1 Erotu rw'eriinga muranga-ranga, ebamina mbo baramuke hisinda nti bahata emarashi ngi atunganyangá bo. 2 Bakianga bameya ho, bakumana erikoi rikiri ndi rabesenga raribia erubi rw'erisinda nti ramashikwa kore n'erisinda. 3 Bakime kumunda n'erisinda, ina ntíbakumananga mo ekinda cha Nyere Kuritu Yesu. 4 Nampo barukwa busekia bo. Hiha-hiha, kumushi nabo hasungwa babume babi nti bambara nchangi sisanange nguru. 5 Ebamina batingirwa na boba nguru, nabo bindamya emintwe yabo ekwansi. Ina ebabume mbo bere ebamina mbu: «Bushwa nki banu musondekanyange mwea ngu ushere munkati n'ebakwi?Ebomina h'isinda ra Yesu 6 Iwe usira tu hano, wamafuka! Musubukianga ebwabwirenga we nt'ukiri mu chuo cha ku Ngariraya. 7 Wamwirenga mbu iwe eMwana w'eMwea rakomenwa wasiburwe mu bea b'ensambi. Wamwirenga tu mbu wasetundikwa mu musaraba, ina wasefuka kuruma na matu ashatu.»

8 Nampo, ebamina mbo basubukia ebinwa byebanga Yesu. 9 Batuka hisinda, benda kature ebinwa mbyo kuri esantumwa ikumi na nima na kuri ebampe banafunsi. 10 Ebamina mbi baturenga esantumwa ikumi na nima emwasi nge bano: Maria wa ku Makitara, Shani na Maria nina wa Yakobo, hima na bampe bamina. 11 Ina esantumwa ntísasimiranga emwasi ngo, bahaka mbu binwa bya busa-busa. 12 Ina Petero iwe wasimana n'ienda hisinda nt'ukanyahange. Warekia weya ho, windama n'irungurira kumunda erisinda, ina wakumana ho emirembe y'enchangi njo, wakuruka kukwae na nt'ushisharange mumbi ebyakweta.

13 Erotu ruro-ruro ho, kai banafunsi babi ba Yesu babesenga bendange murubungu rwa ku Emausi, ubungu ndu rwabesenga ruri mu birometere buna ikumi na kima na ku Yerusaremu. 14 Babesenga bashambarange bushwa n'ebinwa mbi byakweta. 15 Barekia bakiri bebange n'ishishana, Yesu wisine wakumana bo n'imisanya nabo mongo. 16 Babesenga bamusungange ina emeso abo abumbirwanga kongo batamuteereri. 17 Yesu washisha bo mbu: «Banu mwendange n'ishambara binwa nki?» Batindira na nti bari na bonso mu mitima yabo. 18 Uma mubo wabikirwa mbu Kireopa wamusako mbu: «Kai mu bea bati bari rero ku Yerusaremu ǒngo kisine ho nge ntíǒngosi ebinwa byakweta ko mu matu abi ano?» 19 Yesu washisha bo mbu: «Mbeni binwa nki?» Nabo mbu: «Ebyakusunga Yesu wa ku Nasareti. Wabesenga mutahwa na nti uri na maa mu rieba na mu rironja ebishisharo mu makako a Ongo na kuri ebea bati.

20 «Ebakwakare bitu b'ebakuhani hima n'ebampe bakwakare bitu, bamusibura kongo wakererwa ubansa rw'ishurwa. Nampo bamutundika mu musaraba. 21 Twabesenga twamamwinyihire mbu iwe ngwaseshukayayo eBaisiraeri. Kai, oho! Na runotu ngie matu ashatu ebinwa mbyo byeta. 22 Na bamina bima ba mu kikembe kitu bakutushishaya. Baramukeyo hisinda, 23 ina ntíbasungayo ekinda chae. Bakurukayo n'itwire mbu ebamaraika bakusaire bo nsisu n'iere bo mbu Yesu munkangwe. 24 Banakitu bima hotu bendayo hisinda, nabo basungayo ebikai biti imbu bwakukianga ebamina bere bo. Ina nabo ntíbakusunga ekinda chae.»

