Maria

Kusaliwa kwaka Yesu kutenda kulongaleka.

26 Kitumbu saka Elizabeti hesahika miehi sita, Sapanga antuma ntumi ukunani kwaka Sapanga jobunkema Gabulieli jujenda mmusi uku Nazaleti kundema uku Galilaya, 27 kwaka kamwali jumu jobunkema Malia jwangakuketangana na mwanalomi nsumba waka mundu jumu joakema Josepu, jojuhumi mulukolu lwaka Bambu nkolongu Daudi. 28 Ntumi jukunani kwaka Sapanga anhikila kamwali jola nukumpwagi, "Lukwali lubiya pamu na weapa! Webabugupeki wamboni waka Sapanga nukugupengee!"

30 Ntumi ukunani waka Sapanga ampwagila, "Malia, wijogopa! Ndaba Sapanga jugulangi wamboni waki. 31 Gwitotula kitumbu gwibelika mwana mwanalome, gwankema Yesu. 32 Jombi jwiba nkolongu, bankema Mwana waka Sapanga jojubii kunani ngani. Bambu Sapanga jwampekia kiteu su ubambu nkolongu saka Daudi ahoku baki. 33 Jwibiya Bambu juku kibeleku saka Yakobu masoba goka. Nu ubambu ukolongu waki ngagwikubi na mwiso!"

Kusaliwa kwaka Yesu Kilisitu

18 Yesu Kilisitu jwasaliwa ana, Malia nyongoo waka Yesu jwabia jusumbiki Josepu. Lakini pa babiya bakoni nganukutama pamu ngati nndomi nu nhwanumundu, Malia jabonikana jubii ni kitumbu kupete uwesu wa Loho jaka Sapanga.

Uhwambu waka Malia

46 Malia japwaaga,

"Mwoju wangu gundumbali Bambu.

47 Loho jango juntogule Sapanga jojubi Nkombosi wangu.

48 Ndaba juningali kwikiya ndaba jukombwiki ntumwa waki jojulihulwii pai ngani!

Tumbuka sajeno nukuendale bandu boti biingema na mundu jojupendaliwi,

49 ndaba Sapanga jwana na Makili jundendi makolongu.

Lihina laki la Sapi,

50 jaabone hikia bandu babunzogopa jombi.

Hikia yaki hitama kibeleku mbaka kibeleku.

51 Juhengiki majambu makolongu nu kuboku kwaki.

Jaapesangini bandu babikipunika mmyoju jabu.

52 Jwahulwi akolongu kuhuma mwiteu yabu yu ubambu,

na jatondabi bandu bangakupala makolongu.

53 Bini inzala baatupalisi majambu gaamboni,

na jaabengiki bandu bana mali gingi maboku matopu.

54 Anzangati ntumisi waki Izilaeli,

koni jwakakombuka hikia yaki.

55 Jukombwiki kumbone hikia

Ibulahimu ni kibeleku saki yaka petapeta ngati ejalagila aseja bitu!"

4 Josepu jahuma mmusi uku Nazaleti gogubi kunndema juku Galilaya, jajenda kumusi uku Betelehemu gogubi ku Yudea, pandu pajasaliwa bambu nkolongu Daudi. Josepu jajenda hoku ndaba jabia juhumi mukibeleku saka Daudi. 5 Jajenda kubalangwa pamu nu nsumba waki Malia jojwabi ni kitumbo. 6 Pababi ku Betelehemu hoku, lisoba laki lukubeleka labiya lihikiki. 7 Jabelika mwana jukutumbuli mwanalomi, bunhwatiki indenga. Ndipala bunngonika mulukoi lukulele ng’ombi, ndaba ngasebapatiki pandu pukutama munyumba ja ageni.

19 Lakini Malia jabeka haga goka mmwoju jaki nukugawasali ngamaa.

34 Simoni jwaapengila, nukumpwagi Malia, nyongo waka Yesu, "Linga, mwana we hoju juhaguliwi na Sapanga ndaba jukuhoba nakaagombo bandu bingi buku Izilaeli. Ndienu jiibia nginyuli kuhuma kwaka Sapanga, jebaajikana bandu bingi. 35 Ndipala mawasu ga bandu bingi gibonikana pangwendu. Nawamweti usungu gogubi ngati mpamba gogutema gwaguhosa mmwoju waku."

48 Ahengo na amabu baki ebumbona basangii ngamaa. Anyongo baki bundalukiya, "Mwanango, ndaba jakii gutei hela? Nepani na ahengo baku tukubika tutenda kugutaputa ku usungu."

49 Yesu jaajibua, "Henu nndaputya kyane? Ngasemmanyiki le nepani kupalika miya pa Nyumba ja Ahengo bango?" 50 Lakini bombi ngasebaheliwi mana ja malobi gajaapwagila.

51 Ndienu jabuja nabu mbaka ku Nazaleti najombi jatenda kwaajowane. Anyongo baki bagabeka haga goti mmwoju wabu.

3 Divai ejajomuka, amabaka Yesu bumpwagila, "Ngaseabi na divai!"

4 Lakini Yesu jaapwagila, "Mwiimbwagi sukuhenga. Lisaa la lakona ngaselihikike."

5 Ndienu amabaka Yesu baapwagila atumisi, "Lokapi lejwaampwagila, mwihengaje."

25 Pambipi nu nsalaba waka Yesu, babiya ajemiki na amabu baki, na nndombu wa amabu na Malia nhwanu waka Kileopa, na Malia juku Magidala. 26 Yesu ejaabona amabu baki, ajemiki pamu nu mbolee joampai, jajema pambipi nakapwaagi amabu, "Amabo, nndinga hoju ndi mwana wako."

27 Ndipala ampwagila mmbole jola, "Linga aba ndi amabu baku." Tumbuka lisaa lela mmbolee jaajukua nukujenda kutama naku kunyumba jaki.

Anyongo baka Yesu na alongu baki

31 Anyongo baka Yesu na alongu baki bahika pala nukujema kunza, buntuma mundu kunkema. 32 Nsambi wa bandu watemi papu kunyongolota Yesu. Ndipala mundu jumu ampwagila Yesu, "Anyongo na alongu baku abii kunza, atenda kugukema."

33 Yesu jaapwagila, "Anyongo bangu ne naka alongu bangu ne ndi akanyane?" 34 Papuje jalingalya bandu babatemi kun’yongolota nukupwaga, "Nndingalya! Naabona bamba ngati nyongowangu naka alongu bango. 35 Mundu jokapi jojuhenga gajupala Sapanga, ndi amabu bangu na nndombu wa nu mmbeli wa."

55 Jonioju le nga mwana waka nndanda jola? Boo, amabu baki baakema Malia na alongu baki aka Yakobu na Josepu na Simoni na Yuda? 56 Naka alombu baki ngase abii apamba na twenga? Ndienu jupatiki kwaa goka haga?"

14 Boka haba babi pamu kunndoba Sapanga, pamu na aka mbomba bababi pala, jwabii Malia amabu baka Yesu na alongu baki bangi.