, bamusimo nti bebange mbu: «Nyere Kuritu, Nyere Kuritu, twakwa!» Yesu warekia wabambuka, wafine emibimbi, nayo yakoba n'emecha na o akoba.Yesu wafine emibimbi y'emecha 25 Nampo ke Yesu washisha ebanafunsi bae mbu: «Erisimira rinu riri kuni?» Basubaha n'ishishara, babucha ishishana mbu: «Mwea wa buni uno? Ufinengi emibimbi n'enyansa, nabyo byamusubaha nakuba!»

26 Kuruma nampo, Yesu n'ebanafunsi bae basoka enyansa. Basia emutumbu mu chuo ch'eBakerasi, mu o mwiri w'echuo cha ku Ngariraya. 27 Yesu wakianga watuka mu mutumbu, wakumanana na mwea uma murubungu ntwatingirwa na bifwasi. Emwea ngo wamananga matu mingi ntwatambaranga tu nchangi, na nti watarikanga tu mu numba, ina ekutuburi ho. 28 Warekia wasunga Yesu, wirake na kwirunda ekwansi mu makako a Yesu, n'ieba mu murenge mukiri mbu: «eYesu Musike wa Ongo ingu uri hiyo n'ebiti, mbeni kuri kinwa munkati ani nabe? Nikuhemange, ang'ininubya!»

29 Webanga mbo bushwa mbu Yesu wabesenga wamere kifwasi ncho mbu kituke kumunda n'emwea ngo. Ekifwasi ncho chabesenga kitingengǎ emwea ngo meta mingi. Nakiro mbu bamumina emaboko n'ebisando mu burebure na byuma kongo wataromboki, wabesenga ukekeraanga byo. Ekifwasi ncho chabesenga kimutaangǎ inku kutarikanga bea. 30 Yesu wamushisha mbu: «Erina rabe ng'inye?» Nawe wasako mbu: «Erina rani ‹Kikembe.›» Wasakonga mbo bushwa mbu kumunda nae kwabesenga bifwasi bingi. 31 Ebifwasi mbyo byakonga Yesu mbu wamahensa bo kiro warekera bo ekwirunga.

32 Nampo habesenga nti harikire iimba rikiri ra mpunu sihuange hambasiro n'erou. Ebifwasi mbyo byakonga Yesu nguru mbu wareki byo, bikimi mu riimba r'esampunu. Yesu warisia byo. 33 Ngerikia ebifwasi byatuka mu mwea ngo n'ikime mu sampunu. Eriimba riti r'esampunu rahita n'erou n'ikwirekera mu nyansa n'itia.Esampunu satia mu nyansa 34 Ebasumba b'esampunu barekia basunga ekinwa ncho, benda tete katura emwasi ekumbuka n'ekutunsari. 35 Ebea beya kasunga ebyameta. Barekia beya hari Yesu, bakumana emwea ngo wamakuturwa mo ebifwasi ntwarika mu makako a Yesu. Emwea ngo wabesenga nti wamambara nchangi, n'ebwenge bwae nti bwamakuruka. Ebea mbo basubaha. 36 Ebasunganga ebyakweta, babucha itura emwasi kuri bampe bea imbu bwakukianga emwea ngu wabesenga n'ebifwasi warama.

37 Ebea bati b'echuo ch'eBakerasi batingirwa na koha nguru. Bushwa nancho, bere Yesu mbu: «Tutukiriri mu chuo kitu.» Ngebumbo, Yesu wakime mu mutumbu na kwikuruke rae.

38 Emwea ngu wakuturwanga ebifwasi wahema Yesu mbu wendi hima nae, ina Yesu wamutinire, wamwire mbu: 39 «Kuruka ku kwinu, enda katura ebiti byamakukore Ongo.» Emwea ngo wenda kurwabo n'itura ebiti murubungu ruti ebyakumukore Yesu.

40 Yesu warekia wakuruka wasoka mu umpe mwiri w'enyansa, nkumanano nkiri yamukoke na ngoa bushwa mbu ebati babesenga bamurindirengi. 41 Nampo, mukwakare uma wa sinangoki mbu nge Yairo weya. Wisunda ekwansi mu bisando bya Yesu n'imuhema mbu weye ku kwae, 42 bushwa mbu engomo yae y'ekikumi yabesenga iri mu nsanga nareke. Ekikumi ncho chabesenga kiri na myaka buna ikumi na ibi.

Yesu warekia wendange kwa Yairo, kikembe kikiri cha bea chabesenga nti kimukutakutange. 43 Mu kikembe ncho mwabesenga mumina uma warisamba bukoni bwituka mo nchama. Wabesenga wamahea n'ebukoni mbo myaka ikumi na ibi. Wabesenga ntwamahea ebehe byae biti kuri ebanganga. Ina kwarukwa na uma ewakochanga imuramya. 44 Emumina ngo wasaire Yesu kuruma nae, waturana mwendende enchangi yae. Hiha-hiha, ebukoni bwae bwerituka enchama bwarama nakuba.

45 Yesu washisha mbu: «Inye ngwamanitinge mo?» Ebea bati bituna, ina Petero weba mbu: «eNyere Kuritu, utungasunga mbu bea bingi bakutimba n'ikukutakuta?» 46 Ina Yesu weba mbu: «Kuri ho mwea ewamanitinge mo, bushwa mbu nasunga ntyemaa amanituka mo.» 47 Emumina ngo warekia wasunga mbu bamamukima, wirisha wisine nti utitimanengi na boba na kwisunda mu makako a Yesu. Nampo habusondori n'ebea bati, watura echakusingwa wamutinge mo nambu wamarama we hiha-hiha. 48 Yesu ke wamwire mbu: «Emwisiani, erisimira rabe ramakushukaya. Enda rabe mu buhoro.»

49 Yesu warekia ukiri webange ebinwa bya, kwa Yairo mukwakare w'esinangoki kwasaa mwea uma n'iere Yairo mbu: «Enyere kuritu, Oho! Mwisyabe wamakera emutima! Ang'inubya tu eMuhani.» 50 Ina Yesu warekia warukira mbo, were Yairo mbu: «Ang'isubaha, simira ho, waserama.»

51 Yesu warekia weya mu numba ya Yairo, ntíwananga ikime mo na umpe mwea warenga Petero, Yohana, Yakobo, hima n'ishe w'emwana na nina. 52 Ebea bati babesenga barengi na kwikama-kama bushwa n'erikwa r'ekikumi ncho. Ina Yesu were bo mbu: «Kiro mure, bushwa mbu ntíwakwa ina urere!» 53 Ebea mbo babucha imusea, bushwa ibo basibanga mbu wamakind'ikwa. 54 Yesu wamutinge mu rikasa n'imwire mu murenge mukiri mbu: «Emwisiani, simana!» 55 Hiha-hiha, wakurucha emutima, n'isimana. Yesu were bo mbu: «Mumunike bio.» 56 Ishe na nina bashishara nguru. Ina Yesu wahangire bo nguru mbu kiro bereka itura kuri mwea uti-uti imbi byamasunga bo.