1 Yesu wakere ebanafunsi bae emushinga uno mwishea bo mbu rakomenwa kiro bendi bateterange mu rihema Ongo ematu ati. 2 Weba mbu: «Mu ubungu ruma, kwarikanga mushunguri wa binwa uma nti watasubahanga Ongo. Iwe wabesenga watasubahanga na nti tíwirae mu mwea uti-uti. 3 Murubungu ndo, kwarikanga hotu mushumbakari uma. Emushumbakari ngo wabesenga umweyerenga ematu ati imwire mbu: ‹Nikeri ebinwa byani ishu ebirikanga nani n'emurenda wani.›

4 «Ina kwetanga matu mingi emushunguri ngo nt'umutinirenga. Kuruma nampo waanikira kumunda nae wisine mbu: ‹Nakiro mbu ntasubahanga Ongo na ntínirae mu mwea uti-uti, 5 ina bushwa mbu emushumbakari uno waniruhya nguru, nasemuninka eriira rae kongo watendi tu weyange hano kanitaninga.›»

6 Nampo Nyere Kuritu Yesu weba mbu: «Murukire imbu bweba emushunguri uno wema! 7 Ngebumbo Ongo nae, ebea mbo barondoranga we, nambo bamurakengi mutu na mumwishi wakereyo bo erubansa ishu na watasiiyo mu risake bo. 8 Nibwirengi mbu iwe wasebuninkayo eriira rinu tete. Ina ani eMwana w'eMwea nasekiayo nakuruka, mbeni nasekumanayo mu chuo nti mukiri bea bari n'erisimira?»

9 Kwarikanga bea mbi babesenga bitatange mbu ibo nge bea baombokara mu makako a Ongo na nti banena bampe. Ngerikia ke Yesu wakere bo emushinga uno mbu: 10 «Otu ruma, bea babi bendanga kǎhema kumunda n'eNumba ya Ongo. Uma wabesenga Mufarisayo na umpe nti mukongori wa horo. 11 eMufarisayo wasimana nt'uhemange mu mutima wae mbu: ‹Tita Ongo, nakutata bushwa mbu ani ntarikanga buri ebea bampe: ibo banyai, bea ba bibí na basingirani. Nikutatange hotu bushwa mbu ntíniri buri emukongori uno w'ehoro. 12 Nihemanga mahemo erikwitinisha irisa n'iomo meta abi muriinga, na nininkananga echakumi ch'ebikai biti mbi bisheenga ani.›

13 «Ina emukongori w'ehoro iwe wasimana kore, na watashimi n'irarame ekwio. Ina wikaso-kaso mu bukuba murishea ebonso bwae na nt'uhemange mbu: ‹Tita Ongo, nikwiri bonso bushwa mbu ani mwea w'ebibi!›» 14 Nampo ke, Yesu weba mbu: «Nibwirengi mbu emukongori w'ehoro wakuruka kukwae na ntwamaansirwa eriira mu makako a Ongo, ina ntí eMufarisayo ngo. Bushwa mbu kinsi mwea ngu witarishanga wasehichiwayo, ina kinsi mwea ngu wihichanga wasetarishiwayo.»

15 Otu ruma, bea bima barishie tu Yesu tubonso-bonso mbu warie mine hiyo na to. Ebanafunsi barekia basunga mbo, bafinyae bo. 16 Ina Yesu weba mbu bamurishii ebana mbo n'ieba tu mbu: «Mureki ebana beye hano! Kiro muhangire bo, bushwa mbu eBwami bwa Ongo buri kuri bea mbi ebasusanyiwa nabo.Yesu ukasanengi ebana 17 Muriira nibwirengi mbu: kinsi mwea ngu wafundwa ikoke eBwami bwa Ongo buri mwana mukeke, watakimiyo mo karankuso.»

