Milagres de Jesus

Yesu aposha impofu shibili

27 Yesu pakufumapo, abalalume babili abali ni mpofu balimukonkele bakopunda ati, "Yesu mwana David, utulangulukileko!"

28 Ulo Yesu aingile mukati, impofu shilya shibili shalimukonkele, naye epakushipusha ati, "Bushe mukoteketela ati nebo kuti namiposha?" Nasho shalimwasukile ati, "Ee mukwai!"

29 Epakushikata pa menso, Yesu alishebele ati, "Nakibe ngefyo muteketele!" 30 Pekapo amenso yabo yalisukile no kwamba ukubona. Yesu epakubebekesha ati, "Mwiebako muntu nangu umo ikyakitwa pano."

31 Nomba bena pakufumapo, balisabankenye ilyashi pali Yesu kubekashi bonse aba mukiputulwa kya kilya kyalo.

Yesu aposha impofu shibili

29 Yesu ulo ali kufuma mu Yeliko, abantu abakuti ubwingi balimukonkele. 30 Impofu shibili ishaikele mu mbali ya musebo shalyumfwile ati Yesu akopita, epakwamba ukupunda ati, "Yesu we Shikulu mwana Davidi utubeleleko uluse!"

31 Ibumba lya bantu lya tampile ukule kubakalipila no kubebati babe fye kelele. Nomba nabo epakukishapo ukupundati, "Shikulu mwana Davidi utubeleleko uluse!"

32 Yesu alimakene, abakuuta no kubepushati, "Nindo mukofwaya mikitile?"

33 Nabo balimwasukile ati, "Tukofwaya ukubona."

34 Yesu pakubakwatile nkumbu, alibekete mu menso yabo, pekapo na menso yalitampile ukubona, nabo epakumukonka.

2 Elo uwafibashi alimufukamine ati, "Mukwai nga mukofwaya lekeni nsangululwe kuli mwebo."

3 Yesu naye epakutambalikapo ukuboko kwakwe no kumwikata ati, "Nkofwaya, sanguluwa." Pekapo no wafibashi alisangulukile. 4 Elo Yesu alimwebele ati, "Witulisha ili lyashi ku muntu nangula umo. Kailange fye kuli nshimapepo no kupeela ikyabupe ikyo Mose amyebele pa kwebati abantu bashininkishe ukuposhiwa kobe."

2 Eko bamuleteele umuntu walwele ubulebe ninshi alilele pamalo. Pa kubona ifyo bamuteketele, Yesu alyebele uwabulebe ati, "We mwana, sansamuka apo imembu shobe shaelelwa."

3 Pali kyo, bakafundisha bamafunde balikuisosha ati, "Uyu muntu akopontela Lesa."

4 Na Yesu pa kwishiba amatontonkanyo yabo alibebele ati, "Nindo mukotontonkanisha ifya bubi mu mitima yenu? 5 Ikyakwanguka apa kindo? Ukwebati, ‘Imembu shobe shaelelwa’ nangula ukwebati, ‘Alamuka wende.’ 6 Epakwebati mwishibe ati Umwana wa Muntu alikwete amaka pesonde ayakwelela imembu." Epakweba uwabulebe ati, "Alamuka, senda malo yobe, kabuye kobe kung’anda."

7 Naye epakuya kwakwe kung’anda.

10 Epakusangamo muntu wa kisansa kyakulemana. Mwalipo na bali kufwailisha apo bengamusangila no mulandu. Elo bamwipwishe ati, "Bushe kyalisuminishiwa ukuposha umuntu pe Sabata?"

11 Naye Yesu alibasukile ati, "Nga kyakwebati imbelele ya umo pali mwebo yalobela mu kilindi pe Sabata, ninshi talina kuifumyamo? 12 Umuntu wa mutengo ukukilapo na pa mbelele! Ekyo kyansambu ukukita ikyabune pe Sabata." 13 Yesu epakweba uwali ne kisansa kya kulemana ati, "Fungulula ukuboko kobe." Naye pa kufungulula abona kwapola, kwaba bwino nge fyali ukunakwe.

