1 Pali bulya bwine bushiku, Yesu alifumine mung'anda ukuya kwikala mu mukulo wa bemba. 2 Ibumba ilikulu lyali kolongene ikyakwebati Yesu apateme mu bwange elo nomba abantu bena balishele ku mulundu. 3 Ali kubomfye milumbe pa ku basambilisha ifintu ifingi. Alyebele ati, "Umuntu umo alile mu kukusa imbuto. 4 Ulo ali kukusa, shimbi shaliponene mu nshila, ne fyuni fyalishile no kukibaula. 5 Shimbi shaliponene pamushili wa kasakalabwe, apalipo fye umushili unini. Imbuto shali lulumukile, nomba apo mushili tawashikile, 6 Ulo akasuba kakumine, imbuto shamenene shalilalile pantu takwete mishila. 7 Shimbi nasho shaliponene mu myunga. Ulo imyunga yakulile yalitabilile mbuto shali kumena, nasho epakutola. 8 Shimbi nasho shaliponene mu mushili wabune no kutwala ifisabo, shimbi shalitwele imiku mwanda umo, ne shinakwe imiku amakumi mutanda, elo shimbi shena shali amakumi yatatu yafya kushilwe." 9 "Uuli na matwi, nga omfwe."

10 Abasambi pa kwisa kuli Yesu balimwipwishe ati, "Nindo ubomfeshe milumbe pa kulanda ku bantu?"

11 Yesu naye alibasukile ati, "Ubwishibilo bwa fya nkaama sha Bufumu bwa mwiulu bwalipeelwa kuli mwebo, nomba tekuli bena. 12 Pantu kuli onse ukwetepo fimo, akapeelelwapo na fimbi no kwisa kukwata ifingi. Nomba uyo utakwatapo, no tunini uto akwatapo tukesa kupokwa. 13 Ekyo nandila kuli bena mu milumbe nikyo balabona ukwakubulapo kwishiba, Kabili nangu bomfwe, teti beluke. 14 Ni kulya ba bantu ubusesemo bwakwa Isaya bwali kusonta:

"Bale kumfwa nomba ukwakubulapo ukwiluka,

bale kubona nomba ukwakubulapo ubwishibilo.

15 Pantu imitima yabo yali kutwa,

na matwi tayomfwa

na menso nayena tayabona.

Epali babona,

na matwi yabo yaumfwa,

na bakampingu babo bailuka,

elo bapindulukila kuli nebo,

epakwebati mbaposhe."

16 "Nomba mwebo mulishukile, apo amenso yenu yakobona. Na matwi yenu naye yakoumfwa. 17 Nkomyeba mu kine ati, bakasesema na bololoke abengi bali kufwaisha ukubona ikyo mukobona, no kumfwa ifyo mukoumfwa, nomba balifililwe.

18 "Umfweni umo umulumbe wakwa kakusa wa mbuto wapilibwila. 19 Abomfwa ku kyebo kya Bufumu bwakwa Lesa ukwakubulapo ukwiluka kwamo kilolele, e shilya mbuto shaponene mumbali ya nshila. Kiwa naye aisa kusompola ikyebo kya kushilwe mu mutima wakwe. 20 Imbuto shaponene pansakalabwe muntu umfwa ikyebo, akipokelela mu nsansa. 21 Nomba tamulipo mishila muli ena, kyaikalamo pakashita fye kanini. Ulo pali kilya kyebo paisapo ukupakaswa, kangu kangu anenuka. 22 Imbuto shaponene mu myunga ni balya bomfwe kyebo, nomba masakamiko ya bwikashi, no kukonkelela kwa fyuma kwatosha kilya kyebo kyafilwa ukutwala ifisabo. 23 Nomba imbuto shaponene mu mushili wa bune bantu bomfwa ikyebo no kwiluka, epakutwala ne fisabo, bambi umwanda umo, bambi amakumi mutanda, elo bambi amakumi yatatu pafyo bakushile."

24 Yesu ali bebelepo umulumbe na umbi ati, "Ubufumu bwa mwiulu kuti twabupalakanyako ku muntu umo uwaile kukusa imbuto mwibala lyakwe. 25 Ulo abantu bonse balilele mutulo ubushuku, elo umulwani aisa kukusamo insaku no kuya aya. 26 Ulo Ing'ano pa kukula no kusakamuna, insaku nasho shalibonekele." 27 Ababomfi ba ulya muntu balimwebele ati, "Bushe tali ni mbuto shabune sheka twakushile mwibala? Nomba ishinsaku shafumapi?" 28 Naye alibasukile ati, "Mulwani akitile fi." Elo ababomfi balyebele ati, "Bushe tuye kushitupula?" 29 Naye alibebele ati, "Mwikite fyo epali mwatupwila kumo ne ng'ano. 30 Lekeni fikulile pamo mpakapo tukesa kusombwela. Elo nkesa kweba ababomfi ukubalishapo ukutupula insaku, ukushikaka imipo no kushokya mu mulilo elo ukukonkeshapo ing'ano no kushitutila mubutala bwangi."

