1 Pali ilya nshita, abasambi balishile kuli Yesu ne kipusho ati, "Bushe ni nani umukulupo mu Bufumu bwa mwiulu?"

2 Yesu alikuutile umwaike no kumwimanika pakati kabo. 3 Epakubeba ati, "Nkomweba ikine kine ati, umfwa tamupindulukile no kubati baike, tamwakengilemo mu Bufumu bwa mwiulu. 4 Ekyo, onse ukaikefya kubati mwaike, e mukulu mu Bufumu bwa mwiulu. 5 Umuntu onse uwapokelela umwaike ngo yu, mwishina lyangi, ninshi apokelela nebo.

6 "Nomba uwalengela umo pali utu utwakukepa ukufuma ku kiteketelo muli nebo, kuti kyamuwamina ukukulikwa ikilibwe kya mpelo mu mukoshi, no kupooswa pe shiba lya bemba. 7 Akalanda pesonde pa mulandu wa fipunwisho. Fyena fikesa kubapo, nomba takyakawame ku ukalengela abanakwe ukubembuka.

8 "Ekyo ikisansa kyobe nangula ulukasa nga fwakulengela ukubembuka, ufiputuleko, no kufipoosa. kyawamapo ukwingila mu mweo bumakunkutu nangula ikilema, ukukilapo ukukwate fisansa fibili nangula makasa yabili mu mulilo wapee. 9 Kabili ilinso lyobe nga lyakulengela ukubembuka, ulitonkolemo, kyakulingila ukwingila mu mweo ne linso limo ukukilapo ukwate amenso yabili no kupooswa mu ngehena.

10 "Boneni ati tamusulilepo umo pali aba baike. Nkomyeba mukine ati, bamalaika babo lonse babona ikinso kyakwa Tata mwiulu. 11 Pantu Mwana wa Muntu aishile mukufwaya no kupususha abakuluba.

12 "Ngale mwebo mukotontonkanyapo shani pa muntu umo uwalufishepo imbelele imo pa shali umwanda umo. Bushe tekuti ashe shilya amakumi pabula na pabula mutupili no kuya kufwaya iyalubile? 13 Na pakuisanga, nkomyeba mukine, akasekelela sana pali ilya imo iyalubile ukukishapo napali shilya amakumi pabula na pabula ishashelepo. 14 Ekyo tekufwaya kwakwa Tata mwiulu ati palubepo umo pali aba baike.

15 "Wenu nga kulufyanya, kabuyeko umushinike apo alubile. Ambaushanyeni mweka babili. Nga omfwe ninshi wa muwikisha. 16 Nomba ngakana ukumfwa, sendapo umo nangu babili pakwebati pa bunte bwa babili nangula batatu, ikyebo kimakane. 17 Kabili nako ngafilwa ukumfwa, utwale umulandu ku Lukuta, nako nga tomfwile, ninshi mu mukite fye ngo utaishiba Lesa nangula kasonkesha.

18 "Nkomyeba ikine kine ati, kyonse kyo mukakaka pe sonde ninshi na mwiulu kilikakilwe. Nekyo mukakakula pe sonde ninshi na mwiulu kilikakwilwe.

19 "Kabili nkomyebati, babili pesonde nga basuminishanya pali kyonse mungalomba, kikabefyo fine, Tata wa mwiulu akakita. 20 Apali babili nangula batatu abakolonganina mwi shina lyangi, ninshi nandibo ndi pakati kabo."

21 Elo Petelo alishile kuli Yesu ne kipusho ati, "Shikulu, bushe ni pa miku inga ningelela wesu ulo ambifya? Bushe ni pa miku kine lubali?"

22 Yesu alimwasukile ati, "Te pa miku kine lubali," lelo ni pa miku "amakumi kine lubali imiku kine lubali." 23 Ekyo Ubufumu bwa mwiulu kuti twabupalakanya ku mfumu imo iyali kufwailisha ifyo ababomfi bali kubomfya indalama shaiko. 24 Ulo ya tampile ukupitulukamo, balileteleko umo uwalipo ne misha amatalanta amakana ikumi limo. 25 Nomba ena pa kubulwa ikyakulipililamo, imfumu yalyebele ati, "Nko kushitisha pamo no mukashi obe, abana bobe na fyonse wakwata ekulipila imisha." 26 Ulya mubomfi alifukeme panshi, no kupapata ku mfumu, ati, "Nkopapata, ntekanishishenipo, nkafwailishe mpaka nkalipile fyonse." 27 Imfumu ya mulangulukile, ukufuuta ilya misha yonse no kuleka aye.

28 "Nomba ulya mubomfi pa kufumapo, alisangile umubomfi munakwe umo uwa mukwatile fye tundalama twa silfele umwanda umo. Epakumwikata na pa mukoshi, ati, ‘Kano fye umpeele indalama shangi.’ 29 Umunakwe alilombele uluse ati, ‘untekanishishe, nkakufwaile.’ 30 Nomba naye alikene mpaka fye amupoosa mukifungo. 31 Ulo ababomfi banakwe baumfwile fyo balifulilwe sana. Baile ku mfumu ukuyakuyeba fyonse ifyakitikile ku munabo. 32 Elo imfumu ya kuutile ulya mubomfi no kumwebaula ati, ‘We mbifi ya mubomfi we, nebo na likwelela pali fyonse pantu walimpapete. 33 Walingile ukukwatako luse ku munobe nga filya na nebo nakukitile.’ 34 Imfumu yalifulilwe sana, yamwikata no kumupoosa mukifungo no ku mukyusha mpaka fye akalipile indalama shonse."

35 Mu musango umo wine, "Tata wa mwiulu efyo akakita kuli mwebo nga mwafilwa ukwelela bawenu ukufuma panshi ya mutima."