1 Yesu watuka ekusi muri Yorondani ntwamarisa eMutima Washurukara. N'eMutima ngo wamwenja mu bweru. 2 Nanko, Mushumbu wamwereka mu matu makumi anye. Mu matu ati ngo, Yesu ntwarerisa bio. Kuruma n'ematu ngo, wakwa rwaka.

3 Kuruma nampo, Mushumbu wamweyere n'imwire mbu: «Kuba ǒngo Musike wa Ongo, eba n'erikoi rino ribinduki mukati.» 4 Yesu wamusako mbu: «Raandikwa mu Mitiro Yashurukara mbu: ‹Emwea watakoche iishi bushwa n'emikati ho.›»*

5 Ituka mpo, Mushumbu wamuria hakangama nguru. Na murikohya, wamushea emami ati echuo, 6 n'imwire mbu: «Nasekuninka emaa n'ebutumba bw'emami ati ingi, bushwa mbu nareninkwa ebiti mbi, nani namuninkana byo mu kinsi mwea ewashima ani. 7 Umanisimanike, ebiti mbi bisebesa byabe.» 8 Ina Yesu wamusako mbu: «Raandikwa mu Mitiro Yashurukara mbu: ‹Usimanikenga Nyere kurwabe Ongo wabe n'imukore iwe kisine.›»*

9 Nampo, Mushumbu wamuria ku Yerusaremu. Wamutarisha hamambio eNumba ya Ongo n'imwire mbu: «Kuba ǒngo ho Musike wa Ongo, itae ekwansi itukire hano,Mushumbu watarisha Yesu hiyo n'enumba 10 bushwa raandikwa mu Mitiro Yashurukara mbu: ‹Ongo waseere ebamaraika bae bakurange.› 11 Raandikwa mbu: ‹Basekuria mu mine yabo, kongo ekisando chabe kiro chasitara mwikoi.›»* 12 Ina Yesu wamusako mbu: «Raandikwa mu Mitiro Yashurukara mbu: ‹Ang'ienda ǒngo werekange Nyere kurwabe Ongo wabe.›»*

13 Mushumbu warekia wamakind'iereka Yesu mu sanse siti, wamureke kasa kashangi kakeke.

14 Yesu wakuruka mu chuo cha ku Ngariraya nti urisere n'ebunkangwe bw'eMutima, n'emyasi yae yeya kuti-kuti mu sankaro'nso. 15 Wabesenga uhanange mu masinangoki abo, n'itatwa n'ebea bati.

16 Yesu weya murubungu rwa ku Nasareti kwoshukenga we. Erotu rw'eSabato rwarekia rweya, wakime mu sinangoki imbu esenga buronjanga ho we. Wasimana mwisoma eMitiro Yashurukara. 17 Bamuninka ekitabo ch'emutahwa Isaya. Nampo, wobora cho, wasunga impi haandikwa mbu:

18 «Mutima wa Nyere Kuritu uri hima nani,

bushwa wamanirondora nihubiri ebasene eMwasi Wakonda.

Wanituma iture ebaminwa mbu baseoborwa

n'ebihumihumi mbu bisekae.

Wanituma kobora ebanenwa,

19 n'iture ebea imbu emwaka wameya ingu usekiayo Nyere Kuritu washea enchumo yae.»*

20 Kuruma nampo, wondonda ekitabo, waninka cho emukori w'esinangoki n'irika. N'ebea bati ebabesenga kumunda n'esinangoki babesenga nti bamukaengi nguru. 21 Yesu wabucha ke iere bo mbu: «Emitiro ino yamarukira banu hano yamabererera runotu.» 22 Ebati bamukokome n'ishishara mu binwa byakonda ebyebanga we. Beba mbu: «Mbeni uno nti mwana wa Yosefu?»

