1 Ulo Yesu ali kupita mwibala lya ng'ano pa bushiku bwe Sabata, abasambi bakwe balyumfwile nsala, batampile ukutempula imitwi ya ng'ano bakolya. 2 Abafalise pa kubone fyo, epakweba Yesu ati, "Bona abasambi bobe bakokita ikyabindwa pa bushiku bwe Sabata."

3 Yesu naye alibasukile ati, "Bushe tamwabelengapo ifyakitikile kuli Davidi pamo nabo alinabo ulo baumfwile nsala. 4 Alingile mung'anda yakwa Lesa, elo balilepo umukate wali kupeelwa kuli Lesa, nangula kyalibindilwe ukulyako kano fye banshimapepo beka. 5 Nangu tamwabelengapo mu mafunde ukwebati banshimapepo mwi Tempele tabali kusunga ifunde, ukwakubulwa ukupelelwapo mulandu? 6 Nkomyeba ati pano palipo uwakukila pe Tempele. 7 Nga mwalishibile umwapilibwila ili lembo, ‘Luse ulo mfwaya temalambo, ayii,’ nga teti mwebaule uwakaele. 8 Pantu Umwana wa Muntu e Mfumu ye Sabata."

9 Yesu pa kufuma palya alingile mu Sinagoge. 10 Epakusangamo muntu wa kisansa kyakulemana. Mwalipo na bali kufwailisha apo bengamusangila no mulandu. Elo bamwipwishe ati, "Bushe kyalisuminishiwa ukuposha umuntu pe Sabata?"

11 Naye Yesu alibasukile ati, "Nga kyakwebati imbelele ya umo pali mwebo yalobela mu kilindi pe Sabata, ninshi talina kuifumyamo? 12 Umuntu wa mutengo ukukilapo na pa mbelele! Ekyo kyansambu ukukita ikyabune pe Sabata." 13 Yesu epakweba uwali ne kisansa kya kulemana ati, "Fungulula ukuboko kobe." Naye pa kufungulula abona kwapola, kwaba bwino nge fyali ukunakwe. 14 Elo Abafalise pa kufumapo baya kupingana ifyo Yesu bangamwipaya.

15 Ulo Yesu aumfwile amapinge yabo ayakumwipaya, epakufumapo, na bantu abakuti ubwingi balimukonkele. Naye alibaposeshe bonse abali kulwala. 16 Kabili alibebekeshe ukwebati bemusokolola ku bantu bambi. 17 Akitile ikyo mu kukonka nefyo kasesema Isaya aebele ati:

18 "Uyu e mubomfi wangi uo nasalile,

uyo natemwa, kabili ni muli uyo emombekelwa.

Nkamutumina Umupashi wangi,

kabili akesa kubila ubupingushi bwangi ku mishobo.

19 Tale kupansana

nangula kule kupunda, nangu ukupundisha mu misebo

20 Takafune itete lya kupompoka,

nangula ukushimya ulukuni ulutakomota mulilo.

Alino kushipikisha mpaka fye akaletepo mulinganya ku kukimfya.

21 Ni muli uyo emo bonse bakesa kusubila."

22 Elo baletele umuntu umo kuli Yesu, uwali mpofu, kabili ali ni kibulu pantu ali ne fibanda. Yesu pa kumuposha, elo ulya muntu epakutampa ukulanda no kubona pa kashita kamo kene. 23 Amabumba yalisungukile pa fyo klistu akitile, bakoebana ati, "Bushe uyu tali ni mwana Davidi?"

24 Abafalise pa kumfwe fyo balyasukile ati, "Atamfya ifibanda pantu ikibanda kikulu, Beelesebu ekimupeela maka yakubomba ifyo."

25 Yesu alishibile fyo bali kutontonkanya, epakubeba ati, "Ubufumu bonse umuli ukutakana teti bwimakane. Elo umusumba onse nangula ing'anda yonse iilwisha iyine ikapashinkana. 26 Ekyo Satana nga atamfya Satana ninshi akoilwisha umwine, no bufumu bwakwe teti bwimakane! 27 Mungeba ati ntamfisha ifibanda ku maka yakwa Beelesebu, nga bantu benu baitamfisha ku maka yakwa nani? Ekyo abantu benu bene ebakomishinika. 28 Tekumaka yakwa Beelesebu, ni ku maka ya Mupashi wakwa Lesa pa kumilangilila ati Ubufumu bwakwa Lesa bulishile pali mwebo.

