1 Kuwesa kwa Aizilaeli kwamanyikana na akabambu boti bu upandi golijingi lyoba kwii ja losi lwa Yoludani. Akabambu haba atamika mwiitombi nu mu tutombi nu mu ubamba pambipi nu nhanga nkolongu nuku Lebanoni upandi uku Kasikazini. Akabambu haba babia Ahiti na Aamoli na Akanaani na Apelizi na Ahivi na Ayebusi, 2 baketangana na babiya sindi simu ili kukomana ngondu na Joshua na Aizalaeli.

3 Lakini bandu buku Gibeoni bababii Ahivi, ebajogwana namuna Joshua ejijihengi misi ja Yeliku na Ai, 4 baamua kunkonga isoli Joshua. Bakopakiya ngati atenga, baandia posu, bakwea maguni gagalai panani ja maponda gabu ni mipuku ja ngosi jejilai nu kusonwa, 5 bawata ilatu ni ingobu yeilai na posu yabu yoti yabi ijomu na yaimeliki kikongu. 6 Enu anzendila Joshua ku makambi ku Giligali, ampwagila jwombi na Aizalaeli, "Twepani tuhumiki nndema gu kutali, mpepa koku tuguloba guhenga lilaganu na twepani."

7 Lakini Aizalaeli bajibua Ahivi haba ana, "Tuwesa boo kuhenga lilaganu na mwanganya? Pengi mwanganya nntama pambipi na twepani." 8 Nabombi bumpwagila Joshua, "Twepani twa atumisi baku." Najombi Joshua jwaalalukia, "Boo, mwanganya mwaka nyane nu unhumi kwako?" 9 Anzibua, "Twepani twaatumisi baku tujetaki wehapa utulongua, tuhumiki nndema gu kutali na tuhikiki ndaba tujogwini majambu gaka Bambu Sapanga, Sapanga wino, twajogwana majambu gu ukolongu gwaki na goti gajahengiki ku nndema wa Misili. 10 Twajogwana goti gajaahengi akabambu abeli ba Aamoli bababi upandi golipiti lyoba kwii ja losi lwa Yoludani. Akabambu be haba babiya bambu nkolongu juku Sihoni gwa Heshiboni na bambu nkolongu juku Ogu juku Bashani jojwalongua nndema wa Ashitaloti. 11 Ndienu, aseja bitu na bandu boti bunndema gwitu, butupwagila, tujukua posu ju nsapwali, tuhika kuketangana na mwanganya nu kumpwagi kubanga twepani ndi twa atumisi binu, mpepa koku nnhenga lilaganu na twepani. 12 Linga mabumunda gitu egabia ga mwotu patwatumbulia kutoto kipindi patwabokania kunyumba, lakini sajenu gajomiki mbaka gakamwi kikongu. 13 Mipuku ja ngosi jitu jenze tujitwelaki divai koni jibii inyai, lakini sajenu jijwendukini. Hata ingobu ni sambali hitu ijendwikini, ndaba tuhumiki kutali nakanopi."

14 Ndienu, Aizalaeli bajukua posu yabu sanga kunndaluki Bambu Sapanga sukuhenga. 15 Joshua jwajongana nabu kutama su lukwali, jwahenga lilaganu kubanga jwajetakale kutama. Akikilongosi ba bandu Aizalaeli baalapila ngati ebajongana nabu.

16 Egapeta masoba matatu ebabiya ahengiki lilaganu heli, Aizalaeli bamanya kubanga bandu haba babia atamani pambipi pikilanda jabu. 17 Enu, Aizalaeli batumbuliya sapwali ni lisoba la tatu bahika mu misi ja bandu bala. Misi jeheji ndi jabia Gibeoni na Kefila na Beeloti na Kiliati Yealimu. 18 Lakini Aizalaeli ngase baakomiki, ndaba aka kilongosi ba Aizalaeli babiya baalapi kubanga nga baakomi kwi lihina laka Bambu Sapanga, Sapanga wa Aizalaeli. Enu bandu boti bayomila aka kilongosi babu. 19 Lakini aka kilongosi ba Aizalaeli baapwagila bandu haba, "Ndaba tundapi yaambamba kwi lihina laka Bambu Sapanga, Sapanga wa Aizalaeli, enu ngatuwesi kunhumisa. 20 Tundeka ntama, ili twiipata inyela yaka Sapanga jatukelabuki twepani ndaba twibiya tusindwiki kupwata kulapa kotwalapaninya. 21 Mwaaleki atama ili abia atutinyi hanzu nu kututeke masi." Hela ndi akikilongosi ba Aizalaeli ebapwagila.

22 Ndienu, Joshua jwaakema Agibeoni na kwaalaluki, "Boo, ndaba jakike kutukonga unhuma kunndema gu kutali nakati mbanganya ntama pambipi na twenga? 23 Henu, mbanganya mpatiki yaambamba na masoba goti mwiibiya mwatumwa bitu nukutinya hanzu nu kuteka masi kwa ndaba ja nyumba jaka Sapanga wangu."

24 Anzibua Joshua, "Butupwagila kubanga sakaka Bambu Sapanga, Sapanga wino, andagalakia ntumisi waki Musa jaakoma bandu boti bunndema gongo nukumpekee mbanganya nndema gongo kuba mali gino. Enu twajogupa kutukoma ndi mana twahenga lijambu heli. 25 Enu twepani tubii mu ulongosi waku, gutuhengila sokapi segukibona sa amboni." 26 Enu, Joshua jaalenda Agibeoni kuhuma mu maboku ga Aizalaeli ili baakoma. 27 Lakini tumbuka lisoba lela, Joshua jwaapekiya bandu haba lihengu la kwaatinyi nhanzu nu kwaateke masi Aizalaeli boti na kwa ndaba mesa jukupiki matambiku jaka Bambu Sapanga, pandu pokapi pala Bambu Sapanga pajuhagula mbaka lelenu.