1 Bamba ndi akabambu akolongu babube Aizalaeli baawesa nu kujuku nndema gwabu gwoti gogwabia upandi golipitii lyoba kwii ja losi lwa Yoludani, kuhuma ku ligomba la losi lwa Alinoni mbaka kitombi sa Helumoni nu nndema gwoti wiligomba la losi Yoludani upandi golipitii lyoba. 2 Bambu nkolongu Sihoni jwa Aamoli jwatama ku Heshiboni nu kulongosa kuhuma kunyuma jaki ju ubambu ku Aloeli, musi gogwabi pulutengu ji ligomba la Alinoni. Jwalongusa kabee kutumbuli pikilanda ji ligomba la Alinoni mbaka kulosi lwa Yaboki lolulwe lwabi mpaka gu nndema gwa Amoni, bambu nkolongu juku Sioni jalongusa nusu ju nndema gwa Gileadi. 3 Ahelahe kabee jwalongusa nndema gwoti guku ligomba la losi lwa Yoludani, kuhuma ku nhanga wa Kineleti upandi golipita lyoba, mbaka ku Beti Yeshimoti kunhanga gwa mwinyu nu kuendele mbaka pai ji kitombi sa Pisiga.

4 Kabee anndapula bambu nkolongu Ogu jumu jwa Alefai babahigali, jojwaalongusa ku Bashani na jutamika ku Ashitaloti nuku Edilei. 5 Najombi jalongusa kwi itombi ya Helumoni, ku musi uku Saleka, ku Bashani kwoti mbaka ku mipaka ja Ageshuli na Amaaka na nusu ja Agileadi mbaka mu mpaka gu nndema waka bambu nkolongu Sihoni jwa Heshiboni. 6 Musa ntumisi waka Bambu Sapanga, pamu na Aizalaeli baawesa akabambu akolongu haba. Musa jaapekia milema heji jibiya mali gabu bandu ba likabila laka Lubeni ni likabila laka Gadi na nusu ji likabila la Manase.

7 Haba ndi akabambu akolongu bi milema bajalapula Joshua pamu na Aizalaeli bababi atama upandi golijingi lyoba ku losi lwa Yoludani. Kutumbuli ku Baali Gadi mu ligomba luku Lebanoni mbaka mwikitombi sa Alaki gowabii upandi u kusini pambipi na Seili. Joshua jaabaganakiya makabila ga Aizalaeli milema heji jibia mali gabu. 8 Milema ji itombi nu tutombi upandi wa golijingi lioba ni ligomba la losi Yoludani pamu ni iheleu na ji itombi na maeneu guku nndema nnzomu uku kusini nu lungwenza. Jenze ndi ndema jejabii atama Ahiti na Aamoli na Akanaani na Ahivi na Ayebusi. 9 Akabambu akolongu babalapulika na Aizalaeli babiya ndi bamba, bambu nkolongu juku Yeliku na bambu nkolongu juku Ai musi gogwabi pambipi na Beteli, 10 bambu nkolongu juku Yelusalemu na bambu nkolongu juku Hebuloni, 11 bambu nkolongu juku Yalimuti na bambu nkolongu juku Lakishi, 12 bambu nkolongu juku Eguloni na bambu nkolongu juku Gezeli, 13 bambu nkolongu juku Debili na bambu nkolongu juku Gedeli, 14 bambu nkolongu juku Holima na bambu nkolongu juku Aladi, 15 bambu nkolongu juku Libina na bambu nkolongu juku Adulamu, 16 bambu nkolongu juku Makeda na bambu nkolongu juku Beteli, 17 bambu nkolongu juku Tapua na bambu nkolongu juku Hefeli, 18 bambu nkolongu juku Afeka na bambu nkolongu juku Lashaloni, 19 bambu nkolongu juku Madoni na bambu nkolongu juku Hazoli, 20 bambu nkolongu juku Shimloni Meloni na bambu juku Akishapi, 21 bambu nkolongu juku Taanaki na bambu nkolongu juku Megido, 22 bambu nkolongu juku Kadeshi na bambu nkolongu juku Yokineamu jwa musi gogubi kwi kitombi sa Kalimeli, 23 bambu nkolongu juku Doli jwi lieneu la Nafati Doli, na bambu nkolongu Goiimu juku Giligali, 24 bambu nkolongu juku Tiliza. Aka bambu akolongu boti babiya ndi selasini na jimu.