1 Elo Mupashi atungulwile Yesu mu kiswebebe uko ali kutunkwa kuli Kiwa. 2 Panuma ya kufunga ikyakulya pa nshiku amakumi yane, alyumfwile nsala. 3 Elo Kiwa alishile kutunka Yesu ati, "Webo nga uli Mwana Lesa eba aya mabwe yalukile mu mukate." 4 Yesu alimwasukile ati, "Ikyalembwa kitiila, ‘tekumukate weka umuntu angabelapo uwamweo kano ku kyebo kyonse ikyakufuma ku kanwa kakwa Lesa.’ " 5 Kabili Kiwa alitwele Yesu ku musumba wa mushilo epakumuninika pa nsonshi ye Tempele. 6 No kumweba ati,

"Nga ni webo Mwana Lesa, uitunsule panshi,

apo kyalilembwa ati, ‘akeba bamalaika bakwe ukusunga webo mu maboko yabo

pakwebati taungaipuntula nangula lukasa kwibwe.’ "

7 Yesu alimwasukile ati, "Wile kwesha Shikulu Lesa obe."

8 Kabili Kiwa alitwele Yesu pa lupili lwa kulepa sana no kule kumulangisha amabufumu yonse aya pesonde no bukindami bwa yako bonse. 9 Alimwebele Yesu ati, "Fyonse ifi nkakupeela nga wafukama no kunshinshimuna."

10 Yesu naye alimwebele ati, "Fuma pano Satana! Apo kyalilembwa ati, ‘Ni Lesa eka ungashinshimuna, kabili enafye eka ewakule kumupyungila.’ "

11 Elo Kiwa alifuminepo, na bamalaika balisa kwafwilisha Yesu.

12 Pakumfwa ati Yowane balimupoosele mu kifungo, Yesu alile ku Galile. 13 Ulo afumine mu Nasaleti ailekwikala ku Kapenamu ku mukulo wa bemba wa Galile mu kyalo mwa Sebuluni na Nafutali. 14 Kyali nipa kufikilisha ikyalembelwe na kasesema Isaya ati,

15 "We mpanga yakwa Sebuluni, impanga yakwa Nafutali, umusebo wa kulungama kuli bemba, impanga bushilya bwa nika ya Yodani na ku Benafyalo ku Galile, 16 Abekala mu mfinshi balibwene ulubuuto ulukulu, na ku baikala mu mpanga ya kinshingwa kya mfwa nako bulikile."

17 Ukufumapo Yesu alitampile ukubila ati, "Lapileni pantu Ubufumu bwa mwiulu bulipalamine."

18 Yesu alikwenda ku mukulo wa bemba wa Galile elo alibwene abana nkashi babili, Simoni uwalikwitwa Petelo na Andeleya, bakoteya makonde, pantu bali bashila besabi. 19 Yesu epakubakuuta ati, "Nkonkeni, nkomipanga abashila ba bantu." 20 Pekapo balishile amakonde yabo no kumukonka. 21 Ukwendelelako pantanshi panini epakusangapo kabili abana nkashi na bambi babili bamwana Sebede bali mu bwange pamo na wishibo, bakopekanya amakonde yabo. Epakubakuuta na bena. 22 Pekapo, balifumine mu bwange ukusha wishibo no kukonka Yesu.

23 Yesu alikwendauka mu Galile monse, ukufundisha mu ma Sinagoge akobila Imbila Yabune iya Bufumu no kule kuposha malwele no kukonswa konse mu bantu. 24 Ululumbi lwakwe lwali sabankaniwe mu Silia monse, elo bamuleteele abali kulwala amalwele ya ku pusana pusana, abali ne fibanda na ba kipumputu, aba bulebe, naye Yesu ali baposeshe bonse. 25 Abantu abakuti ubwingi balimukonkele ukufuma ku Galile na Dekapoli, ukufuma ku Yelusalemu na Yudea no kufuma bushilya bwa nika ya Yodani.