1 Ifi efikolwe fyakwa Yesu Klistu mwana Davidi, mwana Ablahamu. 2 Ablahamu afyele Isaki, Isaki naye afyele Yakobo, Yakobo afyele Yuda na bawabo, 3 Yuda afyele Pelesi na Sela muli Tama. Peleshi afyele Heshiloni, Heshiloni afyele, Lamu, 4 Lamu wishi lyakwa Aminadabu uwafyele Nashoni, Nashoni naye afyele Samoni, 5 Samoni afyele Boasi elo Boasi afyele Obedi uo nyina ali ni Lute, Obedi e wafyele Yese, 6 kabili Yese e wishi lya mfumu Davidi. Davidi naye epakufyalamo Solomoni muli muka Uliya. 7 Solomoni e wishi lyakwa Lehoboamu, na Lehoboamu afyele Abiya uwali wishi lyakwa Asa. 8 Asa afyele Yehoshafati wishi lyakwa Yeholamu, Yeholamu afyele Usiya. 9 Usiya naye afyele Yotamu naye kwisa kufyala Ahasi, Ahasi afyele Hesekia 10 wishi lyakwa Manase. Manase afyele Amosi. Amosi naye afyele Yosiya. 11 Elo Yosiya naye epakuba wishi lyakwa Yekoniya na bawabo panuma ya kusendwa bunkole ku Babiloni. 12 Yekoniya naye afyele Shealiteli panuma ya ku sendwa bunkole ku Babiloni. Shealiteli afyele Selubabele. 13 Selubabele afyele Abihudi, Abihudi afyele Elyakimu elo Elyakimu naye epakufyala Asoli. 14 Asoli afyele Sadoki. Sadoki afyele Akimu elo Akimu naye epakufyala Elyudi. 15 Elyudi afyele Elyesa, Elyesa e wishi lyakwa Matani. Matani afyele Yakobo, 16 Yakobo naye ewafyele Yosefu muka Maliya nyina lyakwa Yesu uyo bakuuta ati, Klistu. 17 Ekyo inkulo shonse ukutampila fye pali Ablahamu ukushinta pali Davidi shaba ikumi limo na shine. Kabili ukufuma kuli Davidi ukushinta fye na ku kusendwa bunkole ku Babiloni napo pali nkulo ikumi limo na shine. Kabili ukutampila panshita ya muli bunkole ukushinta pali Klistu napo pali pitilepo inkulo ikumi limo na shine.

18 Ifi efyali ukufyalwa kwakwa Yesu Klistu. Maliya uwaishile kufyala Yesu alisongelwe kuli Yosefu. Nomba ulo tabalati kubapamo, kyalisangilwe ati Maliya alimitile ukupitila mu maka ya Mupashi wa Mushilo. 19 Nomba ikyo Yosefu ali mololoke, tafwaile kusebanya Maliya. Alipingile fye ukumulekela mu nkaama. 20 Ulo akili akotontonkanyapo, Malaika wakwa Shikulu alimubonekele kutulo mu kiloto no kumweba ati, "Yosefu mwana Davidi, wiba na mwenso pakusenda Maliya pakwebati abe mukashi obe, pantu ikyo emitile kyakufuma kuli Mupashi wa Mushilo. 21 Akesa kufyala umwalalume na webo ukamwinikile ati, Yesu, ikyo eukesa kupususha abantu bakwe ku membu shabo." 22 Ifi fyonse fyakitikile pa kufikilisha ikyo Shikulu asobele muli kasesema ati, 23 "Nakisungu akesa kwimita no kufyala umwalalume akenikwa ati, Imanueli," ili shina lyapilibwila mu kwebati, "Lesa aliba pamo na fwebo." 24 Yosefu pa kwalamuka mutulo, epakukonka fyeke fyo aebelwe kuli Malaika, no kusenda umukashi wakwe Maliya ku nganda kwakwe. 25 Nomba tapangilepo nakwe kyupo mpaka Maliya aisa kupaapa umwana umwalalume, na Yosefu alimwinikile ne shina ati ni Yesu.