1 Ndienu Joshua jwagakema makabila goti ga Aizalaeli ku Shekemu, jwaakema aka aseja na aka kilongosi na baatemu na akolongu buku Izalaeli, nabombi bahika palongi jaka Sapanga. 2 Joshua jwaapwagila bandu boti, "Bambu Sapanga, Sapanga jwa Aizalaeli, jupwaaga ana, ‘Pamwandi pala aka aseja bino atamika kwii ja losi lwa Efulati, biilumbalia isapanga yengi. Aseja behaba baakemika Tela atati baka Abulahamu na Naholi. 3 Nepani Sapanga naaboa ahoku bino Abulahamu kuhuma kwii ja losi lwa Efulati nu kundeta ku Kanani, konumpekia ibeleku yingi. Numpekia Isaka, 4 najombi Isaka numpekia Yakobu na Esau. Numpekia Esau nndema wi itombi ya Seili ibiya mali gaki. Lakini Yakobu na bana baki bahelaliya ku Misili. 5 Monikatai nuntuma Musa na Aloni, naaletila bandu bu nndema gwa Misili malapuli, nu kumpiya mbanganya mu nndema homu. 6 Naapiya aka aseja binu kuhuma ku Misili na mwanganya mwahika mbaka ku nhanga nkolongu wa Shamu. Amisili baapwatalia koni abii na magali ga ngondu na alonda baakwela kinyama sebikikema falasi. 7 Aizalaeli pabanelila nepani Bambu Sapanga, nabeka lwii kati jabu na Amisili nu kuguhenga nhanga nkolongu gwayekalia Amisili, mwabete mwabona kwa mihu ginu ganaahengila Amisili.’"

"‘Mwatemi ku lungwenza masoba gingi.’" 8 Ndienu nundongua mbaka nndema gwa Aamoli babube atamika upandi golipiti lyoba wa losi lwa Yoludani. Baankoma na Mwanganya, lakini nepani nunhenga mwaawesa na kwaakoma palongi jinu nu kugukamu nndema wabu. 9 Najombi Balaki mwana uka Sipoli, bambu juku Moabu jahika kundapu mwanganya. Ankoka Balaamu mwana juku Beoli juhika kunndapi yaambamba mwanganya. 10 Ila nepani Bambu Sapanga ngasenunzowani Balamu lakini nepani nunhokua mwanganya su kunhenga Balaamu jumpengila mwanganya badala jukunndigi mbamba. 11 Ndipala mwaalobuka losi lwa Yoludani mwahika ku Yeliku. Bandu buku Yeliku bakomana na mwanganya, ngati ebahenga kwa Amoli na Apelizi na Akanani na Ahiti na Agiligashi na Ahivi na Ayebusi. Lakini nepani nunnzangatiya na mwatenda kaawesa. 12 Pamwabiya nnzingi mu nndema gola naahenga ajogupa ili mwaabenga aka bambu abeli buku Amoli. Upanga ni mikoa jinu ngasegunzangati sokapi. 13 Numpekiya migonda jejabi ngase mwijilemike na misi jejuje ngase mwijisengiki lakini nntama mu misi jeheji, na nkula matunda gi Mizabibu ni Mizeituni jejuje ngase mwa pandike.

14 Joshua jaendaliya kulonge, "Enu nde mundumbalia Bambu Sapanga nu kutumaki kwa mwoju gwa mboni na sukuhobaleka. Nndekala isapanga yengi yela yeyuye aka ahoku binu biigungamalia kwii ja losi lwa Efulati kola na ku nndema uku Misili. Muntumikia Bambu Sapanga kajika jaki! 15 Ana ngasempai kunndumbali Bambu Sapanga, enu nhagula alelenu nya jomwatumakia, ana isapanga yebiilumbalia akahoku binu kwii ja losi lwa Epulati kola, au isapanga ya Aamoli yeyuye sajenu ntama mu nndema wabu. Ila nepani na bandu bu mu nnyumba jango, twanndumbalia Bambu Sapanga."