29 "Takulipo muntu ungengila mung'anda ya wa maka, no kutapa ifipe fyakwe kano ngale amukaka.

30 "Onse uutali na nebo ninshi mulwani wangi, uuta kolonganya pamo na nebo, ninshi eukopalanganya. 31 Ekyo nkomyeba ati, imembu shonse isho abantu bengakita kuti shaelelwa, nomba fye uwapontela Mupashi wa Mushilo ena teti elelwe. 32 Onse uwalanda ikyabubi pa Mwana wa Muntu, kuti aelelwa, nomba uwapontela Mupashi wa Mushilo teti elelwe, munkulo ino nangu iikesa kuntanshi.

33 "Pa kukwatapo ikisabo kyabune, kano pa bapo ikimuti kya bune, ikimuti nga kyabubi, ne fisabo nafyo ninshi fyabubi. Ikimuti kishibikilwa ku fisabo fyakiko. 34 Mwe bana bamafolo mwe, kuti mwalanda ifya bune mwe mbifi? Pantu akanwa kalanda ifyaisula mu mutima. 35 Umuntu wa bune afumya ifya bune mukipao kya bune, imbifi nayo ifumya ifyabubi mukipao kyabubifi.

36 "Nkomyeba ati, umuntu onse pa bushiku bwa bupingushi akesa kupingulwa pe shiwi lonse basosele ili taba na buyo. 37 Amashiwi yenu yene ya kesa ku bomfeshiwa pa ku bona nga muli ba mulandu nangula tefyo."

38 Bakafundisha bamafunde bamo pamo na Bafalise baebele Yesu ati, "Tukofwaya ukubonapo ikishibilo kuli webo kasambilisha."

39 Naye alibasukile ati, "Inkulo ya bubifi, kabili iya bukende ikofwaye kishibilo, nomba taya kakibonepo kano fye ikishibilo kyakwa kasesema Yona. 40 Nga filya Yona ali munda ya kisabi pa nshiku shitatu akasuba no bushiku efyo no Mwana wa Muntu akesa kuba mu mushili pa nshiku shitatu akasuba no bushiku. 41 Pa bushiku bwa bupingushi, abena Ninefe bakesa kupingula inkulo ino, pantu bali lapile pa kumfwa imbila yakwa Yona. Nomba nkomyeba ati uwakukilapo pali Yona ali pano. 42 Kabili pa bushiku bwa bupingushi, Namfumu wa ku Sheba naye akesa kupingula mwebo pantu alyendele ukufuma ku kyalo kwakwe ukwisa kumfwa ku mano yakwa Solomoni. Nomba uwakukilapo pali Solomoni ali pano.

43 "Ulo umupashi wabubi nga wafuma mu muntu, uya ukosabanta mu nkende yakuuma ukufwaya apakutushisha, elo nga taupasangile, 44 ukalanda ati, ‘Nkobwekelemo ku ng'anda uko nali kwikala.’ Epakuyasanga ili pyangilwe tamulipo kintu muliweme. 45 Elo waya kusendapo imipashi yabubi inakwe kine lubali iya kubipa ukukilapo elo yonse yaisa kwikalamo. Nomba umubelo wa ulya muntu kwisa kubipilako ukukila pafyo ali kale. Efikaba ne nkulo ino iya bubifi."

46 Ulo Yesu ali kulanda kwi bumba lya bantu, nyina na bawabo lyakwa Yesu balishile kwimakana panse, ukufwaya ukwambaula nakwe. 47 Umo pali balya alyebele Yesu ati, "Banoko na bawenu bemakene panse bakofwaya ukwambaula na webo."

48 Yesu alibasukile ati, "Nga bamayo nangula bawesu ni banani?" 49 Epakusonta ku basambi bakwe ati, "Aba e bamayo na bawesu. 50 Uyo onse ukita ukufwaya kwakwa Tata wa mwiulu e wesu ne nkashi yangi na mayo."