20 Elo umwanakashi uwali kulwala umukunko pa myaka ikumi limo naibili naye alikonkele mu numa, no kwisa kwikata ku lusempe lwa nsalu yakwa Yesu. 21 Pantu mu mutima alyebele ati, "Nga nkumyeko fye ku nsalu yakwe, nkopola."

22 Yesu pa kupilibuka, amubona, amweba ati, We mwana wangi, koseleshiwa apo ikiteketelo kyobe kilikuposeshe. Pekapo umwanakashi alipolele.

Yesu abuusha kisotwe kubakufwa kabili aposha umwanakashi wa bulwele bwa mukunko

18 Ulo Yesu ali kulanda ifyo, palishilepo intungulushi ya Bayuda imo, ya mufukamina, yalimwebele ati, "Umwana wangi kisotwe afwa, nomba wise ngale umutambikepo ukuboko, epakwebati abe umutuntulu."

19 Naye Yesu na basambi bakwe epakumukonka.

23 Yesu pa kwingila mung’anda ya ntungulushi alisangilemo bakalisha bakipolilo na bali kuloosha. 24 Yesu epakubeba ati, "Fumineni panse, uyu kisotwe tafwile, alilele fye mutulo." Elo balamuseka. 25 Ulo abantu bafumine panse, elo aingilemo no kwikata kisotwe pa kuboko, naye epakwalamuka.

Yesu atalalika maaba

23 Elo Yesu apateme mu bwange, na basambi bakwe bali mukonkele. 24 Kabili palya penefye pali bemba palimine ikipuupu ikukulu ikyakuti amaaba yakoima na menshi ukule kwingila mu bwange, apo ninshi Yesu alilele mu bwange. 25 Abasambi epakwalamusha Yesu no kumwebati, "Shikulu, tupusushe tukofwa!"

26 Epakubeba ati, "Mweba kiteketelo kinini, nindo mwakwatilo mwenso?" Elo alimakene no kukalipila ikipuupu na maaba na bemba alitalele tondolo.

27 Abasambi abali nakwe balipapile ikyakwebati batampile no kule kwipusha ati, "Muntu wakuba shani uwakwebati ikipuupu na maaba fikomunakila!"

15 Pali kilya kyungulo, abasambi baishile kuli Yesu ati, "Ubushiku bwalaila elo muno tuli ni mu kiswebebe. Lekeni aba bantu baye kushitako ifyakulya mu mishi."

16 Yesu alibasukile ati, "Aba bantu tabalingilile kuya, mwebo bene bapenipo ifyakulya."

17 Elo balimwasukile ati, "Tukwetepo fye imikate isano ne sabi libili."

18 Naye epakubeba ati, "Leteni kuno." 19 Epakweba ibumba ukwikalako pa kyani. Abulile imikate isano ne sabi libili, apunamina mwiulu, atashishe no kupaala, elo apesaula no kupeela ku basambi bakwe, elo nabo bayabanya ku bantu. 20 Bonse panuma ya kulya bali kutile no kutolelela utupandwa nato ali pangilemo imiseke ikumi limo na ibili iyakwisula. 21 Abalileko bali nalimo amakana yasano (5,000) ukwakubula ukupendelako abanakashi na baike.

25 Pamakyakya Yesu alile ukwali abasambi, akoenda pali Bemba.

Yesu aliisha abantu amakana yane

32 Yesu akuutile abasambi bakwe no kubebati, "Nkolangulukilako aba bantu apo twaliba nabo kuno pa nshiku shitatu ukwakubula ifyakulya. Pantu nga mbaleke baye kwabo, bakofwa ulushile munshila."

33 Abasambi epakwipusha Yesu ati, "Muno tuli ni mukiswebebe, nganipi tungaya kufisanga ifyakulya fyakulisha ibumba lya ku kulefi?"

34 Yesu alibepwishe ati, "Ngale mikate inga mukwetepo?" Nabo epakumwasuka ati, "Tulipo fye ne mikate kine lubali no tusabi tubili."