16 Hapa bandu bala bunzibua, "Ngatuwesi kunndeka Bambu Sapanga nukuilumbali isapanga yengi. 17 Ndaba Bambu Sapanga, Sapanga wito, ndi jojutupiya twepani pamu na akahoku bitu mu nndema uku Misili kotwabii twaatumwa, tugabona kwa mihu gitu mahengu makolongu gajuhengiki. Jutulenda nsapwali yitu yoti etwabiya tupeta mu milema ja bandu motwapeta. 18 Ndienu Bambu Sapanga jutubokia bandu ba Aamoli boti bababi atama mu nndema gongo. Enu na twepani kabee twantumakia Bambu Sapanga, ndaba ndi Sapanga witu."

19 Lakini Joshua jwaapwagila, "Mbanganya nganhwesi kuntumaki Bambu Sapanga, ndaba jombi ndi Sapanga jwa Sapi ngani. Jombi ndi Sapanga jojubi na wipu, najombi ngajunndekake mwanganya pansindwa kunzetake. Na ngajunndekake mwanganya pa munhenge mahakau. 20 Anamundei Bambu Sapanga nukuitumaki isapanga yengi, jwanng'anambukia nukundete malapuli gagang'alisa nu kunkoma, hata ngati junhengi majambu gaamboni haga goti."

21 Lakini bandu bumpwagila Joshua, "Ngahela! Twepani twantumakia Bambu Sapanga pena." 22 Pala ndi Joshua jwaapwagila, "Mwanganya mwabee ndi mpwaaga sekibii mmioju jinu kubanga nnhagwii kundumbali Bambu Sapanga."

Nabombi bajibua, "Twepani ndi twetupwagiki gagabii mmioju jitu." 23 Najombi jaapwagila, "Enu, nndekala isapanga yengi yemmbii naku, mu kumpwata Bambu Sapanga, Sapanga wa Aizalaeli, kwa mwoju gwii gwoti." 24 Nabombi bandu bumpwagila Joshua, "Twanndumbali nu kunzetake Bambu Sapanga, Sapanga witu." 25 Henu, Joshua jwahenga lilaganu na Aizalaeli ku Shekemu, jwaapekia mihilu nu malagalaki gukupwata. 26 Joshua jugaandika haga goti mu kitabu su malagalaki gaka Sapanga, ndienu jwajukua lilibu likolongu nu kulihimika pai junkongu nkolongu gobugunkema mwaaloni pambipi ni lihema laka Bambu Sapanga. 27 Ndienu Joshua jaapwagila bandu boti, "Nndingaliya lilibu lende lijoini goti gatupwagiki. Lijoini goti gajutupwagi twepani Bambu Sapanga, patwankana Bambu Sapanga lilibu hale liitenda kulonge." 28 Ndienu Joshua jwaaleka bandu aboka, na kila bandu bajenda kunyumba jabu.

29 Pagapeta haga, Joshua mwana waka Nuni, ntumisi uka Bambu Sapanga, jwatenda kuwa koni jubii na yaka mia jimu na komi. 30 Buntaga punndema pabumbaguli kuba nndema waki, ku Timati Sela kola, nndema gogubii mwiitombi yuku Epulaimu, upandi uku kazikazini ja Gaashi.

31 Aizalaeli buntumakia Bambu Sapanga masoba goti Joshua pajabi mwomi, na masoba goka ga aseja paatamika baada ja kuwa Joshua, babube bikibweni kila sindu Bambu Sapanga sejwaahengi Aizilaeli. 32 Mahupa gaka Josepu gaguge Aizalaeli bagaletiki kuhuma ku Misili bagataga ku Shekemu pandu pajwabia julombiki Yakobu kuhuma kwa bana baka Amoli, atati baka Shekemu, kwi ipandi mia jimu ya madini ga feza. Pandu je pala pabia mali gi ibeleku yaka Josepu.

33 Najombi Eleazali mwana waka Aloni, jwatenda kuwa nu kuntaga ku Gibea, musi gobumpekia mwana waka Finehasi mu nndema wi itombi yuku Epulaimu.