1 Joshua pajwabia nseja na yaka yaki yabia ipetiki ngani. Enu, Bambu Sapanga apwagila, "Weapa henu guseja na gubii na yaka hingi na jihigali milema jingi janga kujukuliwa pandu pakolongu punndema gwanga kujukuliwa. 2 Milema heji ndi nndema woti wa Apilisiti nu nndema woti wa Geshuli, 3 Pandu pa babia atama Akaanani, kutumbuli kalosi ka Shiholi upandi uku kusini mu mpaka uku Misili mbaka ku Ekuloni upandi uku kasikazini, milema je heji jamanyikana ja Akanani. Akabambu akolongu ba Apilisiti atamika ku Gaza nuku Ashidodi nuku Ashekeloni nuku Gati nuku Ekiloni mbaka nndema uku Avi. 4 Akaanani bangi babia bakona atama upandi gu kasikazini gogwabii wakona ngase bugujukwii. Kabee nndema ja Aakanaani kutumbuli ku Ala ja Asidoni mbaka ku Efeka mu mpaka wa Aamoli, 5 kabee nndema wa Gebali na Lebanoni upandi kolipita lyoba ku Baali Gadi pai jikitombi sa Helumoni mbaka ku Lebo Hamati, 6 kabee nndema ja bandu baatama ku itombi ya Lebanoni na Miselefoti Maimu ambaku bandu babu ndi Asidoni boti. Aizalaeli kadili mobaendilia kuhegale kulongi mwi milema heji, nepani namwe naabenga haba palongi jabu ja aizilaeli boti. Nagwe gwabagila bandu Aizalaeli milema heji jibia mali jabu ngati henugulagalaki. 7 Ndienu wagabagila makabila tisa milema heji na nusu jilikabila laka Manase nabombi nndema hogu gubia mali jabu."

8 Makabila gaka Lubeni na Gadi na nusu jengi jilikabila laka Manase, bombi baapekia nndema go baapekiwi na Musa gogubii upandi golipitii lyoba losi lwa Yoludani ngati Bambu Sapanga eanndagalakia Musa ntumisi waki. 9 Nndema hogu watumbuliya ku Aloeli mu lutengu ju nkoka wa Alinoni na musi gola gowabii mu ligomba, nu nndema gu umbamba gola gwoti kutumbuli ku Medeba mbaka ku Diboni, 10 pamu na misi jaka bambu nkolongu Sihoni jwaka Aamoli, jojwalongusa ku Heshiboni mbaka mu mpaka wa Aamoni, 11 pamu ni milema ja Gileadi, nndema wa Ageshuli na Aamaakati, kitombi sa Helumoni nu nndema woti wa Bashani mbaka ku Seleka, 12 nu nndema woti gojulongusa bambu nkolongu jumu joankema Ogu jwa Aalefai babahigali, jojwaalongusa ku musi wa Ashitaloti na Edelei mu Bashani. Musa jwaawesa haba boti na akwabenge kutali. 13 Hata hela Aizilaeli ngasebaabengiki bandu buku Geshuli na Aamaaka henu aendale kutama pamu na Aizalaeli mbaka lelenu.

14 Musa ngase jwaapeki bandu bi likabila la Lawi nndema gwokapi jibiya mali gabu. Ila bombi bumpikia matambiku gukutini Bambu Sapanga, Sapanga wa Aizilaeli, hogu ndi wabiya ulisi wabu, ngati Bambu Sapanga eandagalakia Musa.

15 Yenze ndi nndema papuje Musa jwaapekia bandu bi likabila laka Lubeni kulengana nu lukolu lwabu. 16 Nndema wabu watumbuliya ku Aloeli pulutengu ju nkoka uku Alinoni na musi wabu wabii pikilanda ji ligomba heli pamu nu nndema woti gu ubamba wa Medeba. 17 Jabia kabee pamu na Heshiboni na misi jaki joti jejabi pu ubamba. Musi wa Diboni na musi wa Bamoti Baali na musi wa Beti Baali Meoni, 18 na musi wa Yahasa na musi wa Kedemoti na musi wa Mefaati, 19 musi wa Kiliataimu na musi wa Sibuna na musi wa Seleti Shahali panani ji kitombi ku ligomba, 20 musi wa Beti Peoli na iheleu yi kitombi yuku Pisiga na Beti Yeshimoti, 21 na misi joti ju ubamba nu nndema woti waka bambu nkolongu Sihoni wa Aamoli jojwalongusa ku Heshiboni, Musa jwabiya andapwi bambu nkolongu Sihoni pamu na akabambu akolongu boti bu nndema uku Midiani nu nndema wa Avi nu nndema wa Lekemu na nu nndema wa Suli nu nndema uku Huli na nu nndema uku Leba babalongusa nndema kwa ndaba ja bambu nkolongu Sihoni. 22 Balaamu mwana waka Beoli jojabiya nnganga, jobunkoma Aizalaeli ikilu. 23 Mpaka gu nndema u likabila laka Lubeni wabii upandi wa kolijingi lyoba wabiya losi lwa Yoludani. Misi heji ni ijiji yaki ndi yebaapekiya bana baka Lubeni kulengana nu lukolu lwabu.

24 Yenze ndi nndema yejwaapekiya Musa bandu bi likabila la Gadi kulengana nu lukolu lwabu. 25 Nndema wabu wapakini na Yazeli na misi joti ja Gileadi na nusu ju nndema wa Aamoli mbaka Aloeli gogwabi upandi wa kolipita lyoba ku Laba, 26 ahelahe kutumbuli ku musi wa Heshiboni mbaka ku musi wa Lamati Mizipe na ku musi wa Betonimu nu kuhuma ku musi wa Mahanaimu mbaka mu mpaka wa musi wa Lodebali. 27 Kabee misi jejabi mu ligomba la losi lwa Yoludani na musi wa Beti Halamu na musi wa Beti Nimula na musi wa Sukoti na musi wa Zafoni nu nndema woti gogwabi waka Bambu Sihoni jwa musi wa Heshiboni. Misi heji yabiya upandi golipita lyoba wa Yoludani na wapakana upandi ukusini na nhanga wa Kineleti. 28 Heji ndi misi ni ijiji yebapekiya bandu bi likabila la Gadi kulengana nu lukolu lwabu.

29 Musa jwilipekia nusu ji likabila laka Manase kulengana nu lukolu lwabu milema jibiya mali gabu, 30 nndema wabu watumbuliya kuhuma Mahanaimu mbaka kujingi mu nndema woti gowabi guka bambu nkolongu Ogu jejabii mu nndema uku Bashani, pamu na misi sitini jaka Yaili, 31 nusu ja nndema wa Agileadi na Edelei, ambaju jabi pai jaka kilongosi Bambu nkolongu Ogu jwa musi gwa Bashani. Nndema hogu bumpekia nusu ji kibeleku saka Makili mwana waka Manase, kulengana nu lukolu lwabu.

32 Musa jwabia jwabaganasi nndema hogu gogwabi upandi golipita lyoba ja musi wa Yeliku na losi lwa Yoludani, kipindi sejabi pu ubamba wa Moabu. 33 Lakini likabila la Lawi, Musa ngase jilibaguli nndema wabu, ndaba Bambu Sapanga, Sapanga wa Aizalaeli jwaapwagila kubanga bombi bibiya apata hindu yebipiya Aizilaeli kwaka Sapanga wabu.