1 Pajakuwa Musa ntumisi waka Bambu Sapanga, Bambu Sapanga ampwagila Joshua mwana waka Nuni jojabii anzangati Musa, 2 "Musa ntumisi wangu jukuwiki, henu wehapa pamu na Aizilaeli boti nndobuka losi lwa Yoludani nzenda mbaka ku nndema gonumpeke. 3 Kila pandu pamwakakanyata numpeki mwanganya ngati enunndagalakia Musa. 4 Mipaka ju nndema jiibia ana, upandi u kusini mwiipakana nu lukoba nu upandi uku kazikazini wiipakana ni itombi ya Lebanoni. Upandi golipiti lyoba mwiipakana na losi lobulukema Efulati nu ndema gwoti gwa bandu babakema Ahiti mbaka kunhanga nkolongu uku Meditelenia upandi golijingii lyoba. 5 Ngajwiikubi mundu jojwaguwesa masoba goti ga womi waku. Niikuba pamu na wehapa ngati enabi na Musa. Masoba goti niikuba na wehapa wala nganaguleki hata kulenga nabwaka. 6 Gubiya nganganganga na gubiya na moju gukuwesa ndaba wehapa walongusa bandu aba kujenda kujuku nndema gonaalagi aseja babu kubanga niitenda kwaapeke. 7 Ila gujemakia nganganganga na gukuba na mwoju gukuwesa gulingalakia nu kuhenga malagalaki goti gajugulagakia ntumisi wa Musa. Wiikotoka kuhenga kila lilagalaki nawe wiwesa kupata segupala kila pandu pawijenda. 8 Gulingalakia ngamaa wakijewa kitabu senze sa malagalaki ila kila lisoba ulibola kitabu senze mui ni ikilu ili guwesa kuhenga goti gahandiki momu, nawe gwiipata kila segupala nukuneng'ane pokapi pa gwijenda. 9 Kombuka nepani nugulagalaki gubia nganganganga na gubia na moju gukuwesa. Gwijogopa wala kusoka ndaba nepani Bambu Sapanga, Sapanga waku, mi pamu nawepa pokapi pagujenda."

10 Ndienu, Joshua jwaalagalakia akakilongosi ba akomana ngondu, 11 kujenda mu makambi nakwaapwagi bandu, "Nhandia posu, ndaba egiipeta masoba matatu mwilobuka losi lwa Yoludani, kujenda kutama ndema gogugwe Bambu Sapanga, Sapanga winu ampeki kuba mali gino."

12 Joshua jwaapwagila bandu bi likabila laka Lubeni ni likabila la Gadi na nusu ji likabila la Manase, 13 "Nkombuka lijambu lejunndagalakia Musa ntumisi waka Bambu Sapanga, jundagalakia kupwaaga, ‘Bambu Sapanga, Sapanga winu jwampekia pandu pukupomule, nukumpekee nndema gongo gu upandi golipitii liyoba.’ 14 Akahanu binu na bana binu ni mipugu iigalia mu nndema goampekia Musa mwanganya upandi golipiti lyoba uku Yoludani. Lakini akanalomi boti baabi nu uwesu gukukomana ngondu baabii tayali kukomana biiloboka losi koni abi na hindu yu kukomane ngondu nu kwaalongule alongu binu. Kupalika kwaajangati alongu bii, 15 mbaka Bambu Sapanga pajaapekia alongu binu kabee pandu pukupumule, ngati eampekia mbanganya, nabombi abia nu nndema gojwampekia Bambu Sapanga, Sapanga winu. Ndienu mwiikelubuka mu nndema kulisa mali gino na bumpekii mwanganya, nndema goguwe jumpeki Musa ntumisi waka Bambu Sapanga, ju upandi golipita lyoba mwa losi luku Yoludani."

16 Ndienu bunzibua Joshua, "Majambu goti gautulagalaki mbaka tuhengi, na pokapi pawatutuma mbaka tujendi. 17 Twagujoaninya wehapa ngati etunzogwania Musa mu majambu goti na Bambu Sapanga, Sapanga wako jubia pamu na weapa ngati ejabi pamu na Musa. 18 Mundu jokapi jojwisinda kupwata malagalaki gaku au kukana kujowane malobi gaku au lijambu lokapi leunndagalaki, jwiitenda kukomeka. Lakini weapa, gubia nganganganga na mwoju gukuwesa."