1 Pali ilya nshita, Helodi imfumu ya Galile yalyumfwile palwa kwa Yesu, 2 epakweba bafilolo baiko ati, "Uyu ni Yowane kabatisha e washikukile ku bakufwa ekyo akokitila ifisungusho fya maka."

3 Pantu Helodi wine alikete Yowane no kumupoosa mu kifungo pa mulandu wakwa Helodia, muka wabo, Filipo. 4 Pantu Yowane kabatisha ali kweba Helodi ati, "Takya suminishiwa webo ukuupa Helodia!" 5 Helodi naye palikyo ali kufwailisha apakumwipaila, nomba ali kutiina Abayuda pantu balimwishibile Yowane ati ni kasesema.

6 Ulo bwafikile ubushiku bwa kusefya ukufyalwa kwakwa Helodi, kwalishilepo mwana mwanakashi wakwa Helodia mukukinda pa kampalabwa, naye Helodi ali sansamukile 7 no kumulaya ati, "Nkolapa ukwebati ndi no kukupeela kyonse ungalomba kuli nebo!"

8 Umwana mwanakashi naye pa kutunkwa kuli nyina alyebele ati, "Ndeteleni pano peka umutwi wakwa Yowane kabatisha pa nsani."

9 Imfumu yalisakamikilwe lelo pa mulandu wa mulapo ya pangile pa kinso kya beni epakweba fye ati ubufwayo bwa mwana nga bukitwe. 10 Ekyo batempwileko umutwi wakwa Yowane ulo ali mu kifungo. 11 Umutwi wakwe bauletele pa nsani no kupeela kisotwe elo naye epakupeela kuli nyina. 12 Abasambi bakwa Yowane epakwisa kusendapo umubili wakwe ukuya kushiika, elo baya kweba Yesu.

13 Yesu pa kumfweli lyashi, alipateme mu bwange no kuya kuba eka. Abantu pa kumfwe fyo bafumine mu misumba yabo no ku mukonkelela ukwenda fye panshi. 14 Yesu pa kupatuka mu bwange, epakubona bantu abakuti ubwingi, ali balangulukile mu mutima wakwe no kuposha bonse abalwele.

15 Pali kilya kyungulo, abasambi baishile kuli Yesu ati, "Ubushiku bwalaila elo muno tuli ni mu kiswebebe. Lekeni aba bantu baye kushitako ifyakulya mu mishi."

16 Yesu alibasukile ati, "Aba bantu tabalingilile kuya, mwebo bene bapenipo ifyakulya."

17 Elo balimwasukile ati, "Tukwetepo fye imikate isano ne sabi libili."

18 Naye epakubeba ati, "Leteni kuno." 19 Epakweba ibumba ukwikalako pa kyani. Abulile imikate isano ne sabi libili, apunamina mwiulu, atashishe no kupaala, elo apesaula no kupeela ku basambi bakwe, elo nabo bayabanya ku bantu. 20 Bonse panuma ya kulya bali kutile no kutolelela utupandwa nato ali pangilemo imiseke ikumi limo na ibili iyakwisula. 21 Abalileko bali nalimo amakana yasano (5,000) ukwakubula ukupendelako abanakashi na baike.

22 Pekapo Yesu akinkishe abasambi ukupatama mu bwange, ukumutangilila bushilya bwa bemba no kuleka amabumba ya bantu ati balekuya. 23 Panuma abantu baya, alile ku lupili mu kupepa eka, eko ali mpaka bwaila. 24 Ubwange bwaliko apatali no mulundu bukopungaila ku maaba, bukosenswa pantu umwela wali kubakilinganya.

25 Pamakyakya Yesu alile ukwali abasambi, akoenda pali Bemba. 26 Abasambi pa kumubona akoenda pali bemba, balyumfwile umwenso, no kulandati, "Ikibanda," epakupunda ku mwenso.

27 Yesu epakubeba pekapo ati, "Mwiba na mwenso, ni nebo."

28 Petelo epakweba Yesu ati, "Nga ni webo Shikulu, ngeba nandibo ngise nkoenda pa menshi."

29 Yesu alimwasukile ati, "Isa!" Petelo epakupatuka mu bwange, alitampile no kwenda pa menshi ukulungama ukwali Yesu. 30 Nomba ulo abwene umwela wakosa, alyumfwile umwenso, alitampile ukwibila. Epakupunda ati, "Shikulu ngafweniko!"

31 Kangu kangu fye, Yesu epakumwikata pa kuboko no kumweba ati, "Nindo watwishikila, wewa kiteketelo kinini?"

32 Ulo bapateme mu bwange, elo no mwela watalele tondolo. 33 Na basambi bonse abali mu bwange balitampile ukushinshimuna Yesu ati, "Kyakine ni webo Mwana Lesa."

34 Pa kwabukila bushilya bwa Bemba ba fikile mu kyalo kya Genesaleti. 35 Ulo abantu ba kuli ilya nkende ba mwishibile, epa ku kuuta abalwele abali mu mishi ya palamineko no kubaleta kuli Yesu. 36 Bali mupapatile ati abali kulwala bakumyeko fye ku kisempe kya nsalu yakwe, na bonse abakumisheko bali polele.