1 "Kengeleni mwile kukita ikyabune pa kubonwa ku bantu. Nga mwakite fyo ninshi tapalipo kilambu mukakwatapo kuli wishinwe wa mwiulu. 2 Ulo wapeeela ku wakubulwa, wibilisha ku bantu nge fyo babumbimunda bakita mu ma Sinagoge na mu misebo pa kutashiwa ku bantu. Nkomyebati balipokelela libela ikilambu ku bantu. 3 Nomba ulo wapeeela ku wakubulwa wileka ukuboko kwa ku kipiko kwishibile ikyo ukwa mulyo kukokita. 4 Epakwebati ukupeela kobe kube mu nkaama. Elo Wishinwe uubona mu nkaama akakulambula."

5 Kabili ulo mu kopepa, mwile kuba nga babumbimunda abatemwa ukwimakana pa kupepela mu ma Sinagoge na mu misebo pa kubonwa ku bantu. Mukine balipokela limo ikilambu kyonse. 6 Nomba webo pakupepa, kabuye mu muputule mobe wisaleko ne kiibi elo upepe kuli wiso uubona mu nkaama, akakulambula. 7 Kabili ulo mukopepa mwile kulabaila nge fyo abataishiba Lesa bakita, pantu batontonkanya ati muli kyo emo bengomfwiwa. 8 Mwile kubapashanya pantu wishinwe alishibile ifyo mukokabila ulo tamulati kumulomba. 9 Fyeke fi efyo mulingile ukule kupepa;

We Tata we waba mwiulu,

Likindikwe shina lyobe.

10 Ubufumu bobe bwise,

ubufwayo bobe bukitikwe pesonde nge fyo kyaba mwiulu.

11 Utupeelepo lelo ikyakulya kyanshiku shonse.

12 Utwelele ifyakubifya fyesu,

nge fyo na fwebo twelela abatubifya.

13 Witutwala mu mesho ayakulu, nomba utupusushe kumubifi.

14 "Ekyo nga mwaelela abakomibifya, wishinwe mwiulu naye akamyelela. 15 Nomba nga teti mubelele, shinwe mwiulu naye tekuti amyelele."

16 "Ulo mukofunga mwi boneka ubulanda ngefyo babumbimunda bakita. Balaponya ifinso pa kuilanga ku bantu ati bakofunga. Mukine na myebati, ikilambu kyabo kyonse balipokelele kale. 17 Ulo mukofunga, subeniko amafuta ku mutwi no kusambika pa kinso, 18 pakwebati kiboneka ku bantu ati ukofunga, kano fye kuli wiso uutaboneka, uubona mu nkaama, eu ka kulambula."

19 "Mwile kututila fyuma fyenu pesonde, apo impese ne ndalabwa fingonaula kabili apo abang'o ba pantula no kwiba. 20 Tutileni fyuma mwiulu umo impese, ne ndalabwa shita ngonaula, umo na bang'o tabangatibula no kwiba. 21 Pantu ukuli ikyuma kyobe ekuba no mutima obe.

22 "Ilinso e musaniko wa mubili, amenso yobe nga yali umutende, umubili onse ukesulamo ulubuuto. 23 Nomba amenso nga tayali bwino, umubili onse ukaba mu mfinshi. Ekyo ulubuuto muli mwebo ngalwali ni mfinshi, iyo mfinshi kuti yaba ikulu sana!"

24 "Tapalipo engabombela imfumu shibili, kuti apatapo imo no kutemwapo imbi, nangula ukuipelesha kuli imo no kufuupula iinakwe. Teti mubombele Lesa ne ndalama pa kashita kamo kene."

25 "Ekyo mwisakamikwa pabumi bwenu nefyo mungalya nangula ukunwa nangu fyakufwala ku mubili, pantu umweo ulikindaminepo pa kyakulya no mubili ulikindaminepo pa fyakufwala. 26 Lolesheni pafyo utoni mwiulu ututalima nangula ukututila mu matala, nomba wishinwe wa mwiulu alatuliisha. Bushe tamuli bamutengo ukukilapo? 27 Ni nani pali mwebo angalundapo inshiku shakwe pantu akosakamikwa?" 28 "Nindo mukosakamikilwa palwa mifwalile? Boneni ifyo amaluba yamena, tayabomba nangula kupikula. 29 Nomba nkomyebati nangula ni Solomoni wine mu bukindami bwakwe, tasamikilwepo nga yalya. 30 Ngefi efyo Lesa afwika ifyani ifyakubapo fye lelo, mailo fya pooswa mu mulilo, kuti afilwa ukumiliisha mweba kiteketelo kyakukepa?" 31 "Ekyo mwile kusakamikwa pafyo mungalya, ifyo munganwa, ne fyakufwala. 32 Pantu abataishiba Lesa efyo bafwaisha lonse nomba wishinwe mwiulu alishibile ati mukofikabila. 33 Nomba mwebo ngale fwayeni Ubufumu bwa mwiulu no bololoke bwakwe elo fyonse fikalundwapo kupeelwa kuli mwebo. 34 Mwile kusakamikwa pafya mailo pantu ifiine fikaibwena. Kila bushiku buli ikwatile amasakamiko yabuko."