1 Panuma ye Sabata, mu kukya kwa bushiku bwa ntanshi ubwa mulungu, Maliya Mandalena na Maliya munakwe bailekulolesha pa nshishi. 2 Pekapo kwali kubapo ikinkukuma ikikulu pantu malaika wakwa Shikulu alikile ukufuma mwiulu, ukwisa kunkulushapo ikilibwe no kwikalapo. 3 Mukuboneka ali kuboneka kubati ni nkuba ne kinso ikya kutuba nge mfula ya kutuba. 4 Bakalinda baliketwe umwenso, pa kututuma bali nga bakufwa.

5 Malaika epakulanda kubanakashi ati, "Mwiba na mwenso. Ndishibile ati mukofwaya Yesu uwatanikilwe. 6 Talipo pano, alishikukile ku bakufwa nge fyo amyebele. Samubone apo alambalikilwe. 7 Kabuyeni kangu muye kwebako abasambi bakwe ati, Yesu alibukile ku bakufwa kabili akomitangilila ku Galile eko mukoya kumubona. Nomba nebo ndimyebele."

8 Epakufuma ku nshishi kangu kangu, mu mwenso kabili mu nsansa, balibutukile mukwebako abasambi bakwe.

9 Pekapo Yesu alibakumenye no kubeba ati, "Umutende." Elo bamupalamine, balikete kunkasa shakwe no ku mushinshimuna. 10 Yesu alibebele ati, "Mwiba na mwenso, kabuyeni mwebeko bawesu baye ku Galile eko bakesa kumbona."

11 Ulo abanakashi balimukuya, bakalinda bamo balibwekelemo ku musumba no kuya kwebako banshimapepo bakindami fyonse ifyakitikile. 12 Elo banshimapepo bakindami bakolongene pamo na bakilolo, balipingene no kufumya indalama ishingi no kupeela ifita. 13 No kubebati, "Mukalande fye ati, ‘Abasambi bakwe balishile ubushiku no kwiba umubili wakwe ulo twali tulilele mu tulo.’ 14 Pakwebati umulashi ngaumfwe fyo, fwebo tukamulabaisha mpaka mukasangwe abakaele, ekyo mwebo mwisakamikwa."

15 Bakalinda pakupoka shilya ndalama, baile ku kita ifyo baebelwe. Ekyo ukufika na kali lelo, ili lyashi lilasabankaniwa pa kati ka Bayuda.

16 Elo abasambi ikumi limo na umo balifikile ku Galile pa lupili apo Yesu abebele ukuya. 17 Pakumubona, bali mushinshimwine, nomba bambi balitwishikile. 18 Yesu pa ku bapalamina alibebele ati, "Amaka yonse mwiulu na pesonde yalipeelwe kuli nebo. 19 Kabuyeni ku bantu bamishobo yonse, muye kupangamo abasambi bangi. No kulekuba batisha mwishina lya Tata, ilya Mwana ne lya Mupashi wa Mushilo. 20 Mukale kubafundisha ukukonka fyonse fyo na myebele. Kabili na lekuba na mwebo mpaka fye napo isonde likapwila."