1 Pa makya, banshimapepo bakindami na bakilolo bali kupingana ifyo Yesu banga mwipaya. 2 Epakumukakila mu minyololo no ku mutwala kuli Pilato, umulashi wa ki Loma.

3 Ulo Yuda, uwamwalukile aishibile ati Yesu balimupingwilile ukufwa, alilangulukile, epakuya kuli banshimapepo bakindami na bakilolo no ku babwekesesha indalama sha silfele amakumi yatatu. 4 Epakubebati, "Ndibembukile pa kwipaisha uwakaele!" Nabo balimwasukile ati,

"Uyo te mulandu kuli fwebo, lobe we mwine!"

5 Yuda ailekupoosa indalama mwi Tempele. Ukufumapo, kuyakuikulika.

6 Banshimapepo bakindami epakutoola shilya ndalama elo balyebele ati, "Ishi ni ndalama shamisoka teti shibikwe mu kipao kye Tempele, takyasuminishiwa." 7 Ulo bapingushenye balibulile indalama no kuyakushitamo ibala lya muntu umo uwali kubumba inongo umwakwebati balekushikamo abeni. 8 Ekyo ukufika na kali lelo, ili bala balikuuta ati, "Ibala lya mulopa."

9 Epakufikilisha ifyo kasesema Yelemia alembele ati, "Babulile indalama sha silfele amakumi yatatu, e mutengo abena Islaeli bapingwile uku mushitishapo. 10 Indalama bashitilemo ibala lyakwa kabumba wa nongo nge fyo Shikulu angebekeshe."

11 Ulo baletele Yesu ku mulashi, umulashi naye alimwipwishe ati, "Bushe ni webo Imfumu ya Bayuda?" Yesu alimwasukile ati,

"Ulilandile." 12 Nomba ulo banshimapepo bakindami na bakilolo bali kumushinika, tayasukilepo.

13 Pilato epakwipusha Yesu ati, "Bushe ukoumfwa ifyo bakokwebaula?"

14 Nomba Yesu tayasukilepo nangu kamo, kabili umulashi kyalimupapwishe sana.

15 Nomba kila mwaka pa Mutebeto wa kya ku kilila kwali kubapo musango wakwebati umulashi abakakwilapo mufungwa umo uo abantu bangafwaya. 16 Pali ilya nshita palipo mufungwa umo uwaishibikilwe sana uweshina lya Baraba. 17 Ulo ibumba lya bantu lya kolongene, Pilato alipwishe ati, "Bushe ni nani mukofwayati mikakwile? Ni Baraba nangula Yesu uuwitikwa ati, Klistu?" 18 Pantu Pilato alishibile ati ni kumufimbila fye bamuleteleko.

19 Ninshi Pilato alikele pa kipuna mung'anda ya bupingulo, umukashi wakwe alitumine ntumi ati, "Wiesha ku kitapo kantu nangu kamo pali uyo muntu pantu nkyulile bushiku bonse mu kiloto palwa uyo muntu."

20 Nomba banshimapepo bakindami na bakilolo bali kusokesha ibumba lya bantu pakwebati balombe Pilato ukulekelako Baraba no kwipaya Yesu. 21 Pilato naye epakwipusha ibumba ati, "Nani pali aba babili mukofwayati mikakwile?" Nabo pa kupunda balyebele ati,

"Ni Baraba!"

22 Pilato alibepwishe ati, "Nomba nkite ndo pali Yesu uuwitikwa ati, Klistu?" Bonse balyasukile ati, "Mutanikeni!" 23 Pilato alibepwishe ati, "Mulandu ndo apangile?"

Elo batampile ukupundisha ati, "Mutanikeni!"

24 Pilato pa kubonati abantu tabanganashiwa kabili kuti paima ikimfulunganya, epakubula amenshi no kusamba ku minwe pa kinso kyebumba epakubeba ati, "Ntasangilepo mulandu nangu umo pali uyu muntu uwakwebati mupingwilepo kufwa. Mukiteni ikyo mukofwaya mwebene."

25 Elo abantu bonse balyasukile ati, "Lekeni umulopa wakwe ube pali fwebo na pa bana besu!"

26 Pilato akakwile Baraba panuma ya ku mufopaula sana ifyembya epakumuleka aye kutanikwa.

27 Ulo ifita fyakwa Pilato fyatwele Yesu mu kipango kya mulashi, ne mpuka yonse yalimushingulukile. 28 Epakumufula insalu shakwe no kumufwika umwingila uwakukashika. 29 Elo bapangile ikisote kya bufumu ikya myunga no kubika pa mutwi wakwe ne tete mu kuboko kwa mulyo kwakwe no kulekumufukamina mukapuni bakomweba ati, "Kanabesa we Mfumu ya Bayuda!" 30 Balimushipile amate no ku buula itete ukulekumuma pa mutwi. 31 Panuma ya kapuni, balimufulile umwingila, bamubwekeseshe insalu yakwe no kumufwika epakumutwala ku kutanikwa.

