1 Jenze ndi milema jebaapekiya Aizalaeli mu nndema guku Kanani. Nngolu Eleazali na Joshua mwana waka Nuni, pamu na akolongu bu lukolu lwa makabila ga Aizalaeli babagila Aizalaeli. 2 Nndema we hogu babagila sukupega gudugudu ngati Bambu Sapanga eandagalakiya Musa kubanga jagapekia makabila tisa na nusu. 3 Musa jabia jagapeki makabila mabeli na nusu ja pandu pabu papabi upandi golipita lyoba wa losi Yoludani, lakini Alawi ngase baapeki pandu pokapi mu nndema hogu. 4 Josepu jabiya na bana abeli Manase na Efulaimu henu ndi gapitila makabila mabeli. Likabila la Alawi ngase bapatiki nndema wokapi, ila pe misi jukutama na pandu pukulea inyama yabu ni ilebi yabu. 5 Enu, Aizalaeli babagana nndema ngati Bambu Sapanga eanndagalakia Musa.

6 Lisoba limu bandu bi likabila laka Yuda anzendila Joshua ku Giligali. Kalebu mwana waka Yefune jojwabi ju lukolu lwa Akenizi, ampwagila Joshua, "Gukomboka namuna Bambu Sapanga eandagalakia Musa ntumisi waka Sapanga, ndaba jangu nepani na weapa patwabii ku Kadeshi Balinea. 7 Panabi na yaka alubaini, Musa ntumisi waka Sapanga jwanduma kujenda ku Kadeshi Balinea, kujenda kugulaluki nndema hogu. Enabuja nunndetila majambu ga hoku ngati enahobalia mmwoju jangu, 8 lakini babajenda pamu nanepani bala baasokisa makili bandu, lakini nepani numpwata Bambu Sapanga, Sapanga wangu sukuhobaleka. 9 Lisoba lela Musa janigila mbamba, ‘Sakaka pandu pu nndema gola pawapeta ke piibiya paku weapa ni kibeleku saku masoba ganga na mwisu. Ndaba wehapa unhobali Bambu Sapanga waku’. 10 Lakini henu linga! Sajenu ndi yaka alubaini nu nhwanu tumbuka Bambu Sapanga ejalongila na Musa, mu masoba Aizilaeli pabapeta kulukoba. Tumbuka masoba gala Bambu Sapanga janeka namwomi ngati eanndagila, mbaka sajenu mi na yaka semanini nu nhwanu. 11 Lakini nakona mii na makili ngati masoba gala pajanduma Musa. Hata sajenu mi na makili gukuwesa kukomana ngondu au kuhenga lihengu lokapi. 12 Enu noba gumbekia nndema ago gogubi ni itombi goguwe Bambu Sapanga janagila lisoba lela. Gweapa gwajogwana lisoba lela kubanga Aanaki atamani amo mu misi mikolongu jejibi nu lumatu, pengi Bambu Sapanga juwesa kunyangati, nanepani naabenga ngati Bambu Sapanga ejapwaga."

13 Ndipala Joshua ampengila Kalebu mwana waka Yefune nu kumpekee musi gwa Hebuloni gubuya mali gaki. 14 Ndienu, musi gwa Hebuloni wabiya u kibeleku saka Kalebu mwana waka Yefune mundu ju lukolu lwa Akenizi mbaka lelenu, ndaba Kalebu jukabii juhobaleka kwaka Bambu Sapanga jwa Aizalaeli. 15 Musi gwa Hebuloni pa mwandi bugukemika Kiliati Alaba. Alaba jwabii mundu nkolongu kwa bandu boti buku Anaki.

Nndema woti watama su lukwali sanga ngondu.