1 Ulo papitilepo inshiku mutanda, Yesu alisendele Petelo na wabo wakwa Yakobo, uyo ni Yowane epakubatungulula pa lupili ulwakulepa uko baile kuba fye beka. 2 Elo babwene Yesu ayalukile, pa kinso ali kubengeshima kubati kasuba, ne nsalu afwele shalitubile sana. 3 Pekapo balibwene Mose na Eliya bakoambaula na Yesu. 4 Petelo alyebele Yesu ati, "Shikulu kingatuwamina ukuba pano. Nga mukofwaya kuti napangapo insakwe shitatu, imbi wenu, imbi yakwa Mose, elo na imbi yakwa Eliya."

5 Ulo ali kulande fyo, ikumbi ilyakubengeshima lyaisa kubakupilisha, mwafumine ne shiwi lyakwebati, "Uyu e Mwana wangi natemwisha, mukutikeni!"

6 Abasambi pa kumfwa ilyo ishiwi, balyumfwile umwenso no kuipoosa panshi bunkupeme. 7 Elo Yesu pa kufikapo bali alibebele ati, "Alamukeni, mwiba na mwenso." 8 Ulo ba punamine mwiulu, tababwenepo nangu umo kano fye Yesu eka.

9 Pa kutentemuka ulupili, Yesu alibebekeshe ati, "Mwikebako muntu nangu umo mpaka Umwana wa Muntu akashikuke ku bakufwa."

10 Elo abasambi baipwishe Yesu ati, "Nindo Bakafundisha bamafunde bebelati Eliya eukatampilapo ukwisa?"

11 Yesu alimwasukile ati, "Mukine fye Eliya eukambilapo kwisa. kabili akesa kupekanya fyonse. 12 Nomba nkomyebati Eliya alisa kale, na bantu tabamwishibile, bamukitile umo bali kufwaila. Efyo bakakyusha no Mwana wa Muntu."

13 Abasambi epakwiluka ati akolanda pali Yowane Kabatisha.

14 Pa kubwekela ukwali bumba lya bantu, umuntu umo alishile kufukamina Yesu, 15 ati, "Shikulu kwatenipo luse pa mwana wangi umulumendo. Alikwata kipumputu kabili alatunya, pambi alaponena mu mulilo nangula mu menshi. 16 Nakimuleta ku basambi benu nomba ta bamuposeshe."

17 Yesu alyasukile ati, "Mwe bantu bakubulwa ikiteketelo kabili mwe bakalufyanya mwe! Ni panshita ndo nkaba na mwebo? Nkashipikisha na mwebo ukushinta pi? Leteni umulumendo kuno!" 18 Yesu epakukalipila ikibanda nakyo kyalifuminemo mu mulumendo, pekapo alipolele.

19 Elo abasambi balishile kuli Yesu kumbali ati, "Nindo fwebo tufililwe ukutamfya ikibanda?"

20 Yesu alibasukile ati, "Nikyo ikiteketelo kyenu kya kukeepa, nkomyeba nga mwalikwetepo ikiteketelo kubati luseke lwa lubanga, kuti mwalanda kuli ulu lupili ati, ‘Fuma pano, kabuye palya.’ Nalo kuti lwaya. Kuti mwakita ikili kyose. 21 Nomba tamunga tamfya umupashi wakubefi kano fye ku mapepo na mafungo."

22 Ulo abasambi bonse bakolongene mu Galile, Yesu alibebele ati, "Umwana wa Muntu ali no kupooswa mu minwe ya bantu. 23 Baka mwipaya nomba panuma ya nshiku shitatu akesa kuba no mweo." Abasambi balyumfwile ubulanda.

24 Ulo Yesu na basambi bakwe bafikile ku musumba wa kapenamu, bakasonkesha ba musonko we Tempele balishile kuli Petelo ne kipusho ati, "Bushe kafundisha wenu alalipila umusonko we Tempele?"

25 Petelo naye alyasukile ati, "Alalipila." Ulo Petelo aingile mung'anda, Yesu ewatampilepo kulanda ati, "Uko tontonkanyapo shani Simoni, ni kuli banani bashamfumu ba pesonde bapoka umusonko ne misangulo? Bushe ni ku bana babo nangula ni kuli bambi?" 26 Petelo alyasukile ati, "Ni kuli bambi." Yesu epakumweba ati, "Kanshi nomba abana tabengalipila. 27 Nomba apo tatukofwaya aba bantu batufulilwe, webo kabuye kuli bemba. Uye kupoosapo indobani pe shiba, elo isabi uleya kuloba pa kwamba, ulikenamune mu kanwa. Ukoya kusangamo indalama iyakulingana no musonko wa mwi Tempele. Ubule no kuya kulipila umusonko wangi no obe wine."