18 Kuruma nampo, mukwakare uma wa Bayuta washisha Yesu mbu: «eMuhani wakonda, mbeni nikie buni kongo nashee ebuingo bw'ematu ati?» 19 Yesu wamushisha mbu: «Umeba mbu nakonda bushwa nki? Kutarikanga mwea wakonda, ina Ongo wisine ho. 20 Ntíǒngosi ebweba emyomba: ‹Ang'ienda usingirana, ang'ienda ushura mwea, ang'ienda ushuma, ang'ienda ushukashuka, wendi usubaha iso na nsoko.›» 21 Emwea ngo wasako Yesu mbu: «Emyomba iti njo, nironjanga ebwebayo itukire ebuyu bwani.» 22 Yesu warekia warukira ebinwa mbyo, wamwire mbu: «Urukwa ho kinwa kima nchi chahwa ironja ǒngo: enda kachuya ebikai biti mbi biri nabe, tinge ebusoki mbo na ubanyii byo ebasene. Kuba uronja bubo, ukubese na butumba mu mbingu. Kuruma nampo, weyanga unimise!» 23 N'emwea ngo warekia warukira ebinwa mbyo, watindibara nguru bushwa mbu iwe wabesenga mutumba nguru.

24 Yesu warekia wamasunga mbu emwea ngo wamatindibara nguru, weba mbu: «Iira, ntíratamba mu basoki ikime mu Bwami bwa Ongo. 25 Rasuma nguru kuri engamia ikime mu kiribu ch'enandi ina rasuma tu nguru mu mutumba ikime mu Bwami bwa Ongo.»

26 Ebea mbi babesenga barukirange ebinwa mbyo beba ke mbu: «Rero-rero, inye ke ngwashukarayo!» 27 Yesu were bo mbu: «Echasuma kuri ebea nge chatamba kuri Ongo.» 28 Nampo Petero wamwire mbu: «Kae ke, bate twamakinda isia ebiti biri rero nitu n'ikumisa ǒngo!» 29 Yesu were bo mbu: «Nibwirengi muriira: kuba emwea wasia enumba yae, abe mukari, banachabo, babuti bae bushwa n'eBwami bwa Ongo, 30 Ongo wasemuninka bikai bingi nguru hano hansi, na mu matu ngi aseyayo, waseninkwayo ebuingo bw'ematu ati.»

31 Kuruma nampo, Yesu watinge ebanafunsi bae ikumi na babi, were bo mbu: «Munitee emate ke! Bate nge bano twendange ku Yerusaremu. Murubungu ndo nge kuri ebiti mbi byaandikwanga n'ebatahwa itukana nani eMwana w'eMwea, na nge kuseberera byo. 32 Basenisibura mu mine y'entí Bayuta, basenisea, basenikambaa n'initurae inte. 33 Basenirasaka tushushu, kuruma nampo basenishura. Ina nasefuka erotu rw'emeta ashatu.»

34 Ina esantumwa ntíbarukiranga kikai bushwa mbu ebinwa mbyo byabesenga byabisama. Ntíbasibanga kinki chakianga Yesu wahuna iere bo.

35 Yesu wakianga wasonda ikime murubungu rwa ku Yeriko, wákumana kihumihumi kima chabesenga charika mwendende n'ense nti kikonga-kongange. 36 Warekia warukira erukindo rw'ebea bingi betange, washisha mbu: «Mbeni kinki cheta nku?» 37 Ebea bamwire mbu: «Yesu wa ku Nasareti ng'wetange.» 38 Ekihumihumi ncho chakua mbu: «eYesu Musike wa Ndauti, nikwiri bonso!»

39 Ebea mbi babesenga basondora bamufine mbu wakobe, ina iwe wakua ketu na nguru mbu: «eYesu Musike wa Ndauti, nikwiri bonso!»

40 Yesu watindira, were bo mbu bamurishe hari we. Warekia weya kwihi na Yesu, Yesu wamushisha mbu: 41 «Ǒngo uhunange nikuronjei kinki?»

Wasako mbu: «eNyere Kuritu, nisondange mbu nikai tu.» 42 Nampo, Yesu wamwire mbu: «Eo ke kae tu! Erisimira rabe ramakuramya.» 43 Hiha-hiha wabucha tu ikae, wamisa Yesu na nt'utatange Ongo. Ebea mbi basunganga mbo nabo batata Ongo.