1 Otu ruma, Yesu wasimana mu kirindo ch'enyansa Kenesareti* na bea bingi nti bamukutakutange kongo barukira ekinwa cha Ongo. 2 Wasunga mitumbu ibi kumushi n'eririba, n'ebarobi nti bamatuka kumunda nayo, babesenga bashuange etukira twabo. 3 Yesu wakime mu mutumbu uma, na nti nge wa Simoni. Yesu wamwire mbu wahimire o kore kakeke n'ensocho. Nampo warika mo, wabucha ihana ebea.

4 Warekia wamakind'ihana, washisha Simoni mbu: «Kensea emutumbu ehari emecha mingi na muhiche etukira twinu, murobe bikwa.»

5 Simoni wamusako mbu: «eMuhani, twamanuba n'eriroba emutu uti, twakuhina. Ina bushwa mbu ǒngo nge umeba, nasehicha tu etukira.»

6 Barekia bamahicha etukira, bashura bikwa bingi nguru n'etukira twahiere mu ngerero y'isonda ibereka.Petero na banachae bashura bikwa bingi bushwa na Yesu 7 Nampo basime banachabo b'emutumbu umpe mbu beye kasake bo. Nabo beya, barisia emitumbu ibi bikwa, nayo yabucha itia. 8 Simoni Petero warekia wasunga ebinwa mbyo, waanda emaru mu makako a Yesu n'ieba mbu: «Nyere Kuritu, umatukange kwihi nani, bushwa mbu ani mwea wa nsambi!» 9 Simoni webanga mbo bushwa iwe na babine bati bashishara nguru murisunga ebwingi bw'ebikwa ebyashuranga bo.

10 Yakobo na Yohana basike ba Sebendayo ebabesenga hotu barobi hima na Simoni, nabo bashishara. Yesu ke were Simoni mbu: «Kiro usubaha, itukire enompena ukukora murimo w'iroba bea.»

11 Ngerikia ke bakurura emitumbu yabo kumushi, bareke ebiti n'imisa Yesu.

12 Yesu warekia uri m'ubungu ruma mu chuo ncho, kwasaa mwea uma nti urisere bibembi emubi uti. Warekia wasunga Yesu, windama embaso ieya n'ekwansi, n'imuhema mbu: «eNyere Kuritu, umasasa, umuniramya*.» 13 Yesu woro emwine, wamutinge mo n'imwire mbu: «Nashima! Rama!»

Hiha-hiha, emwea ngo warama ebibembi. 14 Yesu wamuhangire nguru mbu: «Ang'iture mwea emwasi uno. Ina enda kishea kuri ekuhani. Nanko, ukutonga ebisabo imbu bwebanga Musa, kongo rashea mu bea ebati mbu umarama.»

15 Na kiro mbo, emwasi wa Yesu wenda nkuru na bea bingi benda batumanange mwirukira ebinwa byae n'irama emakoni abo. 16 Ina wabesenga ntwishikange nabo kwahehe n'ihema Ongo nko.

17 Otu ruma Yesu warekia uhanange ebea. eBafarisayo n'ebahani b'eMyomba ebatukanga mu kira ubungu rw'echuo cha ku Ngariraya na ku Yundea n'ituka ku Yerusaremu, babesenga nti barerika mpo. Yesu wabesenga nti uramyange ebakoni mu maa a Nyere Kuritu.

18 Bea bima beya na nti baria mwea wa rumbonsa mu kipoi. Basonda inse y'imukimisha kumunda n'enumba kongo bamutereka hamakako na Yesu. 19 Ina barukwa ense y'erimukimisha kumunda bushwa n'enteko nkiri y'ebea. Bushwa nancho, bataya hamambio enumba njo, bakakura mu matebura, bahicha emwea w'erumbonsa munkati-nkati n'ebea, nt'uri mu kipoi chae, n'imusicha mu makako a Yesu.* 20 Yesu warekia wamasunga erisimira rabo, weba mbu: «Emirani, esansambi sabe samasasirwa.»

21 Ebahani b'eMyomba n'eBafarisayo babucha kwishisha mbu: «Inye mwea ngu eukambange Ongo? Inye ngwamukocha isasira nsambi, kuba ntí Ongo wisine?» 22 Yesu warekia wamateerera emihaki yabo, washisha bo mbu: «Bushwa nki banu mwishishange ebinwa biti mbyo mu mitima yinu? 23 Kini kinwa nge chatamba, mu rieba mbu: ‹Esansambi sabe samasasirwa›, abe ieba mbu: ‹Simana, enda?› 24 Nisondange musibe mbu ani eMwana w'eMwea niri na maa erisasira esansambi hano hansi.» Ngebumbo, Yesu were emwea w'erumbonsa mbu: «Ani nge nikwirengi mbu: simana, ria ekipoi chabe na kuruka ku kwabe.»

25 Hiha-hiha, emwea ngo wasimana kubusondori nabo ebati. Waria ekipoi chabesenga chikindirengi mu we, wenda ku kwae nti utatange Ongo. 26 Ebea bati bashishara n'itingirwa na boba. Batata Ongo n'ieba mbu: «Runotu, rero twamasunga binwa bya bishisharo!»

27 Kuruma nampo, Yesu watuka mu numba njo. Wasunga mukongori uma wa horo erina rae nge Rawi*, ntwarika hamesa yae y'erituanya ehoro. Yesu wamwire mbu: «Nimise!» 28 Rawi wasimana, wasia ebiti n'imumisa.

29 Ituka mpo Rawi waronjee Yesu bio bingi mu numba yae. Bakongori bingi ba horo na bampe bea bingi babesenga barisange hima nabo. 30 eBafarisayo n'ebahani b'eMyomba barekia bamarukira mbo, babucha ihuhuma. Bashisha ebanafunsi ba Yesu mbu: «Bushwa nki banu murisange n'iomore hima n'ebakongori b'ehoro, n'ebakori b'ebibi?»

31 Yesu wasako bo mbu: «Ebankangwe ntibarae mu munganga, ina ebakoni. 32 Nti neyanga kabikira ebea mbi baombokara mu makako a Ongo, ina ebari n'ebubi kongo babunduka ituka mu sansambi sabo.»

33 Bafarisayo bima bashisha Yesu mbu: «Ebanafunsi ba Yohana hima n'ebitu baronjanga mahemo na bihangisanga ringi irisa bio, ina ebanafunsi babe ibo barisange n'iomo.» 34 Yesu wasako bo mbu: «Banu mwanikirange mbu mumakocha ihangire ebira ba'ngu waherucha irisa bio entambi ukiri hima nabo? Anga! 35 Ina kuseyayo matu shiherucha ngo wakuturwa munkati nabo, n'ematu ngo ke nge asekwihangisayo bo irisa.»

36 Yesu wakere bo emushumo uno: «Kusira mwea ngu wamukera kiraka mu nchangi nchasha n'iranda cho mu nchangi yamanaa. Kuti wakia mbo, wabese nti wamabenga enchangi nchasha, n'ekiraka ch'enchangi nchasha kitamukocha itingane n'enchangi yamanaa. 37 Na kusira hotu mwea wamuria ndifai nchasha kumunda na nku y'ohu* esamanaa. Emwea wámaronja mbo nti endifai nchasha isebuya esanku s'ekihu; nampo endifai isekubuka n'esanku sisekwa busa. 38 Ina rakomenwa iria endifai nchasha kumunda n'ohu rushasha. 39 Emwea wamomo mu ndifai ya karekare wataraenga tu mu ndifai nchasha, bushwa waseba mbu: ‹Endifai ya karekare yashamuka nguru!›»