25 Nampo Yesu were bo mbu: «Banu birunge! Banu mutusibanga tete ebinwa byebanga ebatahwa! 26 Mbeni ntírakomenwa rero mbu Kirisitu wasunge minubo kubusondori n'erikime mu busime bwae?» 27 Ngerikia ke Yesu wansonsomore bo ebiti byaandikwanga kuri we mu Kitabo Chashurukara cha Ongo. Wabuchie mu bitabo mbi byakianga Musa waandika, n'iyere mu bitabo biti by'ebatahwa.

28 Bakianga babungurengi erubungu rwendange mo ebanafunsi babi mbo, rasungwa buri Yesu iwe usondange ienda kore, 29 ina ebanafunsi mbo bamuhema warike nabo bushwa mbu abesenga ngie murisisi n'ebutu nti bwamasiro. Nampo wakime mu numba n'irika nabo. 30 Entambi Yesu wakianga urisange nabo, watinge mukati, watata Ongo. Wanoa o n'ininka bo o. 31 Nampo ke emeso abo oboka, nabo bamuteerera ke. Ina hiha-hiha, Yesu wariribana mu meso abo. 32 Babucha ishishana mbu: «Iira! Etambi yebange rero we nitu mu munse n'itunsosomore eMitiro Yashurukara, emitima yitu yakubesenga ntyamarisa ngoa!»

33 Hiha-hiha basimana n'ikuruka ku Yerusaremu. Bakumana esantumwa ikumi na nima hima n'ebampe banafunsi himpi habesenga hatumana bo 34 nti bebange mbu: «Iira, Nyere Kuritu wamafuka! Simoni wakumusunga!» 35 N'ebanafunsi babi mbo nabo bature babine ebyakusunganga bo mu munse, nambu bwakukianga bateerera Yesu entambi nji yakunoanga we emukati.

36 Ebanafunsi bakianga bakiri bebange mu binwa mbyo, Yesu wisine wisaisha munkati-nkati nabo, n'iere bo mbu: «Mubesi na buhoro!»

37 Bisarima na batingirwa na koha, bahaka mbu batingwa na kifwasi. 38 Ina Yesu were bo mbu: «Bushwa nki mumakwa boba? Bushwa nki banu munitikatikange? 39 Mukai emine n'ebisando byani: mu riira, ani nge uno! Munitingi mo, na munikai, bushwa mbu ekifwasi kitarikanga na mununku n'ikua, ina ani niri nabyo imbu bunisungange banu.»

40 Wakianga ukiri webange mbo, washea bo emine n'ebisando byae. 41 Ebanafunsi mbo babesenga ntíbasimira nensi ebinwa mbyo bushwa n'esangoa n'erishishara. Nampo ke Yesu washisha bo mbu: «Mbeni banu muri na bio hano?» 42 Bamuninka chunda kima cha kikwa chahwa. 43 Watinge cho n'irisa cho mu meso abo. 44 Kuruma nampo were bo mbu: «Ematu abesenga ani ninu, nabwirenga mbu ebinwa biti byaandikwanga bushwa nani mu Kitabo ch'eMyomba na mu mbi by'ebatahwa, na mu kitabo ch'eSaburi, byakomenwa biti bibererere.»

45 Nampo ke Yesu wobora bo emyanikiri kongo bateerera ebwaandikwa eMitiro Yashurukara. 46 Were bo mbu: «Raandikwa mbu Kirisitu wahwa inubiwa, na wasefuka munkati n'ebakwi kuruma na matu ashatu.* 47 Na mu rina rae nge basehubiri ebea bati mbu bareki esansambi sabo kongo basasirwa to. N'emurimo ngo ubuchii ku Yerusaremu. 48 Banu ngi mwendi muturange ebiti mbi byakusunganga banu. 49 Munirukiri, naseburebeka echakianga Tita waburaa. Ina murike kasa ku Yerusaremu ieya n'erotu rwasesheeyo banu emaa ngi asetuka mu mbingu*.»

50 Kuruma nampo, Yesu wenda nabo kwihi n'erubungu rwa ku Betania. Nampo waria emine yae kwiyo n'ikasane bo. 51 Warekia ukiri ukasanengi bo, wasia bo n'itarishwa mu mbingu.Yesu wataya mu mbingu 52 Ina ibo bindama mu makako ae, kuruma nampo bakuruka ku Yerusaremu na ngoa ningi. 53 Babesenga barikanga mu Numba ya Ongo ematu ati nti bamutatange.