31 Kabili Yesu epakubebapo mulumbe na umbi ati, "Ubufumu bwa mwiulu bwakubati luseke lwa lubanga ulo muntu abyele mwibala lyakwe. 32 Nangula e luseke lwa kukepeshapo panseke shonse, nomba kilabe kimpukusa, elo kyakula, kisakuba ikimuti ikya kwebati no toni twaisa kubikako ifiinsa mu mitano yakiko."

33 Yesu alibebele umulumbe naumbi ati, "Ubufumu bwa mwiulu bwakubati kitutumushi ikyo mwanakashi asankenye ifipimo fitatu ifyabunga mpaka apangamo no mufuba, watutuluka onse."

34 Fyonse fi Yesu ali kusosela mu milumbe kumabumba. Kabili talandilepo ku bantu ukwakubula ukubomfye milumbe. 35 Akitile fi pa kufikilishapo ifyo kasesema aebele ati,

"Nkale kumilandila mu milumbe;

Nkale kumyeba ifyafiseme ukutampa apo isonde lya lengelwe."

36 Yesu pa kusha mabumba, elo aingile mung'anda. Abasambi bakwe epakumwipusha ati, "Bushe umulumbe wa nsaku wapilibwila mwisa?"

37 Yesu naye alibasukile ati, "Uwabyele imbuto Mwana wa Muntu. 38 Ibala nalyo ni pesonde ne mbuto shabune bana ba mu Bufumu. Elo insaku bana bamubifi. 39 Umulwani akushilemo insaku ni Kiwa. Ubusomboshi ni mpela ye sonde. Abakusombola nabo ni bamalaika. 40 Nga filya bakolonganika insaku no kushokya mu mulilo, efyo kikesa kuba pa kupwa kwe sonde. 41 Umwana wa Muntu akatuma bamalaika bakwe ukwisa ku kolonganika imbifi ukubafumya mu Bufumu bwakwe, bonse abali kulenga abanabo ukukita ifyabubi na batomfwa, 42 bakapooswa mu mulilo emo bale kulila no kusumanya ameno. 43 Elo abololoke bena bakabalika kubati kasuba mu Bufumu bwakwa wishibo. Uuli na matwi ya kumfwa nga omfwe.

44 "Kabili Ubufumu bwa mwiulu bwakuba nge kipao kyafishilwe mu kisonso, umuntu pa kukisanga akifisa, elo aya kushitisha fyonse akwete mpaka ayakushita kilya kisonso.

45 "Kabili Ubufumu bwa mwiulu bwaliba kubati musulwishi uwali kufwaya ulubwe lwa mutengo ulwakubeeka sana. 46 Pa kulusanga, aya kushitisha fyonse ifyo akwete, epakushitamo na lulya lubwe.

47 "Kabili Ubufumu bwa mwiulu bwaliba kubati mukwau wapooselwe pali bemba no kwikata isabi ilya kupusana pusana. 48 Ulo umukwau waiswilemo isabi, abantu epakuufumisha ku mulundu, baikala panshi no kwabanye sabi. Ilya bune balibika mu miseke, nomba ilyabubi balilipoosele. 49 Efyo kikesa kuba pa kumpwa kwa kyalo. Bamalaika bakesa kupatulula imbifi ku bololoke, 50 no kubapoosa mwilungu lya mulilo emukesa kuba ukulila no kusumanya meno."

51 Yesu epakubepusha ati, "Bushe fikoumfwanike fi fintu kuli mwebo?" Nabo balimwasukile ati, "Emukwai."

52 Yesu naye epakubeba ati, "Ekyo kafundisha wa Mafunde onse uuli umusambi wa Bufumu bwa mwiulu, ali ngo mwine wa ng'anda uufumya mukipao kyakwe ifipya ne fyakukota."

53 Yesu ulo apwile ukubeba ilya milumbe, alibashiile. 54 Pakufika kwabo ku musumba, alibasambilishe mu Sinagoge. Abantu balipapile ati, "Nga ya mano na maka akokitilamo ifisungusho fyonse fi afumyapi? 55 Tali mwana fye wakwa kabasa wa mbao? Na nyina bushe tali ni ulya bakuuta ati Maliya? Bawabo bushe nabo tali ni Yakobo, Yosefu, Simoni na Yuda? 56 Ne nkashi shakwe bushe teisho twaba nasho kuno? Nga nipi afumya fyonse fi?" 57 Kyalibakoseele pa kumuteketela.

Yesu epakubeba ati, "Kasesema kumbi alakindikwa, kano fye ku ba mu musumba mwakwe na ba mung'anda mwakwe." 58 Ekyo tapangileko ifisungusho ifyakufula pantu taba muteketele.