1 Ulo Yesu ali kufuma mwi Tempele elo abasambi bakwe bamupalamine no kumulangilile fikuulwa abone ifyo fyakuulwa. 2 Yesu alibasukile ati, "Bushe mukobonefi fyonse? Nkomyebe kyakine tapalipo ibwe ilikashala pa mulu wa linakwe, yonse yakaponena panshi."

3 Ulo Yesu aikele pa Lupili lwa Miolife, abasambi balishile bakomwipusha mu nkaama ati, "Twebeko ulo iki kintu kikesa kukitika kabili kishibilo ndo ikya kwisa kobe pa ku langa impela ye sonde?"

4 Yesu alibasukile ati, "Mube abakwibukila, mwileka muntu nelo umo amilufye. 5 Pantu abengi bakesa bakolanda ati, ‘Ni nebo Klistu.’ Kabili bakalufya bengi. 6 Mukomfwa ifya bulwi ne mpupilisho sha bulwi, mwikasakamikwa pantu ifi fyonse fikesa kukitika, nomba ninshi impela tailati ifike." 7 Umushobo ukesa kwimina umushobo unakwe, elo bufumu bukesa kwimina ubufumu bunakwe. Kukesa kubapo ne fipowe ne finkunkuma mu nkende isha ku pusana pusana. 8 Ifi fyonse fikaba fye entampilo yabu kyushi bwa kupaapa umwana.

9 Elo ba kamikata, uku mikyusha no ku mipaya. Imishobo yonse ikamipatila pali nebo. 10 Abengi bakalufishamo ikiteketelo, ukule kuyalukila no kule kuipata abene na bene. 11 Elo bakasesema babufi abengi nabo bakesa kulufya bengi. 12 Pantu ububifi bukafula, ukutemwa ku kafubalila ku bengi. 13 Nomba uyo akashipikisha mpaka fye na ku mpela eukesa kupusuka. 14 Ne Mbila Yabune iyi ya Bufumu ikesa kubilwa ku ba pesonde bonse pa kuba bunte ku mishobo yonse, elo nomba impela ikesa.

15 "Ulo mukabona umupamba wa bonaushi uo kasesema Daniele alandilepo, wasangwa mwi Tempele." (uukobelenga na eluke) 16 elo abakaba mu Yudea ba kafulumukile ku mpili. 17 Uyo akasangwa pa mutenge, ekekila pa kuya kusendamo ifipe mung'anda. 18 No ukaba mwi bala naye ekema ukuya kufwayapo mwingila wakwe. 19 Kalanda ku banakashi bakaba pabukulu na bakalekonsha abana pali ilya nshita! 20 Mulekupepa pa kwebati fikakitika mu mupepo nangula pe Sabata! 21 Pantu ubo bukyushi bukakulishapo pa bukyushi bonse bwaliko kale ukutampa fye apo isonde lyalengelwe kabili ta bwakese kubako kuntanshi. 22 Pantu isho nshiku nga tashakepelako, tapangaba ungapusuka, nomba ni pa mulandu wa basalwa bakwe, epo shikesa kefeshiwa.

23 "Ekyo umo nga amyebati, ‘Klistu uno alipano,’ nangula ‘Ulya ali palya!’ Mwikasumina. 24 Pantu ba Klistu babufi na bakasesema babufi bakafula no kulekita ifisungusho ne fipeshamano ifikulu pa kwebati ngakingakitwa bakabepe na basalwa bene. 25 Kutikisheni, nkomyebela libela.

26 "Ekyo nga bamyebati, ‘Klistu ali mu kiswebebe,’ mwikayako nangula baebati, ‘Uyu ali mung'anda,’ mwikasumina. 27 Pantu Mwana wa Muntu akesa kubati ni filya umwele wankuba ubyasha mwiulu monse, ukutampila ku kabanga ukufika ku mbonshi.

28 "Pantu apali ikitumbi, epo na makubi ya kakolongana."

29 "Panuma ya bulya bukyushi, akasuba kakafiita fititi, umwenshi ta wa kaakepo, ne ntanda shikaponena panshi. Na maka ya mwiulu ya katenkana. 30 Elo ne kishibilo kya Mwana wa Muntu kikabonekela mwiulu, ne mishobo yonse ikaloosha pa kubona Umwana wa Muntu akoisa mu makumbi mu maka no bukindami ubukulu. 31 Ulo ipenga lya kiunda ikikulu likomfwika, elo akatuma bamalaika bakwe ukufuma muntunga shonse sha pesonde kabili bakakolonganika abasalwa bakwe ukufuma ukwatampile ulu no kufika kumpela yaiko.

32 "Sambililenipo ku kimuti kya mukunyu. Ulo amabula yafuunda, yalelema, muleshiba ati, amainsa yalipalamine. 33 Ekyo ulo mwabone fikokitika, mwishibile ati nshita ilipalamine. 34 Nkomyeba mu kine kine ati, inkulo ino tayakapitepo mpaka fyonse fikakitike. 35 Iulu ne sonde fikapita, nomba ikyebo kyandi ta kyakapitepo."

36 Tapalipo nangu umo uwaishiba ubushiku nangula kashita ulo Mwana wa Muntu akesa. Nangula fye ba malaika mwiulu, nangu fye Mwana kano fye Tata eka ena alishibile. 37 Ukwisa kwa Mwana wa Muntu tungakupalakanya kufyo kyali pali Noa. 38 Ulo takulaba ilyenshi, abantu bali kunwa, bali kuupa, no kuupwa, ukushinta napo Noa aninine mu kibwange. 39 Tabailukilepo ikyali kukitika mpake lyenshi lyaisakubalofya bonse. Fyeke fyo kikesakuba pa kwisa kwa Mwana wa Muntu. 40 Pali ilyanshita, abalalume babili bakalekubomba mwibala, umbi akasendwa, umbi akashala. 41 Abanakashi babili bakalekupela pebwe, umbi akasendwa, umbi akashala. 42 Mulekwibukila pantu tamwishibile ubushiku ulo Shikulwinwe akesa. 43 Umwine wa ng'anda ngalishibile ulo umun'go akoisa mu kwiba, kuti alola bobuno pa kwebati eleka besekutoba ing'anda yakwe. 44 Ekyo nomba mulekuipekanya lonse apo Umwana wa Muntu akesa pa nshita ulo mutenekele.

45 Ni nani umubomfi wa kishinka na mano? Ni ulya shikukulu wakwe alashika pali bukangalila pa banakwe ukulekubapeela ifyakulya pa nshita ya kulinga. 46 Ulya mubomfi akasansamuka ulo shikulu wakwe akamusanga akobomba bwino. 47 Nkomyeba mukine ati, shikulu wakwe akamulashika bukangalila pa fyuma fyakwe fyonse. 48 Nomba ngali mubomfi wabubi, akebati apo shikulu akokola pa kubwela, 49 no kutampa ukupumaula abanakwe, ukulekulya no kunwina pamo na ba kyakolwa. 50 Shikulu wakwe akesa panshita ulo mubomfi wakwe teshibile nangu kwenekela. 51 Ulya mubomfi akesa kuputaulwa tupimfya tupimfya kabili akesa kubikwa pamo na babumbimunda, Kukesakuba ukulila no kusumanya meno.