1 Otu ruma, Yesu warikecha esantumwa sae ikumi na sibi, waninka to maa na burai bwerihensa ebifwasi n'iramya ebakoni. 2 Watuma to katura emyasi y'eBwami bwa Ongo n'iramya ebakoni. 3 Were to mbu: «Mu ruendo rwinu, anga muria kikai kiti-kiti abe nkoma, abe inku, abe bio, abe behe, kira mwea warianga ho nchangi nima. 4 Murikanga mu numba yasekokerwa mu banu nambu bwatuki banu murubungu ndo. 5 Mu kinsi ubungu indu rwasekia bisa kuro batina ibukoke, mutukanga mu ro nti banu mutitongi emukungú w'ebisando byinu.* Ekinwa ncho kiseshea bo mbu bakukora bubi.» 6 Esantumwa senda, seta ubungu m'ubungu, siturange eMwasi Wakonda n'iramya ebea ekuti.

7 Herote, mukwakare w'echuo cha ku Ngariraya, warukira emyasi iti y'ebinwa bikorwange. Nawe wakwa koha bushwa mbu bea bima babesenga bebange mbu Yohana Murubiki ngwamafuka. 8 Na bampe babesenga bebange mbu emutahwa Eria nge wamasungwa tu. N'ebampe beba mbu uma mu batahwa ba karekare nge wamafuka. 9 Ina Herote weba mbu: «Ani nge nebanga mbu bakere emuntwe wa Yohana. Mbeni ingu nirukirange emyasi yae, iwe inye tu?» Bushwa nancho, Herote wasonda ke buni bwasesunga we Yesu.

10 Esantumwa sarekia sakuruka, bature Yesu emyasi iti nji yakukora bo. Naha wenda nabo hima. Kuruma nampo, Yesu wishika nabo kwihi na ku Betesaita. 11 Ebikembe by'ebea byarekia byamasiba mbu kuko nge kwameta we, byamutucha ko. Yesu wakoke bo n'ibucha ieba nabo bushwa n'eBwami bwa Ongo. Nampo waramya ebati mbi bahunanga mbu waramye bo.

12 Emwishi warekia wamabucha itamba, entumwa ikumi na sibi sa Yesu samweyere n'imwire mbu: «eNyere Kuritu, Reke ebea bano bendi kasonda nkambi na bio mu sambungu esiri kwihi-kwihi bushwa mbu hano turi hasira bea.» 13 Ina Yesu wasako bo mbu: «Banu bisine muninke bo bio!» Nabo bamusako mbu: «Bate turi ho na mikati isanu na bikwa bibí. Ǒngo uhunange mbu twendi kachure ebea bati bano bio?» 14 Himpo habesenga nti harikire babume buna erefu isanu. Yesu were esantumwa sae mbu sirikeche bo mu bikembe bya bea makumi asanu-asanu.

15 Esantumwa sakora bumbo, sarikecha ebea bati ekwansi. 16 Kuruma, Yesu watinge emikati isanu njo n'ebikwa bibí mbyo, wakae ekwio, watata Ongo. Nampo, wabengaa byo, waninka byo ebanafunsi bae mbu babanyii ebea bati. 17 Ebati barisa n'isukuta. Esantumwa sasombo ebyasianga bo, barísia mitundu ikumi na ibi.Yesu wasukucha bea bingi bio

18 Otu ruma Yesu wabesenga uhemange Ongo iwe wisine. Ebanafunsi bae babesenga barikire kwihi nae, washisha bo mbu: «Mbeni ebea bebange mbu ani ng'inye?» 19 Nabo mbu: «Bima bebange mbu ǒngo nge Yohana Murubiki, bampe mbu ǒngo nge Eria, n'ebampe mbu ǒngo uma mu batahwa ba karekare ewafukanga.» 20 Yesu washisha bo mbu: «Na banu ke mwebange mbu ani ng'inye?» Petero wamusako mbu: «Ǒngo nge Kirisitu ingu watutumire Ongo.»

21 Yesu wahangire bo nguru mbu kiro bereka iture umpe mwea emwasi ngo. 22 Were tu bo mbu: «Rakomenwa ani Mwana w'eMwea ninube n'itinwa n'ebakungu, n'ebakuhani hima n'ebahani b'eMyomba. Niseshurwa, ina erotu rw'emeta ashatu nti nafuka.»

23 Ngerikia were ebea bati mbu: «Kuba emwea warae inimisa, watendi wiraengi mo. Ina wenda uriange emusaraba wae n'initucha ematu ati. 24 Bushwa mbu ingu usondange iramya ebuingo bwae waseriminyayo bo, ina ingu waseshia ebuingo bwae bushwa nani waseramyayo bo. 25 Emwea wamashee ebusoki bw'echuo kiti, wabese ntwamashee kikai nki ke kuba wariminya ebuingo bwae abe kwitaa mu roku wisine? 26 Emwea wamanikwire nkene n'ikwire ebinwa byani nkene, ani eMwana w'eMwea nasemukwireyo hotu nkene. Rasebeseyo buno mu rotu ruseyayo ani mu busime bwani, na nge busime bwa Tita, na nge bw'ebamaraika bashurukara. 27 Iira, nibwirengi mbu: bima mu banu mbi muri hano, batakwiyo kuti ntíbasunga nensi ebwasimana eBwami bwa Ongo.»