35 Yesu naye aebele bumba lya bantu ukwikalako panshi. 36 Kabili alibulile ne mikate kine lubali ne sabi no kutasha Lesa, ukuipesaula, no kuipeela ku basambi bakwe, nabo epakwabanyako abantu. 37 Bonse abalile bali kutile fyashala napo. Elo abasambi balisendelepo imiseke kine lubali iya tumokolwa twashelepo. 38 Impendwa ya baume balileko bali amakana yane ukwakubula ukupendelako abanakashi na baike.

Ukulipila kwa musonko we Tempele

24 Ulo Yesu na basambi bakwe bafikile ku musumba wa kapenamu, bakasonkesha ba musonko we Tempele balishile kuli Petelo ne kipusho ati, "Bushe kafundisha wenu alalipila umusonko we Tempele?"

25 Petelo naye alyasukile ati, "Alalipila." Ulo Petelo aingile mung’anda, Yesu ewatampilepo kulanda ati, "Uko tontonkanyapo shani Simoni, ni kuli banani bashamfumu ba pesonde bapoka umusonko ne misangulo? Bushe ni ku bana babo nangula ni kuli bambi?" 26 Petelo alyasukile ati, "Ni kuli bambi." Yesu epakumweba ati, "Kanshi nomba abana tabengalipila. 27 Nomba apo tatukofwaya aba bantu batufulilwe, webo kabuye kuli bemba. Uye kupoosapo indobani pe shiba, elo isabi uleya kuloba pa kwamba, ulikenamune mu kanwa. Ukoya kusangamo indalama iyakulingana no musonko wa mwi Tempele. Ubule no kuya kulipila umusonko wangi no obe wine."

Yesu atipa ikimuti kya mukunyu

18 Ulo Yesu ali pa lwendo lwa ku bwekelamo ku musumba pa makya, ulukelo lwa konkelepo, alyumfwile nsala. 19 Epakubona ikimuti kya mukunyu pa mbali ya musebo, ulo afikileko asangileko fye amabula yeka ukwakubula ifisabo. Aebele kimuti ati, "Kwikakatala akutwalapo ikisabo libili kuli webo." Pekapo ne kimuti kyalala.

20 Abasambi pa kubone fyo kyalibapapwishe ati, "Alale, alale nindo yu mukunyu wa lalila kangu kangu?"

21 Yesu alibasukile ati, "Nkomyeba ikine kine nga muliteketele apakubula ukutwishika, kuti mwakita ifyo na kitile kuli uyu mukunyu, kabili kuti mwaeba no lupili ati, fumapa, kabuye uipoose muli bemba, kikesa kuba fyeke fyo. 22 Nga muli ne kiteketelo, mukapokelela kyonse ikyo mukopepelapo."

Yesu aposha umusha wa mukulu wa fita

5 Pa kwingila mu Kapenamu, Yesu bamukumanya ku mukulu wa fita amweba ati, 6 "Mukwai, umubomfi wangi alilwele ubulebe, alele fye ku ng’anda akokalipwa sana."

7 Elo Yesu alyasukile ati, "Nkoisa kumuposha."

8 Umukulu wa fita alimwasukile ati, Shikulu takilingile ati webo wise kwingila mwangi mung’anda, nomba landa fye shiwi lyeka no mubomfi wangi akoposhiwa. 9 Pantu nandibo ndanakila kubakulu pali nebo. Ndikwetepo na bashilika abanakila kuli nebo, nga naeba umo ati, "Kabuye," naye kuya. Nga naeba umbi ati, "Isa kuno," naye kwisa. Ikyo naeba umubomfi wangi ekyo akita.

10 Yesu pa kumfwe fyo kyalimupapwishe. Epakweba abali kumukonka ati, "Mukine fye ntatala sangapo ikiteketelo ikyakukula ngeki muli Islaeli onse. 11 Nkomyeba, abengi baka fumina ku kabanga na ku mbonshi, no kwikala na Ablahamu, Isaki na Yakobo pa mutebeto wa mu Bufumu bwa mwiulu. 12 Nomba abana ba Bufumu bena bakapooswa mu mfinshi umo bakalekulila no kusumanya ameno." 13 Yesu epakweba ikita ati, "Kabuye kobe, fikokitika nge fyofine uteketele." Pekapo, umubomfi alipolele.