32 Ulo bali mukuya, ba kumenye umwalalume umo, Simoni umwina kilene. Ifita fyalimupatikishe ukusenda ulupanda lwa kwa Yesu. 33 Bafikile pa nkende iyo bali kukuuta, Gologota ikyapilibwila mukuti, "Inkende ya kabongoselo." 34 Epakumupeele umwangashi uwasankanishiwa ne ndusha, nomba alifililwe ukunwa panuma ya ku kimfulamo.

35 Epakumutanika no kupendula pa kwakanya insalu shakwe. 36 Elo baikele panshi bakomulonda. 37 Peulu lya mutwi balibikilepo ikipampa apo balembele amashiwi ya ku mwebawilapo ati, "Uyu ni Yesu Imfumu ya Bayuda." 38 Elo bamutanikile pamo no tupondo tubili, kambi ku kwa mulyo na kambi kipiko kwakwe.

39 Abali kupita mu nshila bali kutekanya fye imitwi no kulekutuka Yesu ifimasele ati, 40 "Walilandile ati uli no kubongolola Itempele no kuli kuula munshiku fye shitatu, ipusushe we mwine nga ni webo Mwana Lesa, itulukapo pa lupanda."

41 Banshimapepo bakindami, bakafundisha bamafunde pamo na bakilolo bali kumufuupula. 42 Bali kumwebati, "Apuswishe bambi, nomba afilwa ukuipususho mwine! Bushe ii te Mfumu ya Islaeli? Nga etuluke pa lupanda nomba pa kwebati tumuteketele. 43 Alisumina muli Lesa kabili alailanga ati, ‘Ndi Mwana Lesa, tukobona nga kuti Lesa amupususha nomba.’ "

44 No tupondo twa tanikilwe pamo naye nato twine twali kumutukaula masele.

45 Ulo akasuba kafikile pakati ka mutwi (12:00 koloko), ikyalo kyonse kyakupilwemo imfinshi iyapwile insa shitatu. 46 Panshita ya 15:00 koloko, Yesu apundile ishiwi ilikulu ati, "Eloi, Eloi, lamasabakatani? Ikyapilibwila mukwebati, Lesa wandi, Lesa wandi, nindo wandekelesesha?"

47 Abantu bambi abaimanine palya pa kumfwa baebele ati, "Akokuuta Eliya!" 48 Umo pali balya aswatuka no kuyakutumpiko mwepu mu mwangashi uwakukantuka no kupombelekesha kwitete. Epakumupeela ati anwe.

49 Nomba bambi nabo balyebele ati, "Natupembeleko tubone umfwa Eliya akoisa kumupususha!"

50 Elo kabili Yesu pa kupundisha mwishiwi likulu, alekele na ku mweo.

51 Pekapo, ikisalu kya tanikilwe mwi Tempele kyalilepukilemo pa kati, ukwambila peulu mpaka panshi. Ikyalo nakyo kyali tenkene, na mabwe yalisanaikile. 52 Inshishi shalisukile, na bamushilo abengi balishikukile ku bakufwa. 53 Balifumine mu nshishi panuma Yesu ashikukile ku bakufwa. Balile kwingila mu Musumba wa Mushilo na bengi balibabwenepo.

54 Umukulu wa fita umwanda umo, pamo ne fita fyali kulinda Yesu, fyalibwene ikinkukuma na fimbipo ifyakitikile fyonse no kupeshiwa mano no kwebati, "Mukine fye ali ni Mwana Lesa!"

55 Palipo na banakashi abengi abali akatalamukila abali kukonka Yesu no kumupyungila ukufuma ku Galile. 56 Pali balya, palipo Maliya Mandalena, Maliya muka Sebede, nyinabo lyakwa Yakobo na Yosefu.

57 Pa kyungulo, kwalishilepo uwafyuma umo ukufuma ku Alimatiya, uweshina lya Yosefu naye ali musambi wakwa Yesu. 58 Ailekulomba umubili wa kwa Yesu kuli Pilato, elo pilato asuminishe ukumupeela. 59 Elo Yosefu asendele no ku mupomba mu nsalu iyipya. 60 Epakubika na mu nshishi yakwe iyipya, iyo aimbile mukilibwe, akunkulushishepo ikilibwe pa mwenshi wa nshishi, elo afuminepo aya. 61 Maliya Mandalena na Maliya munakwe balikele apalungatene ne nshishi.

62 Ubushiku bwakonkelepo panuma ya bushiku ubwakupekanya bwali li Sabata, banshimapepo bakindami baisa ku kumanya Pilato. 63 Balitampile ukulanda ati, "Kanabesa, tukoibusha ati ulya kabepa wabufi ulo ali talafwa alilandilepo ati, ‘Ndi no ku bushiwa panuma ya nshiku shitatu.’ 64 Ekyo ebekesheni bakalinda wa nshishi baikingilile bwino bwino mpaka ubushiku bwa kulenga butatu epali abasambi bakwe baya kwiba umubili, no kweba bantu ati, ‘Alibushiwe ku bakufwa.’ Ubufi bwa pakupelekeshako bukesa kubipishapo pa bwa kuntampilo."

65 Pilato alibebekeshe ati, "Mubone ati inshishi yalindwa bwino bwino."

66 Ulo bafumine apo baile kubikapo ikikakatikilo pa kilibwe no kubonati abalinshi bakolonda lonse.