28 Kuruma na matu buna munani Yesu warekia wamakinda ieba ebinwa mbyo, iwe waringa Petero, Yakobo na Yohana, wataya nabo hiyo n'erou kahema Ongo. 29 Warekia uhemange, embaso yae yabinduka, n'esanchangi sae wasana n'inyenya nguru. 30,31 Nampo, kumunda n'echaka ncho kwasaa babume babi, Musa bana Eria. Ebabume babi mbo, babesenga nti bebanange na Yesu bushwa n'ebusekinda we emurimo wae, mu rikwire ku Yerusaremu. 32 Entambi njo, Petero na babine babesenga bamenda toro twingi. Ina barekia basimuka, basunga ebusime bwa Yesu n'ebabume babi mbo babesenga basimana hima nae. 33 Ebabume babi mbo barekia basonda isiana na Yesu, Petero wamwire mbu: «eNyere Kuritu, rakonda buno buri bate hano. Twimbe hema ishatu: nima yabe, impe ya Musa na impe ya Eria.» Nae wabesenga webange nti tíwosi echebange we.

34 Mu ntambi Petero wabesenga webange mbo, erutundo rwahita n'ibumbe bo. Esantumwa nso sasubaha mu ribumbirwa n'erutundo ndo. 35 Kwarukirwa murenge uma wasaa mu rutundo ndo ntwebange mbu: «Uno nge Musikyani ewarondoranga ani. Mwendi banu mumutee mate!» 36 Kuruma n'erirukira emurenge o, Yesu wasungwa ntwamasia wisine. Ebinwa biti mbyo ebyasunganga esantumwa mpo, ntíbaturenga mwea uti-uti enama njo ematu ati ngo.

37 Mu richa r'ebutu, Yesu n'entumwa sae ishatu nso bahita erou. Kikembe kikiri cha bea bamweyere. 38 Hiha-hiha, mwea uma munkati n'ekikembe wakua mbu: «eMuhani, nakukonga unikairi mu musikyani, bushwa mbu iwe nge mwanani uma ho! 39 Ukiange wamatingirwa n'ekifwasi, hiha-hiha, emwana ntwirake, nti chamuinya-inya nguru n'erihuro nti ramutuka mu bunu. Ekifwasi ncho kitangamutuka mo tete, kimunubyange nguru. 40 Nakongayo ebanafunsi babe mbu bahense cho, ina karankuso.»

41 Yesu wasako mbu: «Ah! Banu ebea b'ematu ano, banu bea bema! Murukwa n'erisimira! Naserikayo ninu tu matu anga? Niseshireyo kuni n'erirukira ebinwa binu? Risha musikyabe hano.» 42 N'emwana ngo warekia weyange hari Yesu, ekifwasi ncho chamutaa ekwansi n'imuinya-inya nguru. Ina Yesu wakeme cho, waramya emwana n'imukurucha kuri ishe. 43 Ebea bati bashishara mu risunga ebunkangwe bwa Ongo.

Ebea bati barekia bashisharange mu binwa biti ebyamaronja Yesu, iwe were ebanafunsi bae mbu: 44 «Munitee emate shu: Ani Mwana w'eMwea nisesiburwa mu mine y'ebea.» 45 Ina ibo batateereri ebweba ebinwa mbyo, bushwa mbu byabesenga byamabiswa kuri bo kongo batasibi byo, nabo basubaha imushisha buni nge bwebange byo.

46 Otu ruma, ebanafunsi ba Yesu basonda isiba inye nge mukwakare munkati nabo. 47 Yesu warekia wamasiba emihaki yabo, warisha mwana, wamuria hamushi nae, 48 were bo mbu: «Emwea uti wasekokeyo emwana uno mu rina rani, ntyani ngwamanikoke. Na kinsi ngu wanikoke, wakoke ingu warinituma. Bushwa mbu emwanunke munkati ninu nge mukwakare.»

49 Ngyasingwanga Yohana weba mbu: «eNyere Kuritu, twakusunga mwea uma uhensange kifwasi mu rina rabe, twamuhangireyo, bushwa mbu iwe ntíuma mu bate.» 50 Yesu wamusako mbu: «Kiro mumuhangire, bushwa mbu kinsi ingu ntímurenda winu urikire mu ruharo rwinu.»

51 Ematu erikuruka ra Yesu mu mbingu arekia ari keya, wasunga mbu rakonda wataye ku Yerusaremu. 52 Watuma kasa bea bima kubusondori nae. Benda, beya mu ubungu ruma rwa Basamaria kongo bamutunganyie ekwasehiere we. 53 Ina ebea b'erubungu ndo batina ikoke Yesu ku rwabo bushwa mbu wabesenga uteanange ienda ku Yerusaremu.* 54 Ebanafunsi bae, Yakobo na Yohana barekia basunga mbo, beba mbu: «eNyere Kuritu, ushima tuheme kasha kahitiri bo ituka ekwio n'ishiria bo?» 55 Ina Yesu wikebera kuri bo n'ifine bo. 56 Ituka mpo benda mu rumpe ubungu.

57 Yesu n'ebanafunsi bae barekia bari mu munse, mwea uma were Yesu mbu: «Nendi nikumisange ekuti kwaseta ǒngo.» 58 Ina Yesu wamwire mbu: «Emiterere irikanga na biribu by'isame mo, n'emirónge irikanga na birumba, ina ani Mwana w'eMwea nisira n'ehamusame ani.»

59 Yesu were umpe mwea mbu: «Nimise.» Emwea o nae weba mbu: «eNyere Kuritu, nikuhemange mbu nendi kasa kataa tita.»* 60 Yesu wamwire mbu: «Reke ebakwire batae ebakwi babo, ina ǒngo enda katura emwasi w'eBwami bwa Ongo.»

61 Umpe mwea were Yesu mbu: «eNyere Kuritu, nendi nikumisange, ina nikuhemange mbu nendi kasa karaa eruanda rwani.» 62 Yesu wamusako mbu: «Emwea wamabucha ihinga nukaengi tu kuruma, nti twakomenwa ikora mu Bwami bwa Ongo.»