1 Panuma ya kufyalwa kwakwa Yesu, mu mushi wa Betelemu, ulo imfumu Helodi yali kuteeka umusumba wa Yudea, abamano balifumine ku kabanga baishile ku Yelusalemu. 2 Elo baisa kwipusha ati, "Alipi uyo afyelwe, Imfumu ya Bayuda? Twalibwene ulutanda lwakwe lulisumbukile, efyo twaishila ati tumushinshimune." 3 Imfumu Helodi pa kumfye fyo yalisakamikilwe sana pamo fye na bekashi ba mu musumba wa Yelusalemu. 4 Yalitile banshimapepo bakindami na bakafundisha ba mafunde, no kubepukisha uko Klistu ali no kufyalilwa. 5 Balimwasukile ati, "Ni mu mushi wa Betelemu mu kyalo kya Yudea pantu efyalembele kasesema,

6 ‘Webo Betelemu wa mu kyalo kya Yuda, wi ibonati uliwakepeshapo pa misumba ya Yuda, pantu ni muli webo wine emukafuma kateeka, umukemi wa Islaeli, abantu bangi.’"

7 Elo Helodi akuutile abamano mu nkaama no kwisa kumfwako palwa kashita apo ulutanda lwabonekele, 8 epakubatuma ku Betelemu no kubeba ati, "Kabuyeni mufwailishe apo afyalilwe, elo nga mwamusanga kwisa kungebako pakwebati nandibo nkese kumushinshimuna."

9 Panuma yakumfwa kufyo imfumu yabebele, baile fye mpaka bafika apaali Umwana, epo ulutanda lwaile kwimakana. 10 Balisansamukile pakubona ulutanda. 11 Ulo baingile mung'anda, balibwene umwana na Maliya, nyina elo bafukeme no kumushinshimuna, no kwisula ifipao fyabo no kumupeela ifyabupe fya golide, ulubani, na Muri.

12 Kabili ulo bakengeshiwe mu kiloto ati bekabwekela kuli Helodi, nabo pa ku bwekelamo kwabo, ba bomfeshe nshila imbi.

13 Ulo bafumine palya, malaika wakwa Shikulu alibonekele kuli Yosefu mu kiloto no kumweba ati, "Alamuka, fyukileni mwense ku Egupto, webo, Umwana na nyina no kuya kwikala kulya kwine mpaka nkakwebe. Pantu Helodi ali na mapinge ya kwipayo mwana."

14 Epakwalamuka, ubushiku bweka no kufyusha umwana na nyina no kuya ku Egupto. 15 Epakwikala kulya kwine mpaka ulo Helodi afwile, pa kufikilisha ikyalandilwe na Shikulu ukupitila muli bakasesema ati, "Nakuutile Umwana wangi ukufuma mu Egupto."

16 Imfumu Helodi pa kwiluka ati, abamano balimubepele, alifulilwe no kweba abakwipaya abana abalalume bonse mu Betelemu abali ne myaka ibili ukwisa panshi, ukukonka ne nshita aebelwepo kubamano.

17 Epakufikilisha ikyalandilwe na kasesema Yelemiya ati,

18 "Ishiwi likoumfwikila mu Rama,

ilya kulila no kuloosha,

Rakeli akolila bana bakwe no

kukaana ukutalalikwa

pantu balilobele."

19 Panuma yakufwa kwakwa Helodi, malaika wakwa Shikulu alibonekele kuli Yosefu ku Egupto mu kiloto, 20 no kumweba ati, "Ima bwekesha Umwana pamo na nyina ku Islaeli pantu abakwete amapinge ya kumwipaya balifwile." 21 Epakubwekesha Umwana na nyina ku Islaeli.

22 Pakumfwa ati nomba ni Akelausi eukoteeka Yudea ewapyene wishi Helodi, aumfwo mwenso wa kuyako. Elo kabili asokelwe mu kilooto, epakuya ku kyalo kya Galile.

23 Aile kwikala mu musumba wa Nasaleti pakufikilisha ikyalandilwe na bakasesema ati, "Bakale kumukuuta umwina Nasalene."