1 Nndema gobabagulia kibeleku saka Josepu su kupega kula jatumbulia pambipi na losi lwa Yoludani, upandi golipiti lyoba ji kiliba sa Yeliku, nu kupete ku lungwenza lwi itombi yuku Beteli, 2 kuhuma ku Beteli mbaka wajenda ku Luzu, na waendaliya mbaka ku Ataloti kobabiya atama Aaliki. 3 Ndienu wahelala upandi golijingi lyoba mu nndema wa bandu babakema Ayafuteti, mbaka ku Betiholoni. Gwaendaliya ku musi wa Gezeli nu kujenda kujomuke mu nhanga nkolongu wa Meditelania. 4 Ibeleku yaka Josepu yabia, nusu ji likabila laka Manase ni likabila laka Epulaimu, baapekia nndema hogu kuba wabu.

5 Nndema gowabii u likabila laka Epulaimu kulengana nu lukolu lwabu yapakana ana, upandi golipiti lyoba wapeta ku Ataloti Hadali mbaka ku Betiholoni ju kusana, 6 nu kujomuke ku nhanga uku Meditelenia. Ku upandi uku kazikazini mpaka wapeta ku Mikimetati nuku upandi golipita lyoba, gwayonguluta kulongo ku Taanati Shilo kokuje wapeta upandi golipiti lyoba mbaka ku lieneu la Yanoa. 7 Ndienu, gwaendaliya ku Yanoa gwaalongua mbaka ku Ataloti nuku lieneu la Naala, mbaka ku Yeliku, na gwajomukia mu losi lwa Yoludani. 8 Kuhuma ku Tapua mpaka upandi golijingi lyoba mbaka ku nkolule uku Kana nu kujomuke ku nhanga wa Meditelenia. Hogu ndi nndema gobaapekia bandu bi likabila la Epulaimu kulengana na lukolu lwabu, 9 pamu na misi joti ni ijiji yebajonzukia mu nndema kuhuma nusu ji likabila laka Manase. 10 Lakini bandu la Epulaimu ngase baabengiki Akaanani batama ku musi gwa Gezeli. Akanani haba aendalia kutama ni likabila la bandu buku Epulaimu mbaka lelenu, baalasimisa kuhenga lihengu ngati atumwa.