1 Bambu nkolongu Jabini jwa musi gwa Hazoli ejapata majambu gukuwesa kwaka Joshua, jwaatuma bandu kulonge na aka bambu akolongu baabi pambipi najombi kwaaloba ajongana naku kukomana na Aizilaeli. Jwaatuma bandu haba kuku bambu nkolongu Jobabu jwa Madoni na bambu nkolongu juku Simuloni na bambu nkolongu juku Akishafi, 2 Jwaatuma bandu kulonge na bambu nkolongu wa bandu bababi atama mwitombi yu upandi uku kazikazini, bababii ku ligomba luku losi luku Yoludani upandi uku kusini uku Galilaya lelibii ku ubamba ni ligomba lelibii ku Nafati Doli jejibi upandi golijingi lyoba. 3 Kabee, jaatuma bandu kulonge na Akaanani bababia atama upandi golipitii lyoba nu upandi golijingi lyoba kwaka Aamoli na Ahiti na Apelizi na Ayebusi bababia atama kwiitombi na Ahivi bababia atama pai ji kitombi sa Helumoni ku nndema wa Misipa. 4 Enu, bapita boti na alonda babu boti. Nabombi babi bingi ngati nsangi guku mbwani bahika na magali gingi gaalenganaki na somasoma gagahutwa ni inyama yebikema falasi. 5 Akabambu akolongu boti haba bajongana nukubeka makambi gabu pi kiliba sa Melomu ili akomana na Aizalaeli.

6 Bambu Sapanga ampwagila Joshua, "Gwaajogopa haba, ndaba kilabu kipindi ngati senze, naakoma boti nakwaahenga Aizilaeli baawesa, numbanganya mwisekulana mitaanda ja falasi yabu nu kugatinii magali gabu kwa mwotu." 7 Enu, Joshua na akomana ngondu baki boti, bajenda kwasambuli sakwaajituki mu masi guku Melomu. 8 Bambu Sapanga jwaahenga Aizilaeli baawesa, nabombi baalimanga na kwaabenga mbaka ku Sidoni musi nkolongu na ku Miselefoti Maimu, mbaka kuhiki pi ligomba lu upandi golipita lyoba ku Mizipa na nga mundu jobunndeka mwomi. Aizalaeli baalimanga na kwaakoma boti. 9 Joshua jwaahengila ngati Bambu Sapanga heanndagalakia. Jwasekulana mitanda yii inyama yabu yebiikema falasi yabu yoti nu kutinii kwa mwotu magali gabu goti gukukomane gagahutwa na falasi ngati he bunndagalaki.

10 Joshua pajwabia jutenda kubuja, jugukamula musi wa Azoli. Ndaba musi wa Azoli pamwandi wakabii musi nkolongu wa aka bambu akolongu boti. 11 Ndienu jaakoma bandu boti babii mu musi hogu ngaseandei hata jumu mwomi, nukugutini musi wa Azoli hogu kwa mwotu. 12 Kabee jijikamula misi jela joti sukujilapu ku upanga na kwaakoma aka bambu akolongu babu boti ngati eandagalakia Musa, ntumisi waka Bambu Sapanga. 13 Lakini Aizalaeli ngasebijitinii misi jejabi kwiitombi, ilape musi gwa Azoli ambagu Joshua jugutinia. 14 Aizalaeli batola hindu yoti yebiikamwi ni inyama yeyabii mu misi heji, lakini baakoma bandu baki boti bababii homu ngasebunndei mundu jokapi jubia mwomi. 15 Ngati Bambu Sapanga eanndagalakiya Musa ntumisi waki, najombi Musa andagalakia Joshua kubanga jugahenga. Joshua jwaahenga kila sindu ngati Bambu Sapanga eandagalakia Musa.

16 Joshua jugukamula nndema gwoti. Nnndema woti wiitombi na nndema woti wiitombi isokuisoku upandi uku kasikazini nu kusini, nndema woti wa Gosheni nu nndema nnzomu gogubii upandi uku kusini pamu ni ligomba la losi lwa Yoludani. 17 Kuhuma ku kitombi sa Halaki kujenda Seili mbaka Baali Gadi ku ligomba la Lebanoni, kusini ji kitombi sa Helumoni, jaakamula aka abambu akolongu jaalapula na kwaakoma. 18 Joshua jakomana na aka bambu akolongu haba boti kwa masoba gingipi. 19 Nga musi gogwajetanganinya kutama ku lukwali na Aizalaeli, ila pe Ahivi baatama ku Gibioni. Aizalaeli bijikamula misi jengi joti sukukomana ngondu. 20 Bambu Sapanga mweni ndi jojahenga abiya ni ing'omu na akomana na Aizilaeli. Jwapala baabonila ikia ila baakoma. Hela ndi Bambu Sapanga eandagalakia Musa.

21 Masoba haga, Joshua jwajenda kwaakoma Aanaki bababiya atama mwi itombi ku Hebuloni nu ku Debili nuku Anabu kuhuma mu nndema gwoti gwi itombi yaka Yuda nuku nndema woti uku Izilaeli. Joshua jaakoma bandu haba pamu na misi jabu. 22 Nga mundu jwi likabila la Anaki baatamika mu nndema wa Aizalaeli jojahigali, bahigalia asokopi pena ku nndema uku Gaza nuku Gati nuku Ashidodi.

23 Enu, Joshua jugukamula nndema gwoti kulengana na Bambu Sapanga eandangalakia Musa. Joshua jwaapekia nndema hogu Aizalaeli gubia mali gabu, ndienu jaabaganakiya nndema hogu kwa kila likabila labu.

Ndienu nndema gwoti gwatenda kutulia na ngase kwabia na ngondu kabete.