Yesu atamfya ifibanda mu bantu babili

28 Ulo Yesu afikile mu kyalo kya Gadala, bushilya bwa bemba, balimukumenye ku baume babili abafumine mu nshishi, abali ne fibanda, abakukalipisha ikyakuti takwalipo angapitako muli ilyenshila. 29 Pamuku umowine balipundile ati, "Nindo ukofwaya kuli fwebo, Yesu Mwana Lesa? Waisa mu kutukanda ulo inshita tailati kufika?"

30 Akatalamukila fye palipo umukuni uukulu wa nkumba ishali shikolya. 31 Ifibanda fyali papatile Yesu ati, "Ngamukotutamfya tutumeni tuye mu mukuni wa nkumba."

32 Naye Yesu epakufitamfishamo. No mukuni onse wali swatukile mu matelo ya lupili no kuipoosa muli bemba no kufwila mu menshi.

33 Ulo abakemi bankumba babutukile, baile kushimikila abekashi bamuli ulya musumba fyonse ifyakitikile ku bantu bali ne fibanda. 34 Abantu bonse baile kuli Yesu no kumupapata ati afumemo mu kyalo kyabo.

Yesu aposha kibuulu

32 Ulo bali kufuma, abantu bambi baliletele kuli Yesu umuntu uutali kulanda pantu ali ne kibanda. 33 Panuma atamfyamo ikibanda, pekapo umuntu epakwambako ukulanda. Bonse balipapile bakoebati, "Tatwabonapo ikyakubefi mu Islaeli!"

Yesu na Beelesebu

22 Elo baletele umuntu umo kuli Yesu, uwali mpofu, kabili ali ni kibulu pantu ali ne fibanda. Yesu pa kumuposha, elo ulya muntu epakutampa ukulanda no kubona pa kashita kamo kene.

Ikiteketelo kya mwanakashi umwina Kenani

21 Elo Yesu pakufuma apo, epakuya mu kyalo kya Turi na Sidoni. 22 Umwanakashi umwina kenani umwikashi wa muli ilya nkende alishile kuli Yesu, akopunda ati, "We Shikulu mwana Davidi, unangulukileko! Umwana wangi kisotwe alikwete kibanda kabili kilamukyusha bubi bubi."

23 Nomba Yesu talandilepo kintu. Elo abasambi balimupapatile ati, "Mutamfyeni pantu akotupanga fye ikyongo pa kutukonka!"

24 Naye Yesu alyasukile ati, "Nalituminwe fye kubena Islaeli, imbelele shakuluba."

25 Nomba ulya mwanakashi, epakwisa kufukama pa nkasa shakwa Yesu no kumwebati, "We Shikulu ungafweko!" 26 Yesu naye alimwasukile ati, "Takilingile ukusenda ikyakulya kya bana no ku kipoosa ku mbwa." Umwanakashi naye alimwasukile ati,

27 "Efyeke fyo mukwai, nomba ne mbwa nasho shilatolelela amapande ya kopona kwi tebulo lyakwa shikulubo." 28 Yesu alimwasukile ati, "We mwanakashi webo, ikiteketelo kyobe kilikulile! Ekyo ukopokelela ikyo ukofwaya." Pekapo, umwana wakwe alipolele.

Yesu aposha umulumendo uwali ne kibanda

14 Pa kubwekela ukwali bumba lya bantu, umuntu umo alishile kufukamina Yesu, 15 ati, "Shikulu kwatenipo luse pa mwana wangi umulumendo. Alikwata kipumputu kabili alatunya, pambi alaponena mu mulilo nangula mu menshi. 16 Nakimuleta ku basambi benu nomba ta bamuposeshe."

17 Yesu alyasukile ati, "Mwe bantu bakubulwa ikiteketelo kabili mwe bakalufyanya mwe! Ni panshita ndo nkaba na mwebo? Nkashipikisha na mwebo ukushinta pi? Leteni umulumendo kuno!" 18 Yesu epakukalipila ikibanda nakyo kyalifuminemo mu mulumendo, pekapo alipolele.