23 Yesu were bo mbu: «Iira, nosi mbu mukunire emushumo uno: ‹Emunganga, iramye ǒngo kisine!› Na bumbo tu mukunire mbu: ‹Twamarukira ebiti byakukora ǒngo murubungu rwa ku Kaperenaumu, kai kora tu byo kuno kurinu.›» 24 Nae weba mbu: «Iira nibwirengi: kusira mutahwa eusimirwanga ku rwabo. 25 Nibwirengi iira: kwabesenga bashumbakari bingi mu chuo cha ku Isiraeri mu biranga by'emutahwa Eria. Mu matu ngo, embura ntíyakenga mu myaka ishatu na chunda, na kwabese rwaka rukiri mu chuo kiti. 26 Ongo ntíwatumanga Eria kuri mwea uti-uti, ina ho kw'emushumbakari wa ku Sarepata, mu chuo cha ku Sindoni. 27 Na mu chuo cha ku Isiraeri kwabesenga hotu babembi bingi mu biranga by'emutahwa Erisha. Kusira mwea uti-uti waramanga, ina ho Naamani w'echuo cha ku Suria.»*

28 Ebea bati ebabesenga kumunda n'esinangoki, murirukira ebinwa mbyo, basubuka nguru. 29 Basimana, bakururaa Yesu ieya na hikura n'erubungu erwabesenga rwumbwa mu ntata. Bamutarisha hambasiro kongo bamurekera kumbo n'erou. 30 Ina iwe weta munkati-nkati nabo, n'ienda rae.

31 Nampo Yesu wahitire ku Kaperenaumu, mu chuo cha ku Ngariraya. Erotu rw'eSabato rwarekia rwameya, wahana ebea. 32 Nabo bashishara nguru murisunga imbu buhanange we, bushwa wabesenga uhanange bo na burai. 33 Mu sinangoki njo mwabesenga mwea uma watingirwa na kifwasi. Nae wakuwa mu murenge mukiri mbu: 34 «eYesu wa ku Nasareti, ǒngo utusondange mo nki? Ukweya katushiria? Ani nikosi nguru, ǒngo nge Mushururuka watumwa na Ongo.»

35 Yesu wamufine mbu: «Bibira, na tuka kumunda n'emwea uno!»

Hiha-hiha, ekifwasi ncho chamurekera ekwansi mu makako ebea, n'ituka kumunda nae nti tíchamubabaya. 36 Ebea bati bashishara nguru n'ishishana mbu: «Inki kino? Tutangasunganga binwa biri buno! Emwea uno uhensange ebifwasi mu bunkangwe na maa ae, nabyo byatuka!» 37 Emyasi ya Yesu yansansabana ekuti mu chuo ncho.

38 Yesu watuka kumunda n'esinangoki, wenda kakime mwa Simoni. Inabe wa Simoni wabesenga ntwamatingirwa na kaburura kasuma, bakonga ke Yesu wamuramye. 39 Yesu windama kwihi n'emumina ngo, wafine ekaburura mbu katuke kumunda nae, nako katuka. Hiha-hiha, emumina ngo wasimana n'ibucha ironjee bo bio.

40 Emwishi warekia wamasika, ebabesenga n'ebakoni babo ba kira bususe barisha bo kuri Yesu. Watereka emine yae hambasiro na kira uma mubo, waramya bo. 41 Ebifwasi byatuka kumunda na bea bingi, na nti bikuange mbu: «Ǒngo nge Musike wa Ongo!» Ina Yesu wáfine byo, na ntwasierenga byo mbu byebe, bushwa byateereranga mbu iwe nge Kirisitu.

42 Ebutu bwarekia bwamacha, Yesu watuka murubungu n'ienda kishika kwahehe. Kikembe kikiri cha bea babucha imusondekanya. Barekia bamamusunga, basonda imuhangire mbu anga wasia tu bo. 43 Ina Yesu were bo mbu: «Rakomenwa nihubiri eMwasi Wakonda w'eBwami bwa Ongo mu simpe mbungu hotu, nge chasingwa Ongo wanituma.»

44 Nae wenderana n'erihubiri mu chuo cha ku Yundea kumunda n'emasinangoki.