1 Nndema gobaapekia bandu bi likabila laka Yuda su kupega kula kulengana na akaalongu mundu.

Kutumbuli upandi guku kusini ja golipita lyoba mbaka mu mpaka wa Edomu. Nndema gu upandi u kusini wabiya lungwenza lu kusini. 2 Mpaka wabu upandi uku kusini gwatumbulia mu kona ju kusini ju nhanga gwa mwinyu, 3 waendilia upandi u kusini mbaka kikwelu sa Akilabimu, wapetila kulutengu ju lukoba lu kusini, nu upandi u kusini ja Kadeshi Balinea na gwapetila ku Hesiloni mbaka ku Adali na gwayonguluta kujenda ku Kalika. 4 Kuhuma hoku gwapeta pambipi na Asimoni nukupwata kalosi kuku Misili mbaka kuhika kunhanga uku Meditelania. Pala ndi pawapeta mpaka u kusini wa Yuda.

5 Mpaka wabu uku upandi golipita lyoba ndi wabiya nhanga gwa mwinyu mbaka palosi ja Yoludani.

Nu mpaka wabu upandi guku kazikazini wapeta pa kona ju nhanga gwa mwinyu palujingali losi lwa Yoludani mu nhanga. 6 Ndienu mpaka hogu gwaendaliya ku Beti Hogula na wapetila upandi uku kazikazini ja Beti Alaba mu lilibu laka Bohani mwana waka Lubeni. 7 Kabee mpaka hogu waendelia mbaka ku Debili ku ligomba la mangaliku nu upandi wa kazikazini kujenda ku Giligali, musi gowabii pambipi ni indela ja Adumimu ambagu wabii kusini jaka losi, ndienu gwaendalia mbaka ku iliba ya Enishemeshi nu kujomuke ku Eni Logeli. 8 Ndienu, mpaka hogu wapeta mu ligomba la Hinomu, upandi u kusini ukitombi sa ka Ayebusi, gobukema musi uku Yelusalemu, kujenda panani ji kitombi sekibii upandi wa golijingi lyoba ku ligomba luku Hinomu nu kuhika mwiligomba la Lefaimu. 9 Kuboke pala walongua kwi kitombi mbaka ku kiliba sa Neputoa, kabee wahumila kumisi ji kitombi sa Epuloni. Ndienu mpaka wang'anumbuka nukulongoo ku Bala, ndi tupwaga ku Kiliati Yealimu, 10 hoku gwang'anambuka kulongo upandi wa kolijingi lyoba kujenda ku kitombi sa Seili, wapeta upandi wa kazikazini ji lieneu la Yelimu gobukemika Kesaloni, nukuhele mbaka ku Beti Shemesi ambapu wapeta pambipi ni lieneu la Timuna. 11 Ndienu, mpaka hogu walongua kabee upandi uku kazikazini wi lieneu la Ekuloni, wayongulata kujenda ku Shikuloni na wapeta pambipi ni kitombi sa Baala nu kuhika mbaka ku musi uku Yabineeli walindakia munhanga nkolongu uku Meditelania. 12 Mpaka gu upandi wa golijingi lyoba gwabiya nhanga wa Meditelania. Hela ndi ejabi mipaka joti ji lieneu lebaapekiya bandu bi likabila laka Yuda kulengana nu lukolu lwabu.

13 Ndienu, Joshua ampekia Kalebu mwana waka Yefune pandu mu nndema waka Yuda ngati Bambu Sapanga eandagalakiya. Ampekia musi uku Kiliati Alaba kabe gumanyikana ngati musi uku Hebuloni. Alaba babii ahoku baka Anaki. 14 Kalebu jiibenga kuhuma mmusi homu lukolu itatu lwaka Anaki gobugukemika lukolu lwaka Shesai na Ahimani na Talimai. 15 Kuhuma ku Hebuloni jwajenda kwasambuli bandu buku Debili, musi ambagu pa mwandi bugukemika Kiliati Sepeli. 16 Kalebu japwaaga, "Mundu jokapi jagukamula musi uku Kiliati Sepeli anzukua kamwali wangu joakema Akisa. 17 Enu, Otinieli mwana waka Kenazi ndongu waki Kalebu, jugukamula musi hogu, najombi Kalebu ampekia kamwali waki." 18 Mu lisoba labu la tipati jandoa, Akisa ampwagila Otinieli anndoba Kalebu atati baki litui. Akisa jwabiya panani jiliponda, ejahuluka pai Kalebu anndalukia, "Gupala nugupekia kike?" 19 Akisa jwajibua, "Gumbekia mbenge, ndaba gumbeki nngonda gogubi ku nndema nzomu uku kusini, noba gumbekia kabee ni kiliba sa masi." Kalebu ampekia iliba ya masi yeyabi upandi uku ndonda nu upandi ukumosu gogubii ni iliba.

20 Gongo ndi nndema gobaapekia bandu bi likabila la Yuda kulengana nu lukolu lwabu. 21 Misi jejabi upandi u kusini nakanopi mu nndema wa Yuda kujenda mu mpaka uku Edomu, jabiya jenze, Kabiseeli na Edeli na Yaguli, 22 na musi uku Kina na musi uku Dimona na musi uku Adada 23 na uku Kadeshi na uku Hazoli na musi uku Itanani, 24 na musi uku Zipu na musi uku Telamu na musi uku Bealoti, 25 na musi uku Hazoli Hadata na musi uku Kelioti Heziloni gobugukema Hazoli, 26 na musi uku Amamu na musi uku Shema na musi uku Maloda, 27 na musi uku Hasali Gada na musi uku Heshibomoni na musi uku Beti Peleti, 28 na musi uku Hasali Shuali na musi uku Belisheba na musi uku Biziotia, 29 na musi uku Baala na Iyima na musi uku Esemu, 30 na musi uku Elitoladi na musi uku Kesili na musi uku Holima, 31 na musi uku Sikalagi na musi uku Madimana na musi uku Sanisana, 32 na musi uku Lebaoti na musi uku Shilihimu na musi uku Aini na musi uku Limoni. Misi jebapeki jabia ishilini na tisa pamu ni ijiji yaki.

33 Misi jejabii mu itombi isokuisoku jabia, musi uku Esitaoli na musi uku Sola na musi uku Asina, 34 na musi uku Zanoa na musi uku Enganimu na musi uku Tapua na musi uku Enamu, 35 na musi uku Yalimuti na musi uku Adulamu na musi uku Soko na musi uku Azeka, 36 na musi uku Salalaimu na musi uku Aditaimu na musi uku Gedeli na musi uku Gedelotaimu. Misi joti jebaapekia ndi jabia komi nu nsesi pamu ni ijiji yaki.

37 Baapekia kabee misi ja Senani na musi uku Hadasha na musi uku Migidali Gadi, 38 na musi uku Dileani na musi uku Mizipa na musi uku Yokitaheli 39 na musi uku Lakisi na musi uku Bosikati na musi uku Eguloni, 40 na musi uku Kaboni na musi uku Lahamamu na musi uku Kitilisi, 41 na musi uku Gediloti na musi Beti Dagoni na musi uku Naama na musi uku Makeda misi joti jebaapekiya jabiya komi na sita pamu ni ijiji yaki. 42 Kabe paabekia misi ja Libia na musi uku Etali na musi uku musi uku Asani, 43 na musi uku Yifita na musi uku Ashina na musi uku Nesebu, 44 na musi uku Keila na musi uku Akizibu na musi uku Malesi. Misi joti jebaapekia jabiya tisa pamu ni ijiji yaki. 45 Kabee baapekia musi uku Ekuloni pamu na misi misokopi ni ijiji yaki, 46 misi joti ni ijiji yabiya pambipi na Asidodi pikilanda ja Ekuloni nu nnhanga nkolongu uku Meditelania, 47 Asidodi na Gaza pamu na misi ni ijiji yaki, mpaka mkolule uku Misili mbaka kumbwani ju nnhanga uku Meditelania.

48 Misi jejabii pi lieneu li itombi ndi jenze, musi uku Shamili na musi uku Yatili na musi uku Soku, 49 na musi uku Dama na musi uku Kiliati Sana gobugukema Debili, 50 na musi uku Anabu na musi uku Esitomoa na musi uku Animu, 51 na musi uku Gosheni na musi uku Holoni na musi uku Gilo, misi joti jebaapekia jabiya komi na moja pamu ni ijiji yaki. 52 Kabee baapekiya musi uku Alaba na musi uku Duma na musi uku Esani, 53 na musi uku Yanimu na musi uku Beti Tapua na musi uku Afeka, 54 na musi uku Humita na musi uku Kiliati Alaba gobugukema Hebuloni na musi uku Sioli. Misi joti jebaapekia jabiya tisa pamu ni ijiji yaki. 55 Bandu bi likabila la Yuda kabee baapekia misi ja Maoni na musi uku Kalimeli na musi uku Zipu na musi uku Yuta, 56 na musi Yezeleeli na musi uku Yokideamu na musi uku Zanoa, 57 na musi uku Kaini na musi Gibea na musi uku Timina. Misi joti jebaapekia jabiya ndi komi pamu ni ijiji yaki. 58 Ahelahe kabee baapekiya misi ja Halihuli na musi uku Beti Suli na musi uku Gedoli, 59 na musi uku Maalati na musi uku Beti Anoti na musi uku Elitekoni. Misi jebaapekia ndi jabiya sita pamu ni ijiji yaki. 60 Kabee baapekiya misi ja Kiliati Baali gobugukema Kiliati Yealimu na musi uku Laba. Misi jebaapekiya jabiya mibeli pamu ni ijiji yaki.

61 Misi juku lungwenza ndi jabia musi uku Beti Alaba na musi uku Midiani na musi uku Sekaka, 62 na musi uku Nibisani na musi wa Mwinyu na musi uku Engedi. Misi jebaapekiya jabiya ndi sita pamu ni ijiji yaki.

63 Lakini bandu bi likabila laka Yuda ngasebawesiki kwaabenga Ayebuse bababii benei buku Yelusalemu, na mbaka lelenu Ayebusi bakona atama mu musi homu pamu na bandu bi likabila